Pa Ramdan, S.Pd., M.Si., Kepala SMKN 6 Kota Bandung, salah sahiji Kepala Sekolah nu visioner
“Ngadidik para siswa-siswi, geusan ngabiasakeun daék nabung keur satuluyna jadi kabiasaan dina kahirupan sapopoéna.”
Sobat Sora, pareng nepangan Kepala SMKN 6 Kota Bandung, Drs. Ramdan, M.Si, ngaguar ngeunaan program SimPel. Anu geus launching ti ping 21 Maret 2016, gawé bareng jeung Bank BJB. Ngokolakeun uang jajan siswa ieu sakola. Tujuanana mah ngabiasakeun nyisihkeun duit jajan, béaya pulsa, jrrd, kalawan teu aya tekenan jeung paksaan, éstu kasadaran dirina.
Kurang leuwih aya 1350 urang siswa SMKN 6 nu janten nasabah SimPel Bank BJB
“Tina jumlah 2315 siswa-siswi SMKN 6, 1350 urang tos janten nasabah tabungan Simpel Bank BJB. Diharepkeun ka payunna, teras nambihan jumlah peserta didik anu daraék nabung,” kitu saur Pa Ramdan.
Setoran awalna, nya éta Rp 5000, keur satuluyna minimal sapoé Rp 1000. Euweuh biaya administrasi, nabungna téh. Masing-masing nasabah engkéna baris dibéré kartu ATM sakalian jadi kartu pelajar.
Pa Ramdan Kepala SMKN 6 Kota Bandung dina acara mitembeyan/laounching tabungan SimPel BJB
“Kagiatan SimPel sifatna pembelajaran, sangkan siswa SMKN 6 teu reuwas deui kana properti-properti anu tumali sareng anu namina bank. Alhamdulillah pada ngarojong, dibagyakeun ku warga sakola katut masarakat sabudeureunana,” kitu saur Pa Ramdan daria.
Buku tabungan SimPel Bank BJB
Harita launching SimPel lumangsung gebyar, Senén tanggal 14 Maret 2016 katompernakeun. Diluuhan ku: Bapa Elih Sudiapermana, Kadisdik Kota Bandung, Ibu Hj. Rita, Kabid SMA/SMK Disdik Kota Bandung, Dirut BJB Cab Bandung, Kanwil BJB, Anggota, Komisi III DPRD Kota Bandung, Wawakil orang tua siswa, Komite sakola, diwakilan ku Pa Adé Juhara, Pengawas SMKN 6, Bapa Dédi Indrayana, jrrd. Salian ti éta hadir Kepala Sekolah ti 15 SMK Negri nu aya di Kota Bandung jeung Kepala SMAN 25 Kota Bandung , SMAN 10 Kota Bandung sarta SMAN 15 Kota Bandung.
Minimal siswa SMKN 6 Kota Bandung, nyisihkeun Rp.1000, dina sapoéna
Gawé bareng program SimPel Bank BJB jeung SMKN 6 téh, lumaku salila 4 taun. Salian ti gawé bareng, harita Bank BJB ogé méré bantuan ténda, ka 15 sakola. Salian ti éta rék méré bantuan kantin séhat, taman atawa toilet, kumaha paménta sakolana.
Drs. H. Jaka Suprapta, M.M.Pd., Waka. Pengembangan
Drs. Adhy Mudjiono Waka. SDM
Téhnis SimPel di SMKN 6 téh, basajan pisan. Siswa ngumpulkeun duitna di masing-masing wali kelasna. Dibébaskeun nabungna téh, minimal Rp 1.000. Rék leuwih gé meunang, saperti 20 rébu, 50 rébu atawa 100 rébu. Saban samingu sakali disetorkeun ka Bank BJB, ku cara jemput bola, nya éta petugas Bank BJB-na datang langsung ka kampus SMKN 6, nu aya di Jalan Soekarno Hatta, Riung Bandung.
Pa Ino Soprano, S.Pd., M.M.Pd., Waka Sarpras
Harepan Pa Ramdan ka payunna, mudah-mudahan, sakur siswa SMK jeung anu sadarajat kayaning SMA, Aliyah bisa gabung dina gerakan cinta nabung, hususna dina program simpanan pelajar, kalawan tangtuna direugreugan ku pangrojong kepala sekolah, wakasek, guru-guru katut ka para siswa papada umumna.
Pa Dédén Héndi, S.ST., Waka Kesiswaan
Kamandang Pa Ramdan, dipairan ku Waka. Kesiswaan, Bapa Dédén Héndi, S.ST. Genep kompeténsi keahlian SMKN 6, kacida ngarojongna kana gerakan SimPel. Boh Sipil/PKK, TGB/Arsitek, TPM/Mesin, Otomotif/TKR, Listrik jeung Eléktro.
“Nabung téh bagian tina kaaripan lokal, anu prak-prakanana geus biasa dilakonan ku urang Sunda ti béh ditu mula. Sanajan tangtu baé baheula mah sipatna tradisional. Samodél nyéngcéléngan dina ruas awi gombong. BJB ngahaja datang ka sakola saban dinten Rebo, geusan ngayakeun open table. Saterusna méré penghagargaan ka sing saha siswa-siswi (nasabah) anu pangrajinna nabung,” Saur Pa Dédén.
Pa Amrih Wiyono, S.Pd., Waka. Humas/Hubin
Aya dua program unggulan SMKN 6 dina awal taun ieu téh. Nya éta program SimPel jeung koperasi siswa, anu nyakup kana kagiatan kantin kejujuran. SimPel jeung koperasi siswa engkéna bisa waé diasupkeun kana ékskul SMKN 6. Intina mah boh SimPel boh koperasi siswa, diharepkeun ngawujudna gerakan parobahan sikep ka nu leuwih positif. Saperti ngaronjatkeun sikep jujur jeung parigel dina ngatur keuangan sapopoéna. Hasil parobahan sikep téh sapertina baé tina teu apal jadi apal, tina teu sopan jadi sopan, tina boros jadi apik jsb-na.
Pa Agus P., S.Pd., M.Si., Waka. Manajemen Mutu
“Tina gerakan simpanan pelajar bisa nyiptakeun sikep jujur dina sagala widang, kalebet dina 14 ékskul nu aya di SMKN 6. Sakumaha anu tos lumarap dina KBM (kegiatan belajar mengajar), diarahkeun kana ngali potensi kajujuran siswa, kalawan diwadahan ku kagiatan ékstrakurikuler (ékskul),” kitu saur Pa Dédén.
Pa Kosim, S.Pd., M.Pd., Waka. Kurikulum
Dina awal taun 2016, ékskul SMKN 6 keur hangkeut-hangkeutna ngaunggulkeun paskibra, kapramukaan jeung marching band. Kagiatan marching band ahir-ahir ieu mindeng manggung dina ondangan resmi Wali Kota Bandung, dina hajatan-hajatan warga jrrd.
Paskibra SMKN 6 Kota Bandung leubeut ku préstasi
“Alhamdulillah, salami SMKN 6 dipingpin ku Pa Ramdan aya dina suasana kondusip. KBM-na pluh, enjing-enjing sareng pabeubeurang. Ti Senen tug dugi ka dinten Saptu ogé, aktif kagiatan belajar-mengajar,” saur Pa Dédén. [MS]***
