Kepala SMPN 32 Kota Bandung
Mikawanoh ka Kepala SMPN 32 Kota Bandung, Bapa Ujang Wihatma, M.Pd. Ngawitan dines ti ahir April 2015. Sobat Sora, anapon garapanana nya éta ngawujudkeun suasana kondusif di jero jeung di luareun sakola. Sakaligus nata wangunan sanajan kiwari aya anu can katodél nyatana rohang toilet jueng rohang BK. Nata jadwal ngajar tina 26 rohang dipeureut jadi 24 rohang nu kapasitasna mampuh nampung siswa 860 urang.
Guru SMPN 32 Kota Bandung
Dirarancang ka hareupna mampuh ngaréngsékeun 21 rohang, minus mushola kalawan tetep diupayakeun sakola isuk-isuk alias teu aya sip. Mangka solusina teu aya kajaba ku cara siswana pindah ka kelas mata pelajaran (moving class) lian ti olah raga. Dipiharep ahir 2016 geus ngajengléng wangunanana.
Kiat-kiat Pa Ujang Wihatma, M.Pd, ku tarékah ngamaksimalkeun riungan MGMP, komitmen wajib hadir ka para guru boh aya atawa teu aya kepala sakola. Berekah hasilna 70 peresén matak ngagumbirakeun. Kagiatan ngajar tetep konsistén, asup pukul 07.15-14.15 (Senén), 07.15-11.20(Jumaah), poé biasa ti pukul 07.15-13.50 pleus ekskul Poé Saptu.
Misi anu dicepengna nya éta ngupayakeun kondusif dina saban kagiatan diajar, getén kana lingkungan, nanjeurkeun budaya husuna Budaya Sunda anu tatapakanana ngawawanoh kana lingkungan. Udaganana geusan ngahontal sakola adiwiyata Kota Bandung. Tatanan lingkungan sakola ngupayakeun melak tutuwuhan anu santun lingkungan.
Salah sahiji garapan anu keur dihangkeutkeun, nya éta ngembangkeun sistem sakola digital class. Ku kituna saban bulan aya ujian sacara jaringan anu soal-soalna dijieun ku MPMGP kalawan dikordinatoran ku SMPN 23 Kota Bandung.
Sobat Sora, dina ngaapresiasi gerak tur karancagéan Pa Ujang Wihatma, M.Pd, Pa Iwan Waélan, S.Pd., minangka wawakil sakabéh guru, negrakkeun kamandangna. “Pa Ujang ngarojong kana arah kamajuan sakola, ngajungjung kasundaan turta sering ngiang-ngiangkeun para siswa kana rupaning pasanggiri. Turta nu langkung penting ayana revolusi mental.”
“Ku kapamingpinan Pa Ujang di SMPN 32 Kota Bandung, kagiatan sakola langkung disiplin turta teras-terasan ngupayakeun pasilitas anu langkung kondusif,” cék Eva Yuliantika wawakil ti sakabéh siswa SMPN 32 Kota Bandung. Heup heula. [MS]***
