Dra. Nunung Kuraésin, M.M.Pd, Kepala SMPN 28 Kota Bandung
Léngkong – Dra. Nunung Kuraésin, M.M.Pd, ayeuna mancén tugas janten Kepala SMPN 28 Kota Bandung. Méméhna ngepalaan SMPN 31 Kota Bandung. Di SMPN 31 Kota Bandung anjeunna hasil nyeungitan ngaran sakolana. Salah sahiji préstasina nya éta kapeunteun jadi sakola Adiwita Nasional. Di sagigireun éta istiqomah miara ajén inajén kasundaan, ngajadikeun kasenian Sisingaan has Subang jadi icon SMPN 31 Kota Bandung.
Bu Nunung nuju nalingakeun réhab wc siswa SMPN 28 Kota Bandung
Ayeuna Bu Nunung mingpin SMPN 28 Kota Bandung. Kakara itungan bulan anjeunna mingpin ieu sakola nu perenahna di Jalan Solontongan No. 11, Kelurahan Turangga, Kecamatan Léngkong téh. Paribasana mah ngalalanyah kénéh. Sanajan kitu sautak saeutik programna geus bajalan.
Haneut kénéh, taman sakola SMPN 28 dibebenah, saperti taman nu aya di sabudeureun lapang, kuloneun wangunan sakola, jrrd. Salian ti éta, balongna kiwari dipelakan deui lauk. Anjeunna hoyong nata sakola nu leuwih apik tur geunah katempona.
WC siswa gé jadi garapan nu keur dikeureuyeuh. Aya sababaraha wc nu digédéan ukuranana téh, saperti wc lalaki nu tadina aya salapan jadi genep, sarta nyieun wastafél-na. WC awéwé gé nu tadina aya tujuh jadi lima tur wastafél dua. Salian ti ngaréhab, aya ogé nu dioméan keramikna wungkul, jumlahna aya salapan wc. Samalah diluhureun wc awéwé baris ngawangun deui wc.
Dalit sareng siswana
Ku Bu Nunung, Majalah Sora diajak mapay-mapay sakola. Nuduhkeun mana-mana baé nu baris dioméan tur diwangun. Saperti kantin sakola, aula-na, sarta boga cita-cita ngalegaan lahan sakola.
Bu Nunung nuju diskusi sareng Bu Susiani, S.Pd, Waka. Kesiswaan
“Ibu mah ukur ngalajengkeun program kepala sakola nu sateuacanna. Nu tos saé mah dipertahankeun, syukur-syukur tiasa langkung. Kaayaan sakola mah relatif saé. Kitu ogé bantosan ti rekan kerja Ibu. Ayeuna udagan Ibu mémerés kaayaan fisik sakola heula. Ibu gé noong pengkeuereun kantin sakola aya wangunan nu teu kaanggo. Mudah-mudahan mudah-mudahan tiasa kapimilik, janten tiasa ngalegaan lahan sakola. Aminn,” saur Bu Nunung bari imut. [MS]***
