Hj. Maé Juhara, S.Pd. Kepala SDN Ujung Berung 1,2,3,4, 5 & 9 Kota Bandung
Ujung Berung – Poé Salasa 10 januari 2017, Majalah Sora ngadongdon ka SDN Ujung Berung 1,2,3,4,5,& 9 Kota Bandung, nepungan Bu Maé, salaku Kepala Sekolahna, nu mancén tugas ti taun 2015. Salian ti silaturahmi, Majalah Sora gé, baris mropilkeun anjeunna, nu dipidangkeun dina seratan ieu. Tah Sobat Sora aos wé nya, profil singketna mah.
Ibu Maé, lahir di Bandung, tanggal 10 Maret 1962, putra ti Ibu Cucu Sumirat (almh) sareng Bapa O Sumarno (alm). Jenegan carogéna nya éta Drs. H. Haeruddin, M.Pd. Kagungan putra tilu, awéwé dua, lalaki hiji.
Mangsa sakola dasar, anjeunna sakola di SDN Sarjambé Cangkuang, Garut, lulus taun 1972. SMP-na di SMPN Lélés Garut,lulus taun 1975, laju neruskeun ka SPG Muhammadyah Bandung, lulus taun 1981.
Kaayaan rohang tata usaha
Satutas lulus ti SPG, Ibu Maé ngawulang di SDN Ciléngkrang, ti taun 1982 nepi ka taun 2012, nu pernahna di gugus 27, Kel. Cisurupan, Kec. Ujung Berung, Kota Bandung. Mun ngitung taun mah kira-kira geus leuwih ti 30 taun, Bu Maé babakti di éta sakola téh.
Dina sela-sela kasibukan tur dina raraga ngeuyeuban élmu pangaweruhna, Bu Maé neruskeun kuliah di D-2 UT (Universitas Terbuka). Tuluy Basa taun 2003, hasil ngaraéh gelar sarjana, ti Universitas Bandung Raya, Kota Bandung.
Taun 2012, tanggung jawab Bu Maé jadi leuwih gedé, saprak lulus tur ditugaskeun jadi Kepala SDN Mekar Galih Kota Bandung, nu asup dina gugus 73, Kel. Pasanggrahan, Kec. Ujung Berung. Kurang lewuih aya dua taun mingpin éta sakola téh. April 2014, anjeunna ngalih tugas, janten Kepala di SDN Ujung Berung 1,4 & 5 Kota Bandung. Ti taun 2015 tug nepi ka ayeuna, kacatet jadi Kepala SDN Ujung Berung 1,2,3,4, 5 & 9 Kota Bandung.
Kaayaan sakola
Basa ku Sora dikolongan ngeunaan tokoh inspiratifna, Bu Maé tandes ngajawab, nokohkeun Biangna, Pa Ahmad Héryawan tur Pa Ridwan Kamil. Mottona mangsa digawé kudu soson dina raraga ngaronjatkeun kualitas pagawéan. [MS]***
