Drs. Yayat Supriyat M.M.Pd, Kepala SMAN 2 Kota Cimahi
Cimahi Tengah – Basa poé Saptu (18/Juni/2016) pasisiang Sora ngahaja ka SMAN 2 Kota Cimahi, nyaksian kagiatan PPDB jalur non akademik sacara langsung. Harita tepang sareng Drs. Yayat Supriyat M.M.Pd, Kepala Sekolahna.
Kagiatan PPDB jalur non akademik taun pelajaaran 2016-2017 di Kota Cimahi, dibuka ti tanggal 15 Juni nepi ka 18 Juni 2016 kamari, ngaliwatan jalur online jeung langsung. Kagiatan pendaftaranana dibuka ti pukul 08.00 nepi ka pukul 14.00.
Sacara umum kagiatan PPDB jalur akademik taun 2016 di SMAN 2 Kota Cimahi lumangsung lungsur langsar. Nepi ka poé terakhir geus aya 120 calon siswa nu daftrana téh. Méméh katampa ku ieu sakola divérifikasi tur diseléksi heula, ti tanggal 20 nepi ka tanggal 21 Juni 2016. Kalulusanana baris diumumkeun tanggal 25 Juni 2016.
“Taun pelajaran 2016-2017 SMAN 2 Kota Cimahi baris nampi 360 siswa. Kuotana turun 33 urang, ti batan taun kamari. Ngahaja dilungsurkeun calon siswa anyarna téh, supados langkung efektif. Dina jalur non akademik SMAN 2 Kota Cimahi, tina jumlah total siswa anyar, 20 peresenna ditampi ngalangkungan jalur afirmasi tidak mampu, MoU, undang-undang guru, sareng préstasi,” kitu saur Pa Yayat., Kepala SMAN 2 Kota Cimahi nu soméah téh. [MS]***
