Dra. Rini Ambarwati, M.Ds., Kepala SMKN 5 Kota Bandung
majalahsora.com – Dina PPDB taun ajaran 2017-2018, SMKN 5 Kota Bandung baris narima 504 siswa. Poé Salasa, 6 Juni 2017, PPDB non akademik pikeun tingkat SMA SMK di Kota Bandung téh, munggaran di buka ka asup di SMKN 5. Taun ayeuna mah PPDB pikeun tingkat kasabit téh dikokolakeun ku Dinas Pendidikan Propinsi Jawa Barat, méméhna mah ku Dinas Pendidikan Kota jeung kabupatén séwang-séwangan.
Sacara umum mah, pesryaratan tur aturan PPDB-na teu béda jauh jeung taun kamari. Nu ngabédakeunana mah, taun ayeuna mah daftarna bisa di sakola asalna, ngan mangsa verifikasi data kudu masrahkeun ka sakola nu dijugjug. Ngan lamun sakola pilihan kahijina di luar kota mangka verifikasi datana bisa dipasrahkeun ka sakola pilihan ka dua.
Dina poé kahiji PPDB jalur non akademik di SMKN 5 Kota Bandung nu pernahna di Jalan Bojong Konéng no. 37 A téh, kacatet geus aya 40 urang nu daftar. Réréana mah nu ngadongdon ka sakola nu dipingpin ku Bu Rini Ambarwati téh, ukur tataya ngeunaan informasi PPDB.
“Alhamdulillah dinten kahiji lancar teu aya masalah. Seuseueurna mah nu sumping téh, masih tataros ngeunaan informasi sakola, ngumpulkeun persyaratan sareng bagbagan ngeunaan PPDB-na. Engkéna nu baris ditampi 70% ngalangkungan jalur akademik, 30%-na ngalangkungan jalur non akademik. Engkéna perkelasna ngawadahan 36 urang,” saur Bu Rini ngalangkungan sambungan telepon.
Jalur non akademik nu 30% téh kabagi deui jadi 20% SKTM/teu mampu, 10% préstasi, 3 urang pikeun nu berkebutuhan husus, pendaftaranana nepi ka tanggal 10 Juni 2017. Pengumaman jalur non akademikna ping 16 Juni 2017, laju nu katarima kudu daftar ulang ti ping 3 Juli nepi ka 5 Juli 2017.
Pikeun pendaftaran jalur akademis mah dibukana engké, tanggal 3 Juli nepi ka tanggal 8 Juli 2017. Nu ngabédakeuanana téh zonasi pikeun tambahan poin. Sedéngkeun sacara wilayah mah bébas ti mana baé bisa daftar, pokona mah sa-Jawa Barat bisa ngajugjug ka SMKN 5 Kota Bandung.
“Pami PPDB akdemik engkéna aya penambihan poin, otomatis kanggo nu jarak ti bumi ka sakola langkung caket tambihan poinna langkung ageung,” saur Bu Rini téh.
Pakét keahlian nu aya di SMKN 5 Kota Bandung téh, nya éta Teknik Konstruksi Batu robah jadi Konstruksi Gedung, Sanitasi dan Perawatan, nu tadina 3 taun, ayeuna mah lila pendidiknana jadi 4 taun, Teknik Gambar Bangunan jadi Desain Pemodelan dan Informasi Bangunan (3 taun), Teknik Survey Pemetaan (Geomatika) jadi Teknik Geomatika (3 taun), Kimia Analis mah tetep teu robah, lila pendidikanana gé 4 taun tetep kawas taun-taun ka tukang sarta nu terahir Teknik Komputer Jaringan (TKJ) tetep TKJ lila diajarna gé angger 3 taun.
Tah ieu yeuh passing gradena mah; Konstruksi Gedung, Sanitasi dan Perawatan, 20,05, daya tampung 72 urang/2 kelas, Desain Pemodelan dan Informasi Bangunan 24,45, daya tampung 180 urang/5 kelas, Teknik Geomatika 23,00, daya tampung 108 urang/3 kelas, Kimia Analis 25,40, daya tampung 72 urang/2kelas sarta TKJ 26,00, daya tampung 108 urang/3kelas. [MS]***
