Balééndah – Penerimaan siswa anyar SMAN 1 Balééndah (BE) Kabupatén Bandung ngaliwatan jalur préstasi jeung jalur bina lingkungan, lumangsung ti tanggal 23 nepi ka 28 Méi 2016. Kuotana 30 % tina jumlah 400 urang siswa pikeun 10 kelas nu baris katarimana. Pengumumanana tanggal 9 Juni 2016 katompérnakeun. Aya 61 urang siswa nu katarima ngaliwatan jalur préstasina téh, nya éta siswa nu berpréstasi dina widang silat, pramuka, pmr, paskibra, tahfiz Quran, seni, renang, karaté, taékwondo, osn, jsté. Sésana katampa ngaliwatan jalur bina lingkungan.
Bu Endah Purwanti, S.Pd, M.M.Pd, sekrétaris PPDB SMAN 1 BE, nuju sibuk dina kagiatan PPDB
SMAN 1 BE téh salasahiji SMAN favorit di Kabupatén Bandung. Matak teu hélok, lamun keur usum penerimaan siswa anyar, unggal taunna sok ngagimbung siswa SMP nu daftar ka ieu sakola téh. Katempo basa Sora nganjang ka SMAN 1 BE (14/6/2016) nu aya di Jalan RAA. Wiranatakusumah No. 30.
Pa Beno, salah sahiji panita PPDB di SMAN 1 BE
Ti tanggal 13 Juni nepi ka 18 Juni 2016, dibuka jalur penerimaan siswa didik taun ajaran 2016-2017, ngaliwatan jalur akademik, kuotana 70 %, nu diumumkeun tanggal 27 Juni 2016 nu bakal datang.
“Alhamdulillah, pelaksanaan penerimaan siswa baru di SMAN 1 Balééndah, lungsur langsar. Sadayana luyu sareng prosedur nu lumaku dina aturan PPDB (Penerimaan Peserta Didik Baru) ti Dinas Pendidikan & Kebudayaan Kabupatén Bandung,” kitu saur Ibu Endah Purwanti, S.Pd, M.M.Pd, salaku sekrétaris PPDB taun 2016-2017, nu ngawakilan Drs. Aa Sudaya, M.Pd, salaku Kepala SMAN 1 Balééndah. [MS]***
