majalahsora.com – Poé Juma’ah 28 April 2017, Pocari Sweat, merek inuman isotonic nu dikokolakeun ku PT. Amerta Indah Otsuka, ngayakeun konfrensi pers, tempatna di Aula Barat Gedong Saté, Bandung. Ngadadarkeun ngeunaan perlombaan lari marathon, nu baris dilaksanakeun Minggu ping 30 Juli 2017.
Méméhna salila tilu taun noron Pocari Sweat, suksés ngayakeun perlobaan Pocari Sweat Run, nepi ka dibéré pangajén “The Best 5K/10K/Half Marathon 2016” ti Majalah Elektronik & Komunitas Lari. Engké nu dilaksanakeun di Bandung mah, munggaran ngayakeun Full Marathon jejerna Pocari Sweat Bandung West Java Marathon. Start jeung finishna di Gedung Saté. Di piharep diiluan ku 6500 pamilon, boh pelari lokal, boh mancanagara. Total hadiahna Rp 500 juta.
Kapilihna Kota Bandung jadi tempat Pocari Sweat Marathon, alatan ieu kota nu boga jujuluk Parijz Van Java téh geus kakoncara sabagé kota pariwisata. Ku kituna panitia gawé bareng jeung Pamaréntah Propinsi Jawa Barat ngangkat sport tourism, sangkan Bandung jeung Jawa Barat leuwih ngajomantara.
Ruteuna baris ngaliwatan tempat jeung jalan bersejarah nu geus jadi icon Kota Bandung. Di antarana Gedong Saté, jembatan Layang Pasupati, Jalan Asia Afrika, Gedong Merdeka, Masjid Raya, Jalan Braga, jsté. Tujuanana lian ti lari, para pamilon gé bisa ngarasakeun kaéndahan Kota Bandung.
“Pamaréntah Jawa Barat ngadukung pisan kagiatan Pocari Sweat Marathon, komo janten event kareueus warga Jawa Barat mah,” saur H. Ahmad Heryawan Gubernur Jawa Barat.
Kagiatanana dibagi lima kategori, nya éta Kid Dash, 5K, 10K, Half Marathon jeung Full Marathon. Pocari Sweat umajak ka para pelari di Indonésia sangkan olahraga lari dilakonan sacara bener tur hasil nu optimal. “Ieu téh salah sawios, komitmen ti Pocari Sweat dina raraga masihan edukasi, ngeunaan pentingna pemahaman sarta tumerapna #SAFERRUNNING ka pelari Indonésia. Ti kawit persiapan, program latihan, nutrisi dugi ka pangaweruh ngeunaan nyegah cidera mangsa urang lari,” saur Pa Prayugo Gunawan, Managing Director PT. Amerta Indah Otsuka.
“Pangalaman nu narik ati jigana téh, lari bari ngurilingan tur ngarasakeun kaéndahan Kota Bandung téh,” saur Kang Agus Prayogo, atlet lari nasional. Nu baris ngiluan ruteu 10K di Pocari Sweat Bandung West Java Marathon.
Sagala upaya persiapan kagiatan Pocari Sweat Bandung West Java Marathon 2017 keur ditatahar, kayaning ruteu nu terstandarisasi, kasiapan tanaga medis, sarta nyadiaan hydration point pikeun kabéh katégori. Ayana tempat hydration point téh, mangrupa hal nu penting dina kagiatan lari mah, alatan hidrasi nu bener téh, jadi salah sahiji konci keur ningkatkeun performa, pangpangna keur atlet olahraga. Ku kituna Pocari Sweat nyadiaan hydration point di unggal 1,5 km lamun sacara waktu mah dina jero 15 nepi ka 20 menit, sangkan para atlet terhidrasi.
Masih aya pakaitna jeung Pocari Sweat Marathon, Pa Ahmad Heryawan salaku Gubernur Jawa Barat miharep kagiatanana jaga ulah muser di Kota Bandung baé. “Mudah-mudahan janten kalender taunan Pocari Sweat Marathon téh, mung tempatna ulah muser di Bandung wungkul. Di Jawa Barat sumebar tempat nu éndah pikeun diayakeunana lari Marathon, Cirebon, Pangandaran, Pelabuhan Ratu, Ciletuh Cisolok, Ujung Genteng pokona mah aréndah tempatna,” saur Pa Ahmad Héryawan, Gubernur Jawa Barat.
PT. Amerta Indah Otsuka salaku pausahaan nu nyepeng pageuh filosofi, sangkan dunya leuwih séhat téh, lain saukur umajak ka masarakat nanjeurkeun kasadaran pentingna olahraga, tapi ogé miara lingkungan, kucara tina hiji peserta Pocari Sweat Bandung West Java Marathon nu baris nyumbangkeun hiji tangkal. [MS]***
