Bu Yanti Rahmayanti, S.Pd., M.Pd., Wakasek Kurikulum nu ngarangkep janten Ketua UNBK SMKN 9 Kota Bandung
majalahsora.com – SMKN 9 Kota Bandung dina UNBK (Ujian Nasional Berbasis Komputer) taun 2017 ayeuna ngalaksanakeun UNBK nu kadua kali. Total siswa nu jadi pesertana kurang leuwih aya 447 urang, nu jolna ti paket keahlian DKV, Tata Boga, Patiserie, Busana, Akomodasi Perhotelan, Usaha Perjalan Wisata, Tata Rambut jeung Tata kulit.
Pa Sukadi, Kepala Tata Usaha SMKN 9 Kota Bandung
Sarana jeung prasana kagiatan UNBK taun ayeuna di SMKN 9 téh, leuwih undak ti batan taun méméhna. Jumlah komputerna aya 120 unit kaasup cadangan jeung komputer anyar 20 siki, nu disimpen diopat rohang ujian. Jumlah serverna aya opat katambah cadangan hiji. Téknisina jeung proktorna masing-masing aya opat urang. Pengawas silangna ti SMKN 7 Kota Bandung.
Kagiatan UNBK poé kadua, 11 April 2017 di SMKN 9 Kota Bandung
Basa pelaksanaan UNBK ti ping 10 nepi ka 13 April 2017 ka tukang, aya sababaraha masalah nu disanghareupan ku SMKN 9 Kota Bandung. Nu geunjleung mah, masalah ijazah palsu (ijazah paket B), nu jadi korbanna téh Kholid Abdul Muhsin, basa poé kahiji ujian nasional, ieu jajaka téh teu bisa ngiluan UNBK, alatan teu kadaftar jadi peserta UNBK. Sabada aya widi ti Menteri Pendidikan, tungtungna mah bisa ngiluan UNBK nepi ka réngsé, tur ngiluan ujian susulan keur pelajaran basa Indonésia dina ping 18 April kamari.
Pelaksanaan UNBK di SMKN 9 Kota Bandung
Salian ti éta mangsa pelaksanaan poé terahir UNBK, Kemis 13 April 2017, aya 89 urang peserta ujian ti jurusan Patiserie jeung DKV nu gagal ngeusian soal pelajaran kejuruan, alatan soalna teu kaluar. Ku kituna kudu ngiluan UNBK susulan.
Siswana keur serius ngeusian jawaban, dina pelaksanaan UNBK poe kadua 11 April 2017
Kagiatan UNBK susulan di SMKN 9 Kota Bandung lumangsung dua poé, poé Salasa jeung Rebo (18-19 April 2017). Poé kahiji diiluan ku tilu urang, di antarana Kholid ti Akomodasi Perhotélan, nu jadi korban ijazah palsu, saurang ti Patiserie jeung Busana saurang. Ngujikeun mata pelajaran basa Indonésia jeung matematika.
Pa Jajang (katuhu) padamel tata usaha, nuju sibuk damel ngabantos kalancaran UNBK 2017
Dina poé kadua ujian sususlan UNBK, ngujikeun pelajaran kejuruan. Jumlahna aya 89 urang ti paket keahlian DKV jeung Patiserie. Kagiatanana lumangsung dua pluh, pluh kahiji pukul 07.30 sedengkeun pluh kadua pukul 10.30. “Alhamdulillah teu aya masalah dina kagiatan UNBK susulan téh. Mudah-mudahan atuh ajén UNBK taun ayeuna peunteun siswa SMKN 9 Kota Bandung kanggo sadaya mata pelajaranana langkung ngajaul ti batan taun kamari,” saur Bu Rahmayanti, S.Pd., M.Pd., Wakasek Kurikulum nu ngarangkep jadi Ketua Pelaksana UNBK-na.
Miharep taun hareup SMKN 9 bisa ngalaksanakeun UNBK sacara dua pluh
Nilik kana pelaksanaan UNBK taun 2017 di SMKN 9 Kota Bandung, sacara umum mah bajalan lancar. Masalah nu disanghareupanna téh, jolna lain ti kasalahan panitia, tapi kasalahan ti pihak luar sarta ti panitia pusat, nu ngaluarkeun soal UNBK. [MS]***
