Poto tina internet. Vujovic satutas ngagulkeun ka gawang PSM Makassar
Soréang majalahsora.com – Sobat Sora, Dina pertadingan munggaran Persib (Senén 6 Pebruari 2017) di ajang Piala Présidén taun 2017, Maung Bandung hasil ngaraéh point sampurna, satutas ngéléhkeun PSM Makassar 1-0 di Stadion Si Jalak Harupat, Soréang, Kabupatén Bandung.
Gol tunggal Persib dicitak ku hédenan Vladimir Vujovic, di menit ka-59. Bék andelan Persib Bandung téh, lolos tina kawalan pamaén PSM. Vujovic suksés neruskeun umpan lambung sepakan penjuru Dédi Kusnandar. Laju bal nu mesat ngabelasat téh, asup ka juru kénca gawang Rivky Mokodompit.
Saenyana mah, di babak kahiji téh permainana dikawasa ku Persib, unggul 55 persen ti batan PSM Makassar. Kurang leuwih aya opat peluang nu bisa ngahasilkeun gol. Sabalikna PSM mah ukur boga hiji peluang emas. Sanajan kitu strategi PSM kalintang bahayana, ngandelkeun serangan balik.
Pamaén Maung Ngora nu dipaénkeun dina pertandingan kahiji Persib di grup tilu, nya éta Febri, Zola jeung Hénhén. Kaitung lumayan ari nempo cara maénna mah, ngan Zola jeung Hénhén mah di awal babak kadua diganti ku Dedi Kusnadar jeung Supardi Natsir.
Béda jeung Febri, ieu pamaén sayap téh dipaénkeun nepi ka lekasan. Kamampuh ngolah bola Febri katémbong istiméwa. Sababaraha kali suksés ngacak-ngacak pertahanan PSM Makassar. Samalah lamun sepakan Febri teu katahan ku Jan Pluim, aya bahan bisa jadi gul. Salian ti éta sababaraha kali suksés méré operan ka Van Dijk jeung Shohéi Matsunaga.
Babak kadua PSM Makassar, beuki napsu ngudag skor. Beuki ramé maénna téh, silih serang. Keur nambahan daya dobrak PSM Makassar, Réné Albert, salaku pelatih PSM ngasupkeun Titus Bonai jeung Syamsul Bachri keur ngaganti Pouya jeung Rashid Bakri. Usaha PSM Makassar keur nyaruakeun skor téh ampir-ampiran ngawujud, lamun sépakan Hamka Hamzah di jero kotak 12 pas, teu katéwak ku Madé Wirawan.
Pelatih Persib gé teu éléh géléng, Jajang Nurjaman ngasupkeun Kim Jeffrey, keur penyegaran, ngaganti Erick Weeks dimenit ka-82. Nepi ka tungtung babak kadua, Persib hasil mertahankeun kaungulanana. Méméh Persib vs PSM, tim Persiba meunang lawan Persela 1-0. Ku kituna ayeuna Persib suksés mingpin kelasemen semetara.
Susunan pamaén Persib vs PSM Makassar:
Persib: I Made Wirawan, Achmad Jufriyanto, Henhen Herdiana, Tony Sucipto, Vladimir Vujovic, Febri Hariyadi, Gian Zola, Hariono, Matsunaga Shohei, Sergio van Dijk, Erick Weeks. Cadangan: M Natshir, Supardi, Wildansyah, Atep, Dedi Kusnandar, Kim Jeffrey Kurniawan, Angga Febryanto
PSM Makassar: Rivky Mokodompit, Hamka Hamzah, Reva Adi Utama, Steven Paulle, Wasyiat Hasbullah, Arfan, Raphael Maitimo, Rasyid Assahid Bakri, Ridwan Tawainela, Willem Jan Pluim, Hosseini Pouya. Cadangan: Deny Marsel, Fathul Rachman, Ardan Aras, Ghozali Muharam Siregar, Syamsul Bachri Haeruddin, Titus Bonai. [MS]***
