Pa Juliansyah, ST., M.M., Ketua Pembina Yayasan Teknologi Sarana Utama sareng garwana
Buah Batu – Sobat Sora, poé Rebo tanggal 18 Januari 2017, gedong anyar SD Alkenzie, SMP, SMK sarta SMA BSC diresmikeun ku Dr. Hadi, salaku Kepala Bidang SMP Dinas Pendidikan Kota Bandung, nu ngawakilan Kang Emil, Walikota Bandung nu nuju aya pamengan sareng Pa Elih Sudiapermana Kepala Dinas Kota Bandung nu nuju teu damang.
Kampus dua BSC
Pernahna di Jalan Raya Margacinta, Kelurahan Cijawura, Kecamatan Buah Batu. Acarana diluuhan ku Pa Camat Buah Batu, Polsek Buah Batu, perwakilan ti TK, SD, SMP, SMA, SMK nu aya di sabudeureun ieu sakola.
Poto kénca ka katuhu Kang Haris (Radio Sonata Bandung), Dr. Hadi, Kabid SMP Disdik Kota Bandung, Bunda Rita, manten Kabid SMA Disdik Kota Bandung, nu janten narasumber & Teh Gifa (Radio Sonata Bandung) nu janten MC sareng Kang Haris
Lega lahan kampus dua BSC téh 4500 m2. Dina peresmian gedong tahap kahiji, ngawadahan 17 kelaseun. Satutas éta diteruskeun ka pangwangunan tahap kadua, nu baris réngsé dina ahir bulan Pebruari 2017. Lamun di jumlah jambléh mah rék ngawangun nepi ka tahap ka opat nu réngsé dina dangka waktu tilu tun ka hareup. Unggal gedong diwangun vertikal opat lantéy, masing-masing gedong aya 24 kelas.
Pa Asep Surahman, ti Polsek Buah Batu sareng Drs. Hendrawan Setia, Camat Buah Batu
“Alhamdulillah ieu téh mangrupi pangwangunan kampus dua, pikeun SMP sareng SMK BSC. Kampus hiji SMP sareng SMK BSC aya di Jalan Suci, ti taun 2009.. Kanggo SD Alkenzie sareng SMA BSC mah nu munggaran. Rencanana di kampus dua badé ngawangun opat tahap. Dina dangka waktu tilu taun, wangunan gedong kampus dua, baris réngsé sadaya,” saur Pa Juliansyah, ST., M.M., salaku Ketua Pembina Yayasan Teknologi Sarana Utama.
Paduan Suara SMP BSC Kota Bandung
Nu jadi marga lantaran ayana kampus BSC di lelewek Cijawura téh keur minuhan pangabutuh masyarakat dina dunya atikan. Hususna keur ngawadahan masyarakat nu rék nyakolakeun palaputrana ka tingkat SD, SMP, SMA atawa SMK.
Peserta seminar
“Alhamdulillah ayeuna nambihan deui aset pendidikan di Kacamatan Buah Batu. Padumuk Buah Batu kalebet padet, aya kana 89.000 jiwa. Ku ayana SD Alkenzie, SMP, SMA sarta SMK mugia tiasa ngabantos warga Buah Batu pikeun nyakolakeun palaputrana, pokona mah sing majeng,” saur Drs. Hendrawan Setia, Camat Buah Batu.
Peserta seminar
Salian ti acara peresmian kampus anyar BSC, acarana dieusian ku rupa-rupa kagiatan, aya pintonan seni léngsér, tari jaipongan, paduan suara, arumba ti mahasiswa ISBI (Institut Seni Bandung Indonésia), jrrd. Di sagigireun éta aya kagiatan seminar nu dijejeran “Membangun Karakter Generasi Muda Dengan Bandung Masagi” nu didugikeun ku Pa Hadi, salaku Kabid SMP Dinas Pendidikan Kota Bandung sareng Dra. Hj. Rita Hardiyani, M.Ed., Kabid SMA Dinas Pendidikan Kota Bandung mantén.
Ketua Pembina Yayasana Teknologi Sarana Utama dipoto sareng Dr. Hadi, Kabid SMP Disdik Kota Bandung sareng para Guru ti BSC
Dina seminar kasabit, Bunda Rita, landihan Dra. Rita ngadadarkeun pentingna ajaran Islam jeung Al- Qur’an pikeun siswa nu muslim, dina raraga ménténgan generasi ngora tina hal negatif, saperti sex bébas, narkoba géng motor, jrrd. Cék bunda Rita dina Al-Qu’ran mah geus nyampak sagala halna téh, kari di praktékkeun sacara serius.
Kahareupna SD Alkenzie, SMP, SMA sarta SMK BSC baris maké dua kurikulum. Kurikulum nu jolna ti pamaréntah sarta kurikulum mandiri ieu sakola, nya éta kapamingpinan, entrepreuneur jeung agama Islam. Salila ieu kurikulum mandiri nu jolna ti Yayasan geus dipaké di SMP BSC 1 jeung SMK BSC 1 Kota Bandung.
“Mudah-mudahan ku ayana SD Alkenzie, SMP, SMA sareng SMK BSC di lingkungan Kecamatan Buah Batu, tiasa masihan nuansa baru. Ieu téh salah sawios peran masyarakat dina ngawangun pendidikan. Bapa yakin di SD Alkenzie, SMP, SMA, SMK BSC seueur program unggulanana,” saur Dr. Hadi, Kepala Bidang SMP Dinas Pendidikan Kota Bandung. [MS]***
