Ngaliwatan Péntas seni Siswa-Siswi SMP Negeri 51 anu Ka-Dalapan Geusan Ngamumulé Budaya Nyunda Di Lingkungan Sakola
Drs. Agus Hidayat, M.Pd, Kepala SMPN 51 Kota Bandung nuju nambi kembang
Sobat Sora, poé Rebo anu ka liwat ping 25 Mei 2016 SMP Negeri 51 Kota Bandung ngayakan pentas seni, kreasi siswa-siswi. Sabréhan ogé jug katangén, yén para peserta didik di ieu sakola kacida kréatifna dina widang seni lukis. Ampir di sakuliah témbok sakolana, leubeut ku lukisan kaasup rohang muka. Utamana lukisan gaya mural, lukisan bidang datar dua diménsi anu nyarupaan rélief, bédana rélief mah timbul. Sakabéhna ieu berkat kaparigelan Waka. Kesiswaan, Drs. Muhammad Muhtar, M.Ds (dipicongah sesebutan ku Pa Muhtar). Anjeunna pisan anu ngabina tur ngaarahkeun siswa-siswi SMP Negeri 51 Kota Bandung dina widang seni lukis.
Guru-guru SMPN 51 Kota Bandung
Matak hélok tur matak reueus, tampilan seni peserta didikna éstu luar biasa. Kayaning musikalisasi puisi jeung seni teater ditambah bobodoran. Tampilan sakabéh kréasi siswa-siswi dipungkas ku pidangan béntang tamu wayang golék gaul ti LS Putu Giri Harja, diluluguan ku Ki Dalang Dédé Candra Nur Sunarya ti Jelekong.
Pintonan akustik
Dina sela-sela kasibukanana, Sora nepungan Drs. Agus Hidayat, M.Pd salaku kepala SMP Negeri 51 Kota Bandung angkatan ka 10 ayeuna, anu dina waktu harita diréncangan ku pengawas-na, Bapa Drs. H. Dodi Rohmat, M.M.Pd nu nganjrek di wewengkon Ujungberung. Kamandang Drs. Agus kana pénsi siswa-siswina antara lain pihak sakola geusan neruskeun program-program kepala sekolah saméméhna turta kacida ngarojong tur nyayagakeun fasilitas salaluasa-laluasana geusan para siswa-siswi anu diasuhna saméméhna ngamalirkeun bakat seni anu dipibandana.
Uleman nu ngaluuhan acara pénsi
Sawanda jeung kamandang Kepala Sekolah, Drs. H. Dodi Rohman, M.M.Pd, negrakkeun kateranganana, yén SMP Negeri 51 Kota Bandung geus maneuh dina saban ahir taun pangajaranana sok dipungkas ku péntas seni. Pénsi SMP Negeri 51 mémang luar biasa, di mana para guru, para peserta didik, para orang tua peserta didik katut umumna warga sakola ngahiji sabeungkeutan demi nyukséskeun ieu kagiatan. Insya Alloh kalawan gedé harepan, SMP Negeri 51 baris leuwih nanjung turta nanjeur di bawah kapamingpinan Drs. Agus Hidayat, M.Pd.
Sabada minton dipoto sareng walikelasna
Drs. Agus Hidayat, M.Pd kalawan dipairan ku Kepala TU-na, Bapa Untung Santoso, ahir-ahir ieu kacida reueusna lantaran SMP Negeri 51 kasinugerahan juara II tingkat propinsi dina Liga Pelajar Indonesia (LPI) widang sépak bola. Teu anéh sabenerna mah lantaran SMP Negeri 51 téh kakoncara ti baheula mula sabagé kudangna para pesépak bola muda.
Pa Nanang, Kepala SMPN 51 & SMPN 11 Kota Bandung manten, nyumbang sora emasna
Dina kasempetan pénsi ieu, hadir para mantan kepala SMP Negeri 5, di antarana Pa Nanang sareng Pa Dikdik, tokoh masarakat tur ka sakabéh warga sakola. Pidangan pénsi dibuka ku upacara adat Sunda diteruskeun ku tari modéren jeung tradisional, vocal grup, bobodoran, dramatisasi puisi, jaipong dance & kécak (tari kréasi Rama & Shinta), drama, silat jaipong, kabarét, perkusi, dance (Gangster VS FBI), akustik & perkusi, band gabungan 5 kelas, dipungkas ku pidangan wayang golék gaul dina judul Cépot Ngeband.
Drs. Agus Hidayat, M.Pd, Kepala SMPN 51 Kota Bandung
Drs. H. Dodi Rohman, M.M.Pd, pengawas SMPN 51 Kota Bandung
Drs. Muhammad Muhtar, M.Ds, Waka. Kesiswaan
Hj. Tuti Sudiarti, M.Ds
Pa Untung, Kepala TU
Geura urang ngobrol sareng Pa Muhtar (Waka. Kesiswaan), “Ku lumangsungna pénsi taun ieu, dipiharep barudak (hususna para peserta didik SMPN 51) mampuh ngajungjungkeun ajén-inajén kréasi dina widang seni budaya tradisional, hususna Sunda. Umumna mah ngajungjung seni budaya séjén kalawan henteu ngaluli-luli norma jeung étika anu luyu reujeung kultur budaya Indonésia. Berekah deuih, pihak sakola jeung umumna warga masyarakat kacida ngarojongna kana ieu kagiatan. Dina taun ieu téma pénsi leuwih nekenkeun kana budaya tradisional hususna budaya Sunda, kalawan dibina langsung ku guru tari-na, Ibu Hj. Tuti Sudiarti, S.Pd. Alatan éta acara inti (béntang tamu) dipungkas ku pidangan wayang golék ti Putu Giri Harja, minangka ciri wanci kasundaan. Luyu pisan jeung misi SMP Negeri 51 geusan ngawujudkeun sakola pinunjul dina widang akademisi seni jeung olah raga,” saur pa Muhtar. Upama taun kamari nyandak téma naon? Sora ngolongan. “Kamari mah ngangkat budaya bobodoran jeung sisingaan,” walonna deui, daria pisan.
Acara pensina ditonton lu adi kelas
Sora ogé teu poho kenalan jeung wawakil peserta didik kelas IX-1, Sipa Nursolihah, Arman Dakka, Hafidza Ravi, Kinanti. Ieu opat nonoman téh, wedalan sanggar Sekar Panggung jeung paguron Sanakala, nu ngajadikeun Didi Nini Towok salaku tokoh insfiratifna negrakkeun kareueus turta pangabetahna jadi warga SMP Negeri 51. Pesenna, mugia SMP Negeri 51 leuwih berpréstasi sarta mampuh mertahankeunana. Nu kurang hadé, bisa jadi hadé, nu hadé jadi tambah hadé.
Pintonan drama Sunda
OSIS SMPN 51 Kota Bandung dipoto sareng guru
Iis Holisoh, Ketua OSIS SMPN 51 Kota Bandung
Sora teu kaliwat nepungan ketua OSIS priode 2016-2017 sakaligus ketua panitia pénsi anu ngabawah 93 urang panitia pénsi taun 2016, Iis Holisoh kelas VIII, pituin warga Derwati. “Kanggo pidangan pénsi taun ayeuna, katawis langkung euyeub sareng langkung gebyar disbanding taun-taun anu parantos kalangkung. Kanggo salajengna, diharepkeun kagiatan pénsi wajib aya sarta langkung apresiatif, langkung kréatif utamina dina budaya tradisional,” kitu cék Iis. [MS]***
