Dra. Sringatun, M.Pd, Kepala SMPN 31 Kota Bandung & Pa Enjang Mulyana, Camat Batununggal, basa ngabagéakeun girang pangajén Lomba Sekolah Séhat tingat Kota Bandung
Poé Senén ping 23 Méi 2016, Sora ngalanglang ka SMPN 31 anu perenahna di Jalan Binongjati Nomer 139 Bandung. Bada lohor, luyu jeung rarancang anu geus ditataharkeun ti saméméhna, para peserta didik katut ka warga SMPN 31 midangkeun kreasi seni sacara kolosal dina wanda tari tempurung jeung sisingaan. Hal ieu dilakukeun geusan mapag tur ngabagéakeun rombongan tim juri sekolah sehat. SMPN 31 téh, di antara sakola di kota Bandung anu katotol salaku patandang (peserta) sekolah séhat. Dina hal ieu utamana widang UKS anu nyoko dina tilu poin, pendidikan kaséhatan, pelayanan kaséhatan jeung lingkungan sekolah séhat.
Tim penilai Lomba Sekolah Sehat, (calik di tengah)
Saréngséna tampilan seni tradisional diteruskeun pangbagéa resmi di salasahiji rohang sakola. Matak reueus pisan lantaran dina ieu kagiatan pangbagéa, dipimgpin langsung ku peserta didik sabagé panata acarana, nyakitu anu ngadadarkeun profil sakolana sarta anu ngagalindengkeun ayat suci Al-quranna. Matak kayungyunna, tiluan panata acara ngagunakeun tilu basa, Basa Sunda, Basa Indonésia jeung Basa Inggris. Kagiatan girang pangajén (tim juri) diteruskeun ku peniléyan di lapangan kalawan dipandu langsung ku kepala SMPN 31 anu tilu mingguan karék mancén, Dra. Sringatun, M.Pd.
Pintonan Tari Tempurung
Pintonan Tari Sisingaan
Ieu kagiatan dirojong turta diluuhan ku baragem élémén masarakat katut ka tokoh-tokohna, Camat Batununggal, Kapolsek Batununggal, Lurah Binong, Koramil, ti Depag, ti puskesmas, ibu-ibu PKK, Karang Taruna, warga sakola jeung warga masarakat satempat.
Siswa SMPN 31 Kota Bandung nuju mresentasikeun kagiatan miara lingkungan tur kaséhatan di sakolana
Tim penilai Sekolah Sehat basa meunteun rohang UKS SMPN 31 Kota Bandung
Tim penilai
Sora nepungan Dra. Sringatun, M.Pd dina sela-sela kasibukanana. Kumaha tatahar anjeunna dina persiapan mayunan kadatangan rombongan tim juri (juru tiléy). Saur Bu Sri nu harita dipairan ku Tim Panitia Pelaksana UKS, Bu Iin Karyati, M.Pd (guru Basa Inggris), Bu Yurianti, S.Pd, Wakasek kesiswaan anu mancén ketua panitia pelaksana adiwiyata menuju adiwiyata mandiri, Dra. Hj. Yayah Suhayah, M.Pd turta Bapa Iwan Gunawan, S.Pd. Tataharna téh relatif gerak cepet jeung serentak, salaku pupuhu, Dra. Sri kukurilingan langsung sarta pokus kana posisi titik rumit sakuliah wewengkon sakola teu kaliwat ngalanglangan ka jeroeun saban rohangan kelas.
Dina lomba sekolah sehat kasabit, tiap rohang kelas mibanda kriteria kaséhatan séwang-séwangan. Contona baé ukuran standar ti jajaran bangku hareup kana papan tulis (bor) sakurang-kurangna 190 CM atawa kana dua méteran. Sayaga bak sampah, tempat cuci tangan jeung kabiasaan pola hidup bersih 1500 warga SMPN 31 Bandung sarta perawatan sarana prasarana anu luyu jeung kriteria UKS. Sedengkeun lega zona sakola idéalna numutkeun tim juri kudu 3 km2 ka sakurilingeunana.
SMPN 31 Kota Bandung, dideudeul ku para inohong sangkan jadi pinunjul Sekolah Sehat tingkat Kota Bandung, di antarana:
Pa Enjang Mulyana, Camat Batununggal
Iptu. Jayasman, Kapolsek Batununggal
Drs. Agus iskandar, Lurah Binong
Harepan Dra. Sri saparakanca, geusan ngawujudkeun sakola anu dipingpinna (SMPN 31 Bandung) jadi juara 1 dina taun ieu (2016) minangka ronjatan ti taun kamari anu nyangking penghargaan salaku sekolah séhat juara II, sa-Kota Bandung. SMPN 31 ogé keur tatahar dina raraga ngahangkeutkeun program adiwiyata mandiri sanggeus suksés nyangking adiwiyata nasional taun 2014 jeung nyangking perhargaan dua mentri juara 1 adiwiyata tingkat kota jeung propinsi. [MS]***
