majalahsora.com – Kurang leuwih aya 748 Kepala Sekolah SMA jeung SMK nu dikukuhkeun ku Gubernur Jawa Barat, sabada alih kelola ka propinsi. Lumangsung poé salasa, tanggal 14 Pébruari 2017. Tempatna di Balé Asri Pusdai, Kota Bandung.
Méméhna aya opat urang kepala sekolah nu disumpah jabatan ku Pa Ahmad Héryawan. Di antarana Dr. Hj. Yeni Gantini, M.Pd. Kepala SMAN 20 Kota Bandung, nu ngawakilan 748 urang kepala sekolah SMA/SMK.
Dina sambutanana Pa Ahmad Héryawan ngécéskeun pentingna peran guru dina ngamajukeun dunya atikan. “Majuna hiji nagara téh gumantung tina peran serta para guru nu hadé. Ku kituna atikan nu hadé moal mungkin kahontal, lamun euweuh guru nu hadé,” pokna.
Di sagigireun éta anjeunna gé ngadongéngkeun kumaha ancurna Jepang sabada Hiroshima jeung Nagasaki dibom atom ku Amérika, basa perang dunya ka-II. “Pangeran Hirohito, salaku Kaisar Jepang, harita pingsan mangsa ngadangu Kota Nagasaki jeung Hiroshima ancur dibom atom. Sabada sadar, nu mimiti kedal ucapna téh, nanyakeun jumlah guru nu nyésa,” saur Pa Ahmad Héryawan.
Garis badag tina éta caritaan téh, aya pesan nu kacida luhungna, yén peran guru téh sakitu pentingna, utamana keur ngamajukeun peradaban hiji nagara jeung bangsa.
Dumasar hal kasabit Pa Ahmad Héryawan umajak ka para kepala sekolah nu kakara dikukuhkeun, sangkan ngamajukeun dunya atikan, hususna di Propinsi Jawa Barat.
Kagiatanana diluuhan ku Sekda Jawa Barat, Bapa Iwa Karniwa, Bunda Literasi Jawa Barat, Ibu Netty Héryawan, Kepala Dinas Pendidikan Jawa Barat, Dr. Ir. H. Ahmad Hadadi, M.Si, sarta para pingpinan OPD ti Propinsi Jawa Barat. [MS]***
