Bapa Udin Saéhudin, S.Pd, M.Pd Kepala SMAN 13 Kota Bandung & garwana
Samangsa Sora ngalanglang ka SMAN 13 Bandung, anu perenahna di Jalan Cibeureum No. 52, harita keur meujeuhna haneuteun pisan. Horéng keur prosési pelepasan (paturay tineung) kelas XII anu geus lulus dina UN. Acara lulusan wisuda angkatan ka 38 kasabit, dipitembeyan ku sapasang nonoman kéwes nu dibungkus busana has Pasundan. Duanana sungkem kana lahunan Kepala sekolahna, Bapa Udin Saéhudin, S.Pd, M.Pd sareng ka waka humas, Dra. Tuti Hérawati. Sapasang léngsér pikayungyuneun taralang-torolong sigep dina wangun pangbagéa. Waditra degung ti para siswa/i SMAN 13 ngengkeung ngalengkepan khidmatna suasana.
Drs. Hari Wibisono, Wakasek. Kesiswaan
Suasana kelar nambah lengkep marengan antayan para peserta didik dikalungan pertanda wisuda. 271 siswa-siswi karasep jeung gareulis maju saurang-saurang sanggeus saméméhna Bapa kepala sekolah saparakanca nyérénkeun layang pangajén (penghargaan) ka sababaraha siswa-siswi anu nyongcolang dina préstasi ujianana. Karasa waas sumarimpang ka jauhna ka mangsa lawas dumelingna kahirupan rumaja. Rampak sekar anu ngagalindengkeun lagu pujian jeung ucap nuhun ka guru, lir ngembratkeun wawangi asri nu mayungan buruan sakola.
Dra. Tuti Hérawati, Wakasek. Humas
Acara beuki ceuyah ku keprok jeung suit nu haladir, sanggeus grup angklung midang pikareueuseun. Di antara tembangna “Sepanjang Jalan Kenangan” puguh ngalilirkeun panineungan. Dileleban ku vocal grup, di antarana kaul salasurang guru, ngagalindengkeun lagu Nostalgia di SMA, nu kungsi dipopulérkeun ku artis Paramhita Rusadi kira taun 1990-an. Disambung ku seni islami nasyid SMAN 13 anu teu éléh sieup jeung pikaresepeun. Téma acara ngajeblag dina baligo latar panggung péntas, nyatana Star Shining Today, béntang maneuh nyuminar keur poé ieu jeung saterusna.
Sanggeus jeda sababaraha menit, acara disambung ku pemutaran filem pendek, hasil kamotékaran siswa-siswi SMAN 13. Eusina mungguh matak ngahudang panineungan lantaran muter prolog lalampahan tilu taun ka tukang. Suka-duka, salila para peserta didik gumulung sadulur sabaraya di imah kadua saréréa, nyatana rumah besar SMAN 13, nu barétona kawentar jawara baskét. Anu haladir ti réngréngan siswa-siswi, para guru, para orang tua siswa katut ondangan kagugu ngilu aub keprok sugema.
Dina sela-sela acara, Sora nepungan wakasek kesiswaan Drs. Hari Wibisono. Kumaha aprésiasina kana kaparigelan anak didikna dina ngareuah-reuah kagiatan pelepasan kasebut. Drs. Hari anu ogé dipairan ku Dra. Tuti Hérawati ngacungkeun jempol, saurna reueus turta matak kagagas. Taun-taun kamari mah, mun aya acara samodél kieu téh sok ngaagéndakeun di luar sakola, saperti di Hotél Horison. Kumaha atuh agénda ka payunna, naha badé di hotél deui atanapi maneuh di aréa sakola? Cék Sora ngolongan. “Rupina kumaha situasi sareng kondisi baé,” Drs. Héri nu mimiti mancén ngajar di SMAN 13 ti taun 1991 nambalang bari gumujeung.
Numutkeun anjeunna, lulusan SMAN 13 taun ieu (2015/2016) jumlahna 271 siswa/i, 161 peserta didik IPA, 110 peserta didik IPS. Nu geus katampa ku perguruan tinggi jumlahna aya 18 urang, ka ITB dua siswa, ka IPB dua siswa, ka UNPAD tilu siswa, ka UPI genep siswa, ka UNILA (Lampung) dua siswa, Poltikes dua siswa jeung ka Unijoyo Madura, saurang siswa. Dina UN taun ieu, niléy pangluhurna 473,5 atas nama siswi Syafa Salsabila kelas IPA, 440,5 atas nama siswi Salma Agastia kelas IPS.
Lulusan SMAN 13 dina taun ieu (2016) ampir 100 peresén nuluykeun ka perguruan tinggi, 30 peresén ka negeri, sasésana ka perguruan tinggi swasta. Kumaha support-na ka para peserta didik hususna kelas XII, nu lulus taun ayeuna, mangsa mayunan ujian, tur ngaronjatkeun lulusanana? Drs. Héri nu lahir ti keluarga tentara getap nerangkeun, “para guru salawasna ngarojong ku cara pemantapan bimbel supaya pokus kana diajar. Sacara spiritualna digederkeun doa berjamaah. Anjeunna meupeujeuhan sangkan para siswa anu haneut lulus ujian pokus kana tatahar nyinghareupan perguruan tinggi. Omat ulah ngaheulakeun hura-hura teu puguh laku. Keur wacana ka hareupna, pihak sakola baris nyieun watesan dina ngagunakeun hapé dina sapanjang kagiatan belajar-mengajar. Tambahna deui, baris dieuyeuban ésktrakurikulér utamana dina widang seni tradisional.”
Sora ogé mentingkeun ménta kamandang ti wawakil peserta didik anu haneut kénéh diwisuda kalulusan, Annas jeung Réza kelas XII MIA I. Kumaha acara pelaksanaan pelepasan wisudawan taun ieu?
Pa Oteng (dikopeah) Guru Basa Sunda & Ngasuh rubrik aksara Sunda di Majalah Sora
“Seru pisan, bagja sakaligus sedih ku margi badé papisah sareng guru sareng réréncangan anu sagulung sagalang dina suka duka,” cék ieu dua nonoman kasép, anu ngarencanakeun rék neruskeun kuliah di UI jeung di STAN Jakarta. “Pesen ka pihak sakola, supaya di taun-taun anu bakal datang ngaronjat sagala rupana utamana widang sarana jeung prasarana-na. Ogé ka para adi kelas supaya leuwih ningkatkeun volume diaja,r geusan nyinghareupan UN lantaran UN téh nangtukeun pisan kana kalulusan,” cék Adi jeung Réza deui.
Adi & Reza
Pamungkas, Sora nepangan Bapa kepala, Udin Saéhudin, S.Pd, M.Pd, “harepanana ka lulusan angkatan 2015-2016, sing jaradi para peserta didik anu saroléh soléhat di jero jeung di luar sakola. Saterusna sing leuwih ningkat jumlah anu mampuh nembus ka perguruan tinggi, boh jalur undangan boh jalur seléksi. Saterusna sing mangpaat élmu pangaweruh jeung katerampilanana boh di tempat gawé boh di tengah-tengah masyarakatna, utamana sing barisa ngajaga sikep anu hadé geusan picontoeun papadaning manusa.” [MS]***
