majalahsora.com – Pelepasan siswa kelas XII SMKN 9 Kota Bandung taun 2017, lumangsung gebyar. Dilaksanakeun poé Salasa 9 Méi 2017, ti pukul 10.00 nepi ka pasosoré. Tempatna di Hotel Grandia nu pernahna di Jalan Cihampelas.
Diiluan ku 447 urang siswa lulusan taun 2017, jolna ti dalapan kompetensi keahlian nya éta DKV, Tata Boga, Patiserie, Busana, Akomodasi Perhotelan, Usaha Perjalan Wisata, Tata Rambut jeung Tata kulit. Katempo karasép jeung gareulis, nu awéwé dibarung kabaya nu lalakina téu éléh ginding maraké jas.
Kagiatanana dikokolakeun ku para siswa kasabit, ditatahar ti anggangna mula. Kitu ogé ngeunaan waragadna, sakola mah teu ulubiung, nyaho bérés wé. “Persiapanana ti sasih Nopémbér mula. Seueur luka-likuna. Ieu mah sanés kanggo gagayaan, hasil réréongan tur badami para siswa kelas XII, ambéh berkesan,” cék Dimas, ketua pelaksanana.
Pa Endang, Guru SMKN 9 Bandung
Nu ngaluuhan kagiatanana, aya guru, orang tua siswa teu tinggaleun ketua komite sakolana. Drs. Ontahari Kepala SMKN 9 Kota Bandung gé sumping, ngan teu lami alatan nuju kirang séhat. Runtuyan acarana aya léngsér, angklung, vocal grup, band, talk show tur award-awardan atawa layang pangajén keur guru favorit, siswa favorit, jrrd.
Majalah Sora gé hasil ngolongan salah sahiji guruna nya éta Pa Endang Rasyid, S.Pd., M.M.Pd., pangna ngeunaan siswa kelas XII nu geus lulus ti SMKN 9 Kota Bandung, anjeunna nétélakeun siswa SMKN 9, 100 % lulus, miharep, sabada lulus langsung didamel atanapi muka usaha. Luyu jeung misi SMK nya éta nyiptakeun lulusan nu siap digawé jeung muka usaha, sanajan kitu teu, ngalarang lamun aya nu neruskeun sakola ka perguruan tinggi.
Hanifah (katuhu)
Siska (kénca)
Dimas, ketua pelaksanana
Di sagigireun éta, Majalah Sora gé hasil ngawawancara lulusanana di antarana Hanifah ti kompetensi keahlian tata boga jeung Siska akomodasi perhotélan. “Berkesan pisan sakola di SMKN 9 Kota Bandung téh. Mudah-mudahan sakolana mingkin majeng,” cék maranéhna téh, bari dihaminan ku Dimas sangkan SMKN 9 Kota Bandung kudu leuwih ngaakomodir kreativitas siswana. [MS]***
