Dra. Mia Rahmiati Ratnasari, M.M.Pd., Kepala SMPN 33 Kota Bandung
majalahsora.com – SMPN 33 Kota Bandung, nu dipupuhuan ku Dra. Mia Rahmiati Ratnasari, M.M.Pd, dina taun 2017 ayeuna baris mitembeyan ngalaksanakeun UNBK (Ujian Nasional Berbasis Komputer). Tempat jeung fasilitasna ngilu di SMAN 18 Kota Bandung. Alatan can bisa minuhan fasilitas komputer jeung jaringan internetna. Sabalikna di SMAN 18 Kota Bandung mah komputer jeung jaringan komputerna téh geus memenuhi syarat.
Ibu Elis Rahmawati, S.Pd., Waka Kurikulum, guru matematika SMPN 33 Kota Bandung
Kurang leuwih aya 289 siswa kelas IX nu baris ngiluan UNBK-na téh. Sangkan siswana leuwih apal kana prak-prakan UNBK, ti anggangna pihak sakola remen nyosialisasikeun ngeunaan UNBK, nu ditepikeun ku walikelasna masing-masing, mangsa diajar di jero kelas.
Pa Ludi Kurniawan, M.M.Pd., proktor UNBK ti SMPN 33 Kota Bandung
Salian ti nyosialisasikeun ngeunaan UNBK, pihak sakola gé keur ihtiar nyiapkeun mental siswana sangkan teu down mangsa nyanghareupan UNBK nu saenyana. Salah sahij carana téh, méré jam tambahan pelajaran, hususna keur mata pelajaran matematika. Geus dilaksanakeun ti awal semester genap kamari. Jam tambahanana diasupkeun kana kagiatan KBM (Kagiatan Belajar Mengajar).
Pa Soni, nu janten teknisi ti SMPN 33 Kota Bandung dina kagiatan UNBK taun 2017
Pihak sakola gé dina tanggal 27 Pébruari nepi ka 28 Pébruari 2017, baris ngalaksanakeun simulasi UNBK nu kahiji. Rencanana kagiatanana dibagi tilu pluh, tempatna di SMAN 18 Kota Bandung. Target tina simulasi kahiji téh, miharep siswana leuwih apal dina ngeusian username, password, sarta konten-konten nu aya dina UNBK.
Pa Maman Rohman, S.Pd., Waka Humas, salah sahiji guru matematika SMPN 33 Kota Bandung
“Alhamdulillah SMPN 33 Kota Bandung, siap ngalaksanakeun UNBK. Sanaos sakola nu aya di pasisian, sanés hartosna sakola téh tinggaleun, utamana dina kamajuan téknologi. Ku kituna sim kuring salaku kepala sekolah, ngadukung pisan ieu kagiatan. Pangpangna mah dina ngudukung Bandung Smart City,” kitu saur Bu Mia téh.
Siswa SMPN 33 Kota Bandung
Siswa SMPN 33 Kota Bandung, sabenerna mah geus diwanohkeun kana kagiatan ujian digital. Kungsi sababaraha waktu nu kaliwat siswana ulangan dalam jaringan, ngaliwatan hapé android. Saeutikna mah siswa téh geus kanyaho, kumaha ujian sacara online téh.
Suasana diajar di SMPN 33 Kota Bandung
“Sim kuring gé séja ngahaturkeun sewu nuhun ka Kepala SMAN 18 Kota Bandung, nya éta Drs. Iwan Setiawan, nu parantos ngabantos SMPN 33 Kota Bandung dina persiapan sareng mayunan UNBK taun 2017. Salaku kepala sekolah, anjeunna teu ngahésé-hésé. Harita langsung dihiap tur nawis MoU-na. Insya Alloh mudah-mudahan atuh tahun payun mah SMPN 33 Kota Bandung tiasa mandiri ngalaksanakeun UNBK,” saur Bu Mia nyawang harepan.
Ku kituna patalina jeung sarana prasarana UNBK, SMPN 33 Kota BANDUNG, miharep bantuan ti pamaréntah, boh pamaréntah pusat, kota, jeung Dinas Pendidikan Kota Bandung, sangkan bisa mihuhan jumlah komputer, jaringan internét jeung SDM-na. [MS]***
