Dr. Asep Tapip, M.Pd., Kepala SMKN 4 Kota Bandung
majalahsora.com – Basa poé Senén 12 Juni 2017, Majalah Sora ngadongdon ka SMKN 4 Kota Bandung, nu pernahna di Jalan Kliningan No. 6, Kelurahan Turangga, Kecamatan Léngkong. Di sakola nu dipingpin ku Dr. Asép Tapip téh, Majalah Sora nempo proses tur kagiatan PPDB jalur non akademik. Tempat pendaftaranana lumangsung di dua kelas, kuloneun lapang ieu sakola. Di buka ti ping 6 Juni nepi ka 14 Juni 2017, ti pukul 08.00 nepi ka pukul 14.00.
Cara daftarna maké sistem off line, nya éta sepuh siswa nu baris ngadaftarkeun palaputrana kudu datang langsung ka SMKN 4 Kota Bandung. Sakalian mikeun syarat-syarat pendaftaranana. Dina pendaftaran jalur non akademik téh maké dua jalur, nya éta jalur teu mampu jeung jalur préstasi non akademik. Nu daftarna bisa milih dua pakét keahlian. Ngan taun ayeuna mah bébas milihna téh teu kudu linier. Upamana pilihan kahiji ka program keahlian téknis pilihan ka duana bisa milih, pariwisata, ekonomi, seni, jsté, kitu ogé sabalikna.
Syarat PPDB keur jalur teu mampu, nya éta kudu masrahkeun dokumen kayaning; surat katerangan teu mampu ti kelurahan/desa, poto copy ijazah sarta SKHUN nu geus dilegaliris (pikeun lulusan taun 2016-2017), poto copy akta kelahiran, jsté. Sedengkeun keur nu jalur préstasi, ampir luyu jeung jalur teu mampu, ngan teu maké surat keterangan tidak mampu. Katambah kudu masrahkeun sertifikat asli kajuaraan nu hasil dihontalna.
Engké dokumen nu geus asup téh diverifikasi deui ku panitia PPDB SMKN 4 Kota Bandung. Laju di entri, ti dinya direkap tuluy dikirimkeun ka sistem PPDB online SMK Propinsi Jawa Barat. Hasil katarima henteuna mah, baris diumumkeun tanggal 16 Juni 2017.
Nepi ka poé Senén, ping 12 Juni 2017, nu daftar ka SMKN 4 Bandung ngaliwatan jalur kasabit téh jumlahna geus aya 403 urang, ngawengku SKTM/teu mampu 357 urang, préstasi 30 urang sarta jalur undang-undang nu kuotana asup kana jalur SKTM, nya éta 16 urang.
Dina taun ajaran 2017-2018 nu bakal datang, SMKN 4 Kota Bandung baris nampa 468 siswa. Nu di wadahan digenep paket keahlian; Multimedia, 1 kelas, Rekayasa Perangkat Lunak, 3 kelas, Audio Video, 4 kelas, Teknik Instalasi Tenaga Listrik, 2 kelas, Teknik Komputer Jaringan, 1 kelas sarta Teknik Otomasi Instalasi, 2 kelas. Masing-masing kelas ngawadahan 36 siswa.
“Alhamdulillah kagiatan PPDB di SMKN 4 Kota Bandung lungsur langsar. Taya hal nu prinsip, da teu benten tebih sarung taun kapengker. Miharep ka nu daptar ka SMKN 4 Kota Bandung téh, jaga kedah tiasa nampi sagala halna. Alatan sadayana tos ku sistem, sakola mah teu aya kawenangan kanggo nampi siswa sacara kitu baé. Sadayana ngalagkungan prosedur. Pokona mah ajeg kana aturan nu lumaku,” saur Dr. Asép Tapip, Kepala SMKN 4 Kota Bandung téh.
Ieu yeuh jumlah nu baris ditarima ngaliwatan jalur non akademik téh, paket keahlian Multimedia, préstasi 4 urang SKTM 7 urang, RPL, préstasi 12 urang, SKTM 21 urang, Audio Video, préstasi 14 urang, SKTM 28 urang, Teknik Instalsi Tenaga Listrik, préstasi 8 urang, SKTM 14 urang, TKJ, préstasi 4 urang, SKTM 7 urang, sarta Teknik Otomsi Instalasi, préstasi 8 urng, SKTM 14 urang. [MS]***
