Sobat Sora, poé Saptu 21 Méi 2016, SMAN 12 Kota Bandung keur haneuteun ku kagiatan paturay tineung tur ngawisuda peserta didik kelas XII. Acara dimimitian ku pangajian ayat suci Al-quran disambung ku upacara adat sungkeman pasangan Fébrian jeung Cindy (ngawakilan 335 wisudawan-wisudawati) ka kepala sekolah disambung péntas seni siswa-siswi kelas X-XI. 335 jumlah kalulusan ieu ngawengku jurusan IPA, 109 urang siswa, 125 urang siswi. Jurusan IPS, 50 urang siswa, 51 urang siswi. Numutkeun wakasek kesiswaan, Bapa Drs. Agus Nuryana, tatahar ieu kagiatan relatif singkat ukur butuh waktu dua minggu tepi ka derna. Kalawan nyokot téma “Riung Mungpulung Dina Raraga Ngajurung Murangkalih Kelas XII Taun Ajaran 2015/2016 Nu Badé Miang Nyiar Luang Pikahareupeun.”
Pa Deddy Chrisdiarto, Kepala SMAN 12 Bandung manten (ayeuna Kepala SMAN 2 Kota Bandung) , dina kagiatan sungkeman wisudawan terbaik
Drs. Agus, linggih di GBA, mancén ngajar di SMAN 12 ti ping 12 Séptémber 1995. Saméméhna ngajar di GPK SMA Patria (Maret 1990). Kagiatan maneuh kasabit nembé digebyarkeun deui ngadua kalian ayeuna sanggeus ngalaman pakeum heula. Kasang tukangna, alatan kudu nyurupkeun program pamaréntah dina nanjeurkeun budaya kasundaan, nya gebyar kagiatan paturay tineung téh nguliat deui. Harepan ka para peserta didik lulusan taun ieu (2015/2016) masing kukuh-pengkuh ngahontal cita-cita, ngupaya saoptimalna sarta engké hasilna pasrahkeun ka Nu Kawasa. Ogé naon rupa anu dipintonkeun dina wangun punjulna préstasi sing jadi inspirasi jeung motivasi dina kadisiplinan hirup kumbuh di masarakat.
Kamandang Wakasek kurikulum, Ibu Lina Kristamelina, M.Pd nambahkeun yén pelaksanaan prosési paturay tineung taun ieu leuwih disiplin turta leuwih épéktif. Diharepkeun dina taun-taun anu bakal datang bakal leuwih alus turta leuwih hidmat. Bu Lina anu mancén ngajar di SMAN 12 ti taun 1997 nerangkeun cenah peserta kelulusan taun ayeuna téh karék nampa SKHUN sementara, lantaran masih kénéh ngadago kaputusan ti dinas. Najan kitu anu katampa ka perguruan tinggi ngaliwatan jalur SNMPTN (ondangan) mah ngaronjat, tina 39 urang, ningkat jadi 58 urang peserta didik. Hartina tingkat kapercayaan perguruan tinggi leuwih nyugemakeun. Anu daptar ka UPI mesat ningkat, minangka favoritna, anu ka UNPAD rada morosot sedengkeun anu ka ITB mah teu béda jeung taun-taun saméméhna.
Pa Dédi Sugih Haryadi, S.Pd guru kimia sakaligus ketua pelaksana paturay tineung wisudawan 2015/2016
Drs. Agus, Wakasek Kesiswaan
Lengkepna, wisudawan-wisudawati SMAN 12 Kota Bandung anu ditarima di perguruan tinggi ngaliwatan SNMPTN, 38 urang di UPI, 12 urang di UNPAD, 6 urang di ITB, saurang di UIN SGD Bandung, jeung saurang di UNSIKA.
Harepan Bu Lina ka para wisudawan (peserta didik kelas XII) geusan leuwih loba anu nuluy kuliah. Sok sanajan tina jalur SNMPTN teu lolos, masih aya patéah tur cara séjén anu bisa nganteurkeun maranéhna kana bangku kuliah, jalur ujian tertulis contona. Dipairan ku Bapa Dédi Sugih Haryadi, S.Pd guru kimia sakaligus ketua pelaksana paturay tineung wisudawan 2015/2016, nétélakeun pangna téma kagiatan jejerna ngaonjoykeun kasundaan lantaran urang téh sélér Sunda, wajib nyirikeun manéh ku ajén-inajén kasundaan.
Ibu Lina Kristamelina, M.Pd, Wakasek Kurikulum
Sobat Sora, ayeuna urang ngobrol jeung béntang SMAN 12 Kota Bandung, Cindy jeung Fébrian. Cindy Margarétha kelas XII IPS 3. Katarima di UNPAD jurusan manajemén. Ieu mojang lenjang ti Jalan Sarijati II No. 12 nyangking niléy UN pangluhurna, 482,5. Cita-citana teu kapalang hayang jadi mentri keuangan. “Aya bungah, suka duka pacampur aduk tepi ka teu karasa ngaliwatan tilu taun perjuangan di SMAN 12 demi naratas cita-cita,” cék Cindy.
“Keur SMAN 12 anu dipikacinta, ulah ngarandeg geusan ngagedurkeun sumanget salaku sakola unggulan, cekel pageuh adiwiyata. Pertahankeun komara jeung ajén-inajén SMAN 12 sabagé sakola pangunggulna sakota Bandung malah teu nutup kamungkinan jagana mampuh “yang terbaik” sa-Indonésia. Keur para adi kelas, kelas X-XI terus berjuang lantaran taya perjuangan anu teu ngajangjikeun hasil (suksés). Di ieu SMAN 12 Bandung, sadaya guru favorit Cindy,” kitu cék Cindy deui, sumanget pisan.
Drs. Wawan Sugiwan, Wakasek Sarana & Prasarana
Bu Fafarina, M.Si. seksi acara kagiatan paturay tineung SMAN 12 Kota Bandung
Fébrian Déwantara kelas XII IPA 2, nyangking niléy UN pangunggulna 476,5. Ieu jajaka kasép urang Komplék Abdi Negara II ngajadikeun Bu Dédé Sukaédah, Bu Epon, Bu Euis jeung Pa Adé salaku guru-guru favoritna. Cita-citana sederhana, cenah hayang jadi insinyur pengawas proyék. Nu matak rék nuluykeun studina ka FTMD-ITB Bandung. “Aya mangsana naék, aya ogé mangsana turun malahan mungkin aya mangsa tibeubeut. Mungkin urang karék sadar kana naon anu disebut éling tina kapiuhan. Keur rékan-rékan jeung adi-adi anu acan kabiruyungan katampa di perguruan tinggi ngaliwatan jalur SNMPTN tong kudu leutik haté anggur hudang ngagederkeun sumanget. SNMPTN lain sagala-galana, terus ngadu’a jeung tong poho ménta du’ana ti indung bapa. Sumanget, lulus euy!” cék Febrian.
Sora ogé ngalanglangan para wisudawan-wisudawati anu keur balawiri di rohang poto-poto. Noélan maranéhna kumaha kamandang kana kagiatan ieu paturay tineung. Prilla Nuraulia, kelas XII IPS 3 ti Jalan Cinta Asih No. 269 Bandung. Muhammad Rudi, kelas XII IPS 3, Dante Eka. S, kelas XII MIPA 4. ”Di SMAN 12 leubeut ku carita cinta jeung cinta anu ngawarnaan dunya pendidikan salila tilu taun,”cék ieu para nonoman méh bareng. [MS]***
