Bu Eki Medianingsih, S.Pd., M.M., Kepala SDN 111 Pindad Kota Bandung ngarangkep janten Ketua Gugus 30
majalahsora.com – SDN 111 Pindad Kota Bandung kiwari kakurangan rohang kelas pikeun para muridna. Alatan jumlah rombel (rombongan belajar)-na teu kawadahan ku jumlah rohang kelas nu aya. Jumlah rombelna téh aya 18 sedengkeun jumlah kelasna ukur aya 7.
Bu Eki (tengah) Kepala SDN 111 Pindad Kota Bandung di poto sareng réngréngan Guru sakola kasabit
Ku Bu Eki Medianingsih, S.Pd., M.M., salaku Kepala Sekolah babarengan reujeung réngréngan guru SDN 111 Pindad Kota Bandung, ngupayakeun sangkan sakabéh muridna bisa diajar kalayan optimal mangsa kagiatan pembelajaran di sakola, nu pernahna di Jalan Papanggungan No. 1, Kelurahaan Sekéjati, Kecamatan Kiaracondong téh. Nya éta kucara ngabagi waktuna, pikeun kelas VI asup ti pukul 07.00 nepi ka pukul 12.00, kelas I asup ti pukul 07.00 nepi ka pukul 09.30, kelas II ti pukul 09.30 nepi ka pukul 12.00, kelas IV jeung V asup ti pukul 12.00 nepi ka 17.00, sedengkeun pikeun kelas III asupna di sela-sela kelas I, II jeung VI, sarta aya pembelajaran di luar kelas.
Kaayaan di kelas
“Mudah-mudahan aya perhatosan ti Pamaréntah Kota Bandung, ngalangkungan Dinas Pendidikan Kota Bandung, saenggalna tiasa diwangun rohang kelas anyar, minimal atuh tiasa tilu kelaseun heula. Alatan SDN 111 Pindad nempatan tanah TNI AD, mangka kedah aya serat ti Pangdam III Siliwangi, ku kituna sakola tos meredih ti sataun kapengker, sareng tos aya widi ti Panglima Kodam III Siliwangi, sangkan aya pangwangunan kelas anyar, kantun réalisasina, aamiin,” saur Bu Eki Medianingsih, Kepala Sekolahna, nu ngarangkep jadi Ketua Gugus 30.
Koléksi piala jeung pangajén
Kacatet ayeuna jumlah siswa nu nyuprih élmuna aya 589 urang, diaping ku 23 urang Guru. Sedengkeun padamel tata usahana aya 2, operator 3, caraka 2 jeung satpam saurang. Nilik fasilitas pisikna nya éta, aya 7 rohang kelas, lapang olahraga ngahiji jeung lapang upacara, UKS, mushola, ruang tata usaha ruang guru jeung rohang kepala sekolah ngahiji, wc siswa 5, wc guru 1, jsté.
Serat widi pangwangunan kelas anyar ti Pangdam III Siliwangi
Bu Eki nu kungsi jadi guru di SDN Nilem ti taun 2000-2012, sarta mingpin SDN Babakan Priangan 3 jeung 5 téh miharep sagancangna di SDN 111 Pindad bisa tinekanan ngawangun kelas anyar keur kamajuan atikan, sangkan Bandung Juara! [MS]***
