Pa Cécép Targana, S.Pd
Sobat Sora, urang kenalan yu sareng Pa Cécép Targana, S.Pd, padamel TU SMKN 7 Kota Bandung. Ngahaja ku Sora di wawancara di kantorna. Ngadadarkeun pangalaman anjeunna, basa munggaran ngalaksanakeun ibadah saum.
Pa Cécép, mitembeyan saum basa yuswa tujuh taun. Ku ibu ramana nya éta H. Ahmad Karnaén (alm) sareng Hj. Tuti Yamah, dipiwarang saum dugi ka tamat-na téh. Harita dibibita acuk lebaran dua setél, lamun tamat saumna.
“Ti yuswa tujuh taun bapa tos ngawitan saum. Alhamdulillah harita saumna dugi ka tamat. Emut wé bonusna dipasihan acuk lebaran. Ngagaleuhna di Pasar Cicadas. Basa éta (kira taun 70-an) ngagaleuh acuk téh ka pasar sanes ka mall sapertos ayeuna. Ti harita dugi ka ayeuna bapa pareng ngalaksanakeun saum dugi tamat, Alhamdulillah teu acan kantos bolong, sanaos dina kaayaan kumaha baé” saur Pa Cécép, carogé ti Ibu Heni sarta bapa ti dua putra, bari imut.
Makna saum saur Pa Cécép, nya éta keur nanjeurkeun kataqwaan, ngalatih diri tina nahan hawa nafsu. Pa Cécép nu asli Cisaranten kulon téh, tos didamel di SMKN 7 ti awit taun 1994. Anjeunna alumni ti SDN Cisaranten Kulon taun 1981, SMPN 17 Kota Bandung, taun 1984, SMAN Buah Batu (SMAN 25 Kota Bandung ayeuna mah), taun 1987, sarta S-1-na ti STKIP Cimahi, taun 2014. [MS]***
