Pa Maryana, S.Pd (kénca), Kepala TU SMPN 39 Kota Bandung, Pa Tahya sareng Bu Dewi
majalahsora.com – Sobat Sora, urang wawanohan yu! Sareng Pa Maryana, Kepala Tata Usaha SMPN 39 Kota Bandung, nu mancén tugas ti taun 2015 nepi ka ayeuna. Anjeunna kalebet pribadi nu basajan, béréhan, beresih haté tur soméah. Lamun Majalah Sora nganjang téh, tara disaha-saha, sok jadi batur diskusi. Kituna téh ti mangsa anjeunna dines di SMPN 36 Kota Bandung tur lain ka Majalah Sora baé. Tah lamun Sobat Sora hoyong apal carita singket anjeunna aos nepi ka tamat nya!
Pa Maryana lahir di Garut 1 Pebruari 1960. Bu Yaya Sarinah jenengan garwana téh. Kagungan putra tilu nya éta Yana Cahya Kusumah, S.Kom., Siva Oktavia Ningrum, S.E., sarta nu bungsu Rizki Pratama Ramadhan.
Mangsa sakola dasar, Pa Maryana sakola di SDN Siliwangi 2 Kota Garut, lulus taun 1972. Ti dinya laju neruskeun ka SMP Yos Sudarso Garut, réngsé taun 1975. Sabada lulus SMP, anjeunna reureuh heula.
Heuleut sababaraha taun, écésna taun 1979 Pa Maryana damel di PT. Bintang Agung, salah sahiji pabrik nu aya di lelewek Gedébagé, Kota Bandung. Kurang leuwih salila lima taun damel di éta tempatna téh. Selang dua taun Pa Maryana ngalih damel, katampi jadi petugas tata usaha di SMPN 36 Kota Bandung.
Alatan can lulus SMA, anjeunna ngiluan ujian persamaan SMA, basa taun 1989. Ari gelar sarjanana mah diraéh basa taun 2008, ti Uninus jurusan matematika.
Kurang leuwih 26 taun Pa Maryana damel di SMPN 36 Kota Bandung-na téh. Lamun nilik kana waktu mah lain waktu nu sakeudeung. Lumayan lila nya Sobat Sora! Karir anjeunna di éta sakola gé beuki ngajaul, basa taun 2012 diangkat janten Kepala TU SMPN 36, dugi ka taun 2015.
Mangsa jadi Kepala Tata Usaha, Pa Maryana, lain tipe jalma nu tukang utah étah, tapi méré conto langsung. Tara bauan deuih anjeunna mah. Mangsa anak buah/rekan kerjana keur riweuh atawa aya hahalang, anjeunna sok terus ngahandle pagawéanana. Prinsip anjeunna mah kudu nyaman mun gawé di mana baé téh.
Basa ku Majalah Sora dikolongan saha tokoh inspiratif sareng motto hidupna, anjeunna ngawaler BJ Habibie, Presiden Republik Indonésia nu ka tilu, ari mottona mah hirup mah kudu manfaat keur batur utamana diri urang sorangan. [MS]***
