Drs. H. Aa Sudaya, M.Pd., Kepala SMAN 1 Balééndah manten
Balééndah – Sobat Sora, dina tulisan ayeuna Majalah Sora ngaguar ngeunaan H. Aa Sudaya, M.Pd, Kepala SMAN 1 Balééndah nu awal Oktober 2016 ngalih tugas ka SMAN 1 Margahayu Kabupatén Bandung. Geus leuwih ti tujuh taun Pa Aa mingpin SMAN 1 Balééndah Kabupatén Bandung téh. Ku kituna geus loba jasa jeung tapakna.
Anjeunna kaasup Kepala Sekolah nu loba turuteunana, utamana dina hal kadisiplinan absensi, méméh guru datang ka sakola ajeunna mah geus miheulaan hadir, malah lamun waktuna mulang remen balik pang pandeurina. Salaku muslim anjeunna gé, kaasup nu taat ibadah, nyontoan sholat berjamaah di masjid.
SMAN 1 Balééndah
Salila Pa Aa mingpin SMAN 1 Balééndah, aya sababaraha aspék nu jadi cepengan anjeunna sangkan SMAN 1 Balééndah bisa basaing jeung sakola séjén boh di tingkat kabupatén, propinsi boh di tingkat nasional. Contona dina pangwangunan fisik, fasilitas sakola, ahlaq siswa-siswina, karakter, jrrd.
Dina pangwanguna pisik sakola, SMAN 1 Balééndah ayeuna mah geus 100 peresen diloténgkeun. Salian ti éta pangwanguan toilet siswa jeung guru gé geus terpenuhi. Laju nyieun resapan air sarta nyieun panampungan cai lamun keur hujan. Méméh aya penampungan, caina sering asup ka jero kelas. Pangwangunan lianna nya éta ngawangun rohang ekstrakurikuler, sarta nyieun galeri seni. Hancaeunana ayeuna mah keur ngaréngsékeun pangwangunan masjid anyar jeung kantin sakola.
Kaayaan sakola
“Alhamdulillah salami dipingpin ku Pa H. Aa seueur parobihanana. Anjeunna Kepala Sekolah nu visioner, seueur turuteunana. Disiplinna luar biasa, ucapan sareng prakprakanana tara tojaiyah. Matak kedah dicontoan ku guru, karyawan kalebet siswana. Ampir sadaya programna bajalan. Kamekaran SMAN 1 Balééndah mangsa dipingpin ku Pa H. Aa karaos pisan,” saur pa Egi Waka. Humas SMAN 1 Balééndah.
Keur ngaronjatkeun ahlaq sarta karakter siswana, ku Pa Aa diprogramkeun sangkan siswa SMAN 1 Balééndah méméh lulus kudu apal Qur’an juz 30. Keur sakola umum mah éta téh lain hal nu gampang. Teknikna mah dikelas sapuluh siswana kudu apal surah An naba, surat pangpanjangna di juz 30. Dina saminggu tilu kali ngapalkeunana téh, ti pukul 06.30 nepi ka pukul 07.00. Dikelas sabelas jeung duabelas mah ngapalkeunana saminggu sakali. Di kelas sabelas ngapalkeun suratna masih paranjang, kakara di kelas duabelas surat-surat nu parondok.
Kaayaan sakola
Préstasi siswa jeung guru di SMAN 1 Balééndah mangsa kapmingpinan Pa Aa gé kacida leubeutna. Salah sahiji siswa berpréstasina téh Sandi nu jadi juara karate, tingkat kabupatén, propinsi jeung nasional. Sandi nu geus jadi alumni, dina PON XIX Jabar 2016 hasil ngahontal medali emas. Tah guruna mah aya Bu Endah nu kungsi nyiar élmu ka Australia, anjeunna kungsi jadi juara lomba olimpiade guru tingkat Kabupatén Bandung. Salian Bu Endah ogé aya Pa Arif juara olimpiade guru olahraga tingkat propinsi.
Disagigireun éta, Pa Aa gé hasil ngaping guruna pikeun diseleksi jadi kepala sekolah jeung pengawas, nya éta aya Pa Opang nu janten Kepala SMAN 1 Bojongsoang, Bu Reni Kepala SMAN 1 Bumiasri nu ayeuna mingpin SMAN 1 Dayeuhkolot, tur Pa Edi nu jadi pengawas di Dinas Pendidikan dan Kebudayaan Kabupatén Bandung.
Keur ngaronjatkeun anjén kaislaman sarta nasionalismeu warga sakolana, ku Pa Aa harita sok ngalaksanakeun miéling hari besar Islam jeung nasional. Kayaning miéling Idul Qurban, di sakola maneuh sok aya kagiatan meuncit sato qurban, Septémber kamari meuncit 37 domba, sa-kelas hiji. Ti proses meuncit, nyerit, nimbang, jeung ngabagikeun ka warga dilakonan ku para siswana, ngahaja ambéh apal. Kitu ogé jeung peringatan hari besar nasional, sok direuah-reuah di sakola, saperti miéling Agustusan, di sakola aya kagiatan upacara sarta kagiatan nu gebyar.
Upacara Hardiknas taun 2016 di SMAN1 Balééndah. Diluuhan ku Bapa Dadang Naser Bupati Kab. Bandung
“Jiwa nasionalismeu Pa Aa mah kacida ageungna. Contona unggal dinten Senén pami teu aya pamengan sok hadir upacara bendéra. Komo upacara miéling HUT RI. Nu reueus mah dina Hari Pendidikan Nasional Méi kapengker janten tempat upacara sa-Kabupatén Bandung, Pa Dadang Nasér, Bupati Kabupatén Bandung nu janten pembina upacarana, éta téh hal nu nembéan di Kabupatén Bandung,” saur Pa Egi, dibarung ku reueus.
Salian ti hal diluhur, ku Pa Aa gé diipuk jiwa sosial siswa SMAN 1 Balééndah, nya éta ku cara paduli ka sasama utamana nu keur kamusibahan. Contona sababaraha waktu kaliwat mangsa musibah di Garut siswa SMAN 1 Balééndah teu tinggaleun méré bantuan. Malah babarengan jeung sakola séjénna di Kabupatén Bandung, saperti siswa ti SMAN 1 Soréang, Banjaran, jrrd, harita kakumpul sumbangan mangrupa dahareun, baju lungsuran sarta duit nu réana Rp 27 juta. Sakabéh hal nu ditulis diluhur tangtu keur kamekaran tur tujuan nu positif.
Pa Egi, Bu Endah sareng Pa Dedi guru SMAN 1 Balééndah Kota Bandung
“Ku ngalih tugasna Pa A aka SMAN 1 Margahayu, bapa sareng warga SMAN 1 Balééndah rumaos kehilangan. Mugia tapak lacak Pa Aa salami mingpin SMAN 1 Balééndah tiasa dipertahankeun, malah dimekarkeun utamina diturutan. Pokona mah wilujeng ka Pa Aa, nuhun kana sagala kasaéanana,” saur Pa Egi, mungkas obrolan. [MS]***
