Drs. Karyono, M.Si., Sekrétaris Disdik Prop. Jabar, Dr. Cécép Damawan, S.Pd., S.IP sareng Pa Iwan Hérmawan
Soekarno Hatta – Sobat Sora, Juma’ah pasosoré (1 Juli 2016), di SMKN 9 Kota Bandung lumangsung kagiatan nu ngabahas ngeunaan moratorium (penundaan kewajiban pembayaran) SPP jeung DSP SMA/SMK di Kota Bandung, sakalian buka puasa bareng. Jejerna “Diskusi Menjelang Alih Kelola SMA/SMK ke Propinsi”. Ieu acara téh dikokolakeun ku FAGI (Forum Aksi Guru Indonésia) pingpinan Pa Iwan Hérmawan, guru SMAN 9 Kota Bandung.
Acarana diluuhan ku Kepala Sekolah SMA/SMK sa-Kota Bandung, ampir sadayana sumping. Salian ti éta aya ogé perwakilan guru, komite sekolah, jeung salian ti éta. Pembicarana Dr. H. Asép Hilman, Kepala Dinas Pendidikan Propinsi Jawa Barat, Drs. H. Elih Sudiapermana, M.Pd., Kepala Dinas Pendidikan sareng Dr. Cécép Damawan, S.Pd., S.IP.
Tina tilu narasumber nu diondang mung Pa Cécép, dosén pascasarjana UPI wungkul nu sumpingna téh. Kadisdik Propinsi di wakilan ku Drs. Karyono, M.Si., Sekrétaris Disdik Prop. Jabar. Samalah Pa Elih mah teu sumping tur teu aya wawakilna.
Ieu acara téh keur menjembatani masalah waragad sakola. Pa Elih salaku Kepala Disdik Kota Bandung, kungsi ngaluarkeun pernyataan yén taun ajaran 2016-2017, sakola téh salila genep bulan kudu moratorium/nunda mungut SPP jeung DSP. Alatan kitu dina ieu sawala baris néangan solusina. Tur teu matak bingung ka sakola, mangsa aya orang tua siswa nu mampu baris mayar jeung ridho mayar SPP sarta DSP.
Drs. Agus Setia Mulyadi,salaku kepala sekolah SMAN 9 Kota Bandung jeung Pa Cécép salaku praktisi, miharep bantuan ti sepuh montong di hése-hésé. Da salila ieu waragad pangabutuh sakola téh can terpenuhi kabéh. Iwal pamaréntah geus bisa nyukupanana, béda deui dongéngna. Tapi kanyataanana mah teu kitu, salila ieu bantuan ti pamarentah téh masih kurang. Nilik kana hal éta, perkara bantuan/partisipasi orang tua nu mampu kalayan gedé mangpaatna.
Pa Lukman gé salaku Kepala SMKN 12 Kota Bandung, ngadadarkeun yén pangabutuh di sakola nu dikokolakeunana salila ieu masih kakurangan waragad, sanajan siswana dipungut SPP jeung DSP, alatan teu kabéh siswa maneuh mayar unggal bulan. Komo lamun dimoratorium SPP jeung DSP-na. Jadi matak, kapereluan sakola jeung mayar pagawé honorér mingkin gejed.
Drs. Agus Setia Mulyadi, Kepala SMAN 9 Kota Bandung
Mun hayang geratis kabéh, pamaréntah kudu bisa nyukupan pangabutuh sakola, minimal keur SMA kudu disubsidi minimal Rp 4,6 juta/siswa/taun, keur SMK non téknik minimal Rp 5,55 juta/siswa/taun sarta keur SMK teknik minimal Rp. 6,6 juta/siswa/taun.
Pa Hasnol Hamzah, S.E., pengurus FAGI
Intina mah mun Sobat Sora mampu mah mending bantuan wé sakola hidep téh. Da mantuan sakola mah sarua jeung amal jariah, keur kamaslahatan balaréa. Béjakeun ka kolot hidep, da aya undang-undangna, nya éta PP 48 taun 2008, sakola téh salian ti tanggung jawab pamaréntah pusat, pamaréntah daérah ogé tanggung jawab masarakat dina harti orang tua siswa, jeung salian ti éta.
Dina dangka waktu nu teu lila, hasil sawala di luhur baris dilaporkeun ka Walikota Bandung jeung DPRD Kota Bandung, sangkan sagancangna aya kawijakan nu méla kana kawijakan sakola dina raraga mencerdaskan kahirupan anak bangsa, cag! [MS]***
