Kepala SDN Padasuka Mandiri 4 Kota Cimahi
Sobat Sora, sababaraha waktu nu kaliwat Majalah Sora nganjang ka SDN Padasuka Mandiri 4 Kota Cimahi. Pernahna di Jalan KH. Usman Dhomiri No. 190, Kelurahan Padasuka, Kecamatan Cimahi Tengah. Harita nepungan Pa Eddy S. S.Pd, M.Pd, salaku kepala sekolahna.
Kesan pertama ningal Pa Eddy téh, gaul pisan. Eta wé ningal dangdosan sareng selera berpakaianana, kekinian pokona mah. Lamun Sobat Sora tepang gé, moal nyangka lamun yuswa anjeunna téh tos badé nincak 60 taun. Tah dongéng singketna mah aos wé nya!
Pa Eddy lahir di Jakarta 28 Juli 1956. Putra kahiji ti opat sadulur, Bapa Sastro Sugiyono (alm) sareng Ibu Mimi Juhariah. Apana tugas di Brimob. Gugur basa taun 1965, diculik tur ditembak ku PKI (Partai Komunis Indonésia), basa tugas di Pos Pulisi Pelabuhan Tanjung Priuk Jakarta. Kajadianana kungsi dijieun Film.
Nuju Pa Eddy SD, sakola di SD Kanisius Yogyakarta, lulus taun 1969. Terus nuluykeun ka SMP Kanisius jeung SPG/SMA Albertus Yogyakarta (lulus taun 1972 & 1975). Sabada lulus SPG/SMA neruskeun ka D-2 IKIP (UPI). Ti dinya neruskeun S-1 di STKIP, lulus taun 2006. Ngahontal S-2-na di UNPAS, lulus taun 2010.
Aya préstasi nu pikareueuseun, basa Eddy rumaja téh. Nuju anjeunna sakola di SPG/SMA, kapeto jadi petugas upacara tingkat kabupatén. Tempatna di alun-alun Kabupatén Sléman-Yogyakarta. Dina kagiatan upacara ngeleberkeun bandéra 17 Agustus. Harita tugasna di payuneun Bupati Sléman-Yogyakarta.
Renang jeung nyanyi, kalangenan/hobi basa Pa Eddy rumaja téh. Malah nepi ka kiwari kalangenanana masih dileukeunan, éta gé lamun keur nyalsé. Ari cita-citana mah hayang jadi guru. Teu kapangaruhan ku batur, kituna téh, éstu kahayang sorangan. Mus Mulyadi, penyanyi keroncong kahot, salah sahiji tokoh inspiratifna téh.
Munggaran jadi guruna, basa ngawulang di SD Santa Maria Cimahi. Taun 1978, Pa Eddy diangkir jadi PNS. Tugasna kungsi ngajar di sababaraha SD. Di antarana di SDN Ranca Cangkuang Cimahi, SDN Melong Asih 9 Cimahi jeung SDN Melong Mandiri 1 Cimahi.
Guru kelas SDN Padasuka Mandiri 4 Kota Cimahi
“Ti aalit kalangenan bapa, memang tos hoyong janten guru. Alhamdulillah, berkesan pisan. Komo lamun tos caket tur tiasa mantuan para siswa. Saperti meupeuskeun jawaban soal-soal nu sesah,” saur Pa Eddy, kepala sekolah nu janten mualaf taun 1982 téh.
Karir Pa Eddy beuki nanjeur. Basa taun 2010, anjeunna lulus janten kepala sekolah. Laju ku Dinas Pendidikan Kota Cimahi, ditugaskeun sangkan mingpin SDN Kebonsari 1 Kota Cimahi, Kelurahan Baros, Kecamatan Cimahi Tengah. Taun 2014, Pa Eddy ngalih tugas, janten Kepala SDN Padasuka Mandiri 4 Kota Cimahi, tug tepi ka ayeuna.
Ciri has program-program Pa Eddy, nya éta dina hal nerapkeun kadisiplinan sarta kaberesihan sakola. Kituna téh ka dirina, para guru jeung siswana. Guru SDN Padasuka Mandiri 4, ditungtut sangkan leuwih disiplin. Utamana dina sual kahadiran tur tanggung jawabna. Dina hal miara kaberesihan, Pa Eddy teu bosenan, ngingetan ka siswa SDN Padasuka Mandiri 4 Kota Cimahi, sangkan miara lingkungan tur teu miceun runtah di mana baé.
Dina nerapkeun sagala programna, Pa Eddy mah tara utah étah tur tutunjuk. Anjeunna sok prak langsung nyontoan. Upamana dina disiplin waktu, sabisa-bisa Pa Eddy datang leuwih awal, ti batan rekan-rekanna. Sabalikna mun mulih sok pang pandeurina.
Dina miara lingkungan, anjeunna tara bauan sok mulungan tur ngaberesihan kaayaan sakola. Sakabéh program Pa Eddy tangtu dideudeul pisan ku para guruna tur siswa-siswi SDN Padasuka Mandiri 4 Kota Cimahi.
Pa Eddy nikah ka Ibu Marliyah, S.Pd. Kagungan putra tilu. Garwana Pa Eddy, ayeuna ngawulang di SDN Melong Mandiri 4 Kota Cimahi. Tah kitu nya, wartana mah! [MS]***
