Pa Andang Segara, Kepala SMAN 3 Kota Bandung basa ngadadarkeun masalah lapang olah raga Jalan Bali Kota Bandung, di payuneun Pa Ahmad Heryawan Gubernur Jawa Barat
Sumur Bandung majalahsora.com – Sobat Sora, SMAN 3 Kota Bandung, salah sahiji sakola unggulan di Kota Bandung, dilongok ku Pa Ahmad Héryawan, Gubernur Jawa Barat (2 Pébruari 2017). Disarengan ku DR. Ahmad Hadadi, salaku Kepala Dinas Pendidikan Propinsi Jawa Barat.
Pa Ahmad Heryawan, rék mantuan SMAN 3 Kota Bandung sangkan lapang olah raga Jalan Bali tetep bisa dipaké ku SMAN 3 & SMAN 5 Kota Bandung
Pa Ahér ngahaja ngadongdon ka sakola nu dipingpin ku DR. H. Andang Segara, M.M.Pd, téh, dina raraga koordinasi tur hayang apal naon waé masalah nu disanghareupan ku SMAN 3 Kota Bandung jeung SMAN 5 Kota Bandung. Komo saprak SMA jeung SMK dikokolakeun ku Propinsi Jawa Barat.
Ketua OSIS SMAN 3 Kota Bandung keur dialog jeung Gubernur Jawa Barat, Bapa Ahmad Heryawan
Basa Sumping di SMAN 3 Kota Bandung dipapag ku pintonan angklung SMAN 3 Kota Bandung. Laju ditampi di aula SMAN 3 Kota Bandung. Di éta tempat Pa Ahér ngadadarkeun program Propinsi Jawa Barat dina widang atikan sacara saliwat. Anjeunna nerangkeun yén sakola téh kudu jadi imah kadua pikeun siswa didikna. Alatan kitu anjeunna miharep sakola téh kudu aman, pikabetaheun jeung pikaresepeun. Salian ti éta kudu jadi tempat ngatik sangkan siswa boga ahlaq tur moral nu hadé. Lain saukur pinter wungkul.
DR. H. Ahmad Hadadi, Kepala Dinas Pendidikan Propinsi Jawa Barat (kéncaeun Pa Andang, batik beureum)
Salian ti ngadadarkeun program Pamaréntah Propinsi Jawa Barat, Pa Ahér gé méré kasempetan keur dialog. Dina éta kasempetan H. Andang Segara, salaku Kepala SMAN 3 Kota Bandung, mudalkeun salah sahiji masalah di SMAN 3 Kota Bandung, di antarana ngeunaan lapang olah raga di Jalan Bali. Anjeunna miharep bantuan ti Pamaréntah Propinsi Jawa Barat, sangkan lapang olah raga nu aya di Jalan Bali téh, henteu salin rupa jadi wangunan tohaga. Alatan ayeuna geus dipimilik ku Balai Bahasa Propinsi Jawa Barat tur Pamaréntah Pusat. Aya kamelang engkéna teu boga lapang olah raga.
Pintonan angklung ti SMAN 3 Kota Bandung
Lapang olah raga nu aya di Jalan Bali téh geus dipaké ku siswa SMAN 3 sarta SMAN 5 Kota Bandung ti taun 1960-an. Kacipta lamun jadi diadegkeun wangunan nu tohaga, otomatis SMAN 3 Kota Bandung teu boga lapang keur olah raga. Pa Andang gé jadi bingung lamun dioméan, éngkéna bisi jadi matak.
Tim angklung SMAN 3 Kota Bandung dipoto sareng pa Ahmad Heryawan Gubernur Jawa Barat
“Masalah fasilitas olah raga SMAN 3 Kota Bandung sareng SMAN 5 Kota Bandung, nu nganggo lapang olah raga di Jalan Bali, Insya Alloh baris aya solusina. Sim kuring moal ngantep kitu baé. Engké koordinasi sareng pamaréntah pusat. Piraku pamaréntah pusat teu ngabantuan. Apan salami ieu gé Pamaréntah Propinsi Jawa Barat, sakitu ngadeudeulna ka pusat. Contona baé ngahibahkeun ratusan héktar lahan keur ngadegkeun kampus, boh nu di Jatinagor keur pangwangunan kampus ITB, lahan nu di Karawang keur kampus Universitas Singaperbangsa, jeung réa-réa deui. Pokona moal ngantep dugi ka alih fungsi!” saur Pa Ahmad Heryawan, tandes. [MS]***
