Pa Ahmad Heryawan, Gubernur Jawa Barat basa nampi Syeihk Abdur-Raheem Mccharty, di Aula Barat Gedong Sate, Senen 12 Juni 2017
majalahsora.com – Dina maleman ka-18, Romadhon 1438 H (poé Senén 12 Juni 2017), Pa Ahmad Heryawan Gubernur Jawa Barat katatamuan tokoh agama Islam ti Amerika Serikat, nya éta Syeihk Abdur-Raheem Mccharty teureuh Irlandia jeung Amerika Serikat. Lahir tug gedé di nagara Paman Sam. Baheulana Syeihk Abdur-Raheem téh ngagem agama Katolik, basa taun 1994 anjeunna jadi mualaf. Di bagéakeunana di Aula Barat Gedong Saté, sakalian silaturahmi tur ngalaksanakeun acara buka bersama, sarta tarawéhan di Masjid Pusdai.
Syeihk Abdur-Raheem basa ngadadarkeun pangalamanana jadi mualaf
Syeihk Abdur-Raheem téh, baheulana kungsi jadi anggota geng motor di Amerika Serikat, pamabokan, tukang gelut, jsb-na, nepi ka ahirna babalik pikir tur jadi mualaf. Kataji asup Islamna, alatan Islam téh Rahmatan Lil Alamin, ngajarkeun ajén inajén anu hadé. Salah sahijina ngeunaan miara kaberesihan. Eta wé ngeunaan najis, nu sakitu jéntréna, lamun rék ibadah téh kudu beresih tina najis. Di agama nu diagem ku anjeunna méméhna mah, hal kitu téh teu diajarkeun. Islam gé ngajarkeun kaadilan, pangpangna dina bagbagan ngeunaan nu asup surga. Di Islam mah sanajan ngagem Islam, tapi lamun paripolahna teu kapiara, engkéna baris asup ka naraka sanajan engkéna asup ka surga. Ari di agama méméhna mah, mangsa ngalakukeun kagoréngan tur balik deui iman ka agamana, engkéna baris langsung asup surga, teu asup naraka heula.
Kaayaan kagiatan silaturah tur buka bersama di Gedong Sate 1438 H
Dina Romadhon 1438 H ayeuna Syeihk Abdur-Raheem ngahaja ngadongdon ka Indonésia, hususna ka Kota Bandung. Anjeunna kataji ku sumanget Romadhon tur daméina Islam di Indonésia, komo jumlahna mayoritas. Sanajan muslimna mayoritas, saur anjeunna nu minoritas téh aman ngajalankeun ibadahna. “Sim kuring reueus ningal muslim di Indonésia téh, jalmina saroméah, teras hirup kumbuh sacara daméi. Sanaos mayoritas nu minoritas gé relatif aman ngalaksanakeun ibadahna. Anjeunna miharep umat muslim di Indonésia nu mayoritas téh, kedah reueus, ningkatkeun pamahamanana, tur ngaimplementasikeun dina kahirupan sadidinten,” saur Syeikh Abdur-Raheem téh.
Syeihk Abdur-Raheem Mccharty mangsa diwawancara ku wartawan
Pa Ahmad Heryawan, salaku Gubernur Jawa Barat gé kalintang bagjana kasumpingan ku Tokoh Islam ti Amerika Serikat téh. Dina obrolan singgetna jeung wartawan, Pa Ahér ngadadarkeun, yén Syeihk Abdur-Raheem téh salah sahiji tokoh inspiratif nu jadi mualaf. Anjeunna non muslim tuluy diajar Islam nepi ka ngagem agama Islam. Laju diajar Islam di Madinah. Kataji ka Islam Indonésia nu toléran, damei, jsté. Mudah-mudahan umat muslim minoritas nu nganjrek di nagara non muslim, bisa hirup kawas di nagara Indonésia. [MS]***
