Upacara Bandéra Miéling Hari Lahir Pancasila taun 2017 tingkat Propinsi Jawa Barat, poé Kemis, ping 1 Juni 2017 di buruan Gedong Saté, Kota Bandung (poto kang Dudi Humas Jabar)
majalahsora.com – Dina raraga miéling Hari Lahir Pancasila taun 2017, Pa Ahmad Héryawan Gubernur Jawa Barat, ngageuing ka balaréa tur ka sakumna komponén bangsa, sangkan nyepeng pageuh Pancasila, minangka ideologi bangsa jeung nagara urang. Anjeunna umajak ka balaréa supaya paham, neuleuman, tur ngamalkeun Pancasila dina kahirupan sapopoéna.
“Kiwari réa pisan gangguan-gangguan tur upaya dina ngarempagkeun komitmen bangsa urang kana dasar nagara, mangka Pancasila salaku dasar nagara kudu dipiara, dipahami, sarta diamalkeun. Alatan réa ajén inajénna,” saur Pa Ahér, sabada réngsé jadi Pembina Upacara dina Miéling Hari Lahir Pancasila, tingkat Propinsi Jawa Barat, di buruan Gedong Saté, Kemis, 1 Juni 2017.
Pa Ahér nétélakeun, pereluna jargon pikeun ngageuing masarakat sangkan leuwih nyaho kana ajén inajén Pancasila. Tujuanana mah sangkan masarakat bisa nyurtian, neuleuman tur ngamalkeunana.
“Perlu pisan jargon Saya Indonésia, Saya Pancasila téh. Sangkan sakumna masarakat Indonésia, hususna para nonoman tiasa ngamalkeun Pancasila,” saur Pa Ahér.
Pamarentah Indonésia geus netepkeun yén ping 1 Juni 1945 minangka Hari Lahir Pancasila. Nyoko kana kaputusan Presiden Republik Indonésia Nomer 24 taun 2016, ku kituna, saban ping 1 Juni téh, jadi hari libur nasional.
Ku hal kasabit téh, dipiharep bisa ngaronjatkeun komitmen bangsa kana Pancasila, minangka hiji-hijina ideologoi bangsa, keur buméla ka Nagara Kesatuan Republik Indonesia (NKRI), Undang-undang Dasar (UUD) 1945, sarta ngajaga ajén inajén ka-Bhineka-an.
“Pa Jokowi salaku Présiden Indonésia nekenkeun, yén urang salaku warga negara Indonésia kudu nyepeng pageuh dasar nagara Pancasila, minangka hiji-hijina ideologi nagara, nyepeng pageuh Undang-Undang Dasar 1945, buméla ka NKRI, sarta hirup guyub dina ka-Bhineka-an, alatan urang téh duduluran,” saur Pa Aher deui.
Dina pangbagéa biantara Presiden RI, nu dibacakeun ku Pa Ahér, eusina téh ngageuing balaréa, yén kodrat bangsa Indonesia téh nya éta keberagaman. Ti Sabang nepi ka Merauke. Ti Miangas nepi ka Rote. Rupa-rupa séké sélér, nalika adat istiadatna, agama, kapercayaan, sarta golongan ngahiji sabeungkeutan jadi Indonesia. Saur Pa Jokowi, éta pisan ka-bhineka tunggal ika-an bangsa reujeung nagara Indonesia téh.
Pa Jokowi gé ngageuing yén kahirupan berbangsa sarta bernegara urang téh, kiwari keur meunang cocoba. Alatan aya sababaraha kelompok nu pamadeganana patukang tonggong jeung ideologi Pancasila, nu ngalantarankeun sikep nu teu toléran.
“Kebhinekaan urang keur diuji. Aya sababaraha kelompok nu ngancem kana prinsip kebhinekaan sarta keikaan urang. Kurangna toleransi nu patukang tonggong jeung Pancasila,” Saurna.
“Beuki kadieu beuki pikahariwangeun, Sok komo ku informasi nu salah ngaliwatan media sosial nu nyebarkeun berita hoax,” Saur Pa Jokowi.
Ngaliwatan biantara nu dibacakeun ku Pa Ahér, Pa Jokowi nétélakeun urang kudu diajar ti nagara deungeun, alatan ngalaman hal nu kurang hadé, kayaning; radikalisme, konflik sosial, terorisme, sarta perang saudara. Ku nyepeng pageuh tur ngamalkeun Pancasila sarta UUD 1945, urang bisa nangkel masalah-masalah kasabit. Ku kituna bangsa Indonésia bisa hirup guyub sarta gotong royong ngamajukeun bangsa jeung nagarana. Samalah ku Pancasila, Indonesia jadi pangharepan tur conto keur dunya internasional, dina raraga ngawangun kahirupan dunya anu tingtrim, adil, sarta makmur di tengah-tengah masarakat nu baragem.
Keur mertahankeun éta hal, Pa Jokowi umajak peran aktip, tokoh agama, tokoh masarakat, pendidik, palaku seni sarta budaya, palaku media, jajaran birokrasi, TNI, Polri, sarta sakumna komponen balaréa babarengan ngajaga Pancasila.
“Pamahaman sarta ngamalkeun Pancasila dina hirup kumbuh berbangsa sarta bernegara téh kedah teras dironjatkeun. Ceramah kaagamaan, materi atikan, pemberitaan sarta paguneman di media sosial kedah jadi bagéan tina pendalaman sarta ngamalkeun ajén inajén Pancasila,” saur Pa Jokowi.
Sajaba ti éta, wangun komitmen lianna ti Pamarentah keur nguatan Pancasila téh, nya éta ngaliwatan pembentukan Unit Kerja Presiden Pembinaan Ideologi Pancasila. Eta téh geus dijieun undang-undangna dina Aturan Presiden (Perpres) Nomer 54 taun 2017, ngeunaan Unit Kerja Presiden Pembinaan Ideologi Pancasila.
Babarengan jeung komponen bangsa lianna, lembaga kasabit di luhur téh ditugaskeun keur nguatan tur ngamankeun Pancasila dina kahirupan sapopoé, nu nyambung reujeung program-program pangwangunan. Kayaning megatkeun kamiskinan, karaharjaan nu walatra, sarta sagala rupa program lianna, nu teu lésot tina ajén inajén Pancasila. [Humas Prop. Jabar-MS]***
