Prof. Dr. H. Muhadjir Effendy, M.AP., Menteri Pendidikan & Kebudyaan Indonesia (batik abu-abu)
majalahsora.com – Minggu 23 April 2017, di SMAN 10 Kota Bandung ramé keur aya kariaan, miéling HUT emas sakolana nu ka-50 taun. Sakalian reuni akbar kabéh angkatan. Alumni kahijina lulus taun 1969. Harita peserta reunina tumplek, di sakola nu pernahna di Jalan Cikutra No. 77, Kecamatan Cibeunying téh, kira-kira leuwih ti 2000-an urang nu datangna mah.
Pa Ade Suryaman, S.Pd., M.M., Kepala SMAN 10 Kota Bandung & Ibu Nurul Arifin, alumni SMAN 10 Taun 1985, artis nu ayeuna janten anggota DPR-RI
Dina éta kagiatan téh, aya hal nu istiméwa, alatan kagiatanana diluuhan sacara langsung ku Pa Muhadjir Effendy, Menteri Pendidikan & Kebudayaan Indonésia. Dina sela-sela kasibukanana anjeunna nyempetkeun hadir. Salian ti Pa Muhajir, ogé diluuhan ku para alumni SMAN 10 Kota Bandung nu geus jadi inohong tur pejabat publik, kacatet aya KH. Haedar Nahsir, Ketua Umum PP. Muhammadiyah, Ibu Nurul Arifin, anggota DPR-RI, Pa Iwa Kartiwa, Sékrétaris Daérah Prop. Jabar, Pa Haris Yuliana, Wakil Ketua DPRD Prop. Jabar, Pa Setia Untung Arimuladi, Kepala Kajati Prop. Jabar, Pa Rudi Gunawan , Bupati Kab. Garut, jrrd.
Peresmian kagiatan HUT emas & reuni akbar SMAN 10 Kota Bandung
Prof. Dr. H. Muhadjir Effendy, M.AP., Menteri Pendidikan & Kebudyaan Indonesia nuju melak tangkal matoa
Pa Adé Suryaman, S.Pd., M.M., salaku Kepala SMAN 10 Kota Bandung kacida atohna mangsa kasumpingan para inohong tur alumni kasabit téh, dina kagiatan nu spesial deuih. “Alhamdulillah kagiatanana diluuhan ku Pa Muhajir, Menteri Pendidikan & Kebudayaan Indonésia nu ngahaja sumping. Teu kakantun sadaya angkatanana hadir. Kanggo SMAN 10 mah, ieu téh janten kareueus alatan aranjeunna kantos nyiar élmu di SMAN 10 Kota Bandung. Malih seueur nu tos janten inohong tur pejabat publik nu nyepeng kalungguhan strategis,” saur Pa Adé nétélakeun.
Peletakan batu pertama pangwangunan Masjid Lukman SMAN 10 Kota Bandung ku Menteri Pendidikan & Kebudayaan Indonesia
Dr. KH. Haedar Nashir, M.Si., Ketua Umum PP. Muhammadiyah, alumni SMAN 10 Kota Bandung basa nampi lukisan, disakséni ku Pa Ade Suryaman, S.Pd., M.M., Kepala SMAN 10 kota Bandung sareng Dr. H. Iwa Karniwa, M.M., Sekda Jabar nu ogé alumni ti SMAN 10 Kota Bandung (paling katuhu)
Poto kénca ka katuhu Drs. H. Bambang Haryono, Ketua Komite SMAN 10 Kota Bandung, Pa Haris Yuliana, S.Pd.I., M.AP., Wakil Ketua DPRD Prop. Jabar, alumni SMAN 10, taun 1988 & Pa Ade Suryaman, S.Pd., M.M., Kepala SMAN 10 Kota Bandung
Kagiatanana dieusi ku rupa-rupa acara, salian ti acara tepang sono, aya kagiatan peletakan batu pertama renovasi Masjid Lukman, nanda tangan prasasti pangwangunan gedong sakola ku Pa Muhadjir Effendy, waragadna bantuan ti pamaréntah pusat, keur dua kelaseun.
Kadeudeuh pikeun guru nu tos pangsiun tur siswa bepréstasi ti Bank Permata Syariah
Poto réngréngan kepala sekolah, guru, SMAN 10 Kota Bandung manten sareng panitia tur wawakil ti Bank Permata Syariah
Di sagigireun éta aya bantuan kelas anyar ti alumni, jumlahna dua lokal, prasastina ditanda tangan ku KH. Haedar Nahsir. Ogé aya melak tangkal, jeung pamasrahan bantuan Rp. 50 juta. 25 juta rupia keur 25 urang siswa berpretasi, 25 juta rupia deui keur 25 urang guru nu geus pangsiun, waragadna ti Bank Permata Syariah.
Drs. H. Bambang Haryono (calik di payun nuju keprok), salaku Ketua Komite Sekolah SMAN 10 Kota Bandung
Pa Muhadjir Efenddy, salaku Menteri Pendidikan & Kebudayaan, ngécéskeun yén SMAN 10 Kota Bandung téh salah sahiji sakola di Indonésia nu geus ngalahirkeun generasi tur boga ajén-inajén ngamajukeun nagara. Dipiharep alumnina gé aktip dina mantuan pangwagunan sarana jeung prasarana sakolana. Alatan éta téh kaasup tanggung jawab masarakat, ngaliwatan komite sekolah, luyu jeung permendikbud nomer 75 taun 2016. Salian ti éta miharep para alumnina nu geus suksés, bisa ngaluangkeun waktuna keur babagi pangalaman tur ngainspirasian siswa SMAN 10 Kota Bandung téh.
Alumnina Kompak
Majalah Sora gé hasil ngawawancara alumnina di antarana Dr. Asep Jolly. M.Pd., alumni taun 1976 sareng Pa Haris Yulian, S.Pd.I., M.AP., alumni taun 1988. “Acarana saé tiasa meungkeut tali silaturahmi sadaya angkatan. Ieu téh salah sawios kerja keras panitiana, wilujeng. Tiap angkatan gé teu tinggaleun mantuan boh sacara moril boh sacara materil, pokona mah tong hilap kanggo ngamajukeun almamaterna,” saur Pa Asep Jolly, nu janten pengawas SMK di Disdik Prop. Jabar téh.
Kitu ogé nu didugikeun ku Pa Haris Yuliana, alumni taun 1988, nu ayeuna janten Wakil Ketua DPRD Prop. Jabar, “Sacara pribadi sim kuring reueus kantos tolab élmu di SMAN 10 Kota Bandung. Seja nganuhunkeun ka para guru nu kantos ngawulang sim kuring, pangpangna Pa Yusuf, guru fisika. Alatan di ieu sakola sim kuring kénging bekel élmu akademis tur diatik élmu agama. Salian ti éta sim kuring gé reueus alatan dina jaman sim kuring sakola di SMAN 10 Bandung, basa taun 1980-an SMAN 10 kagungan Masjid sakola pangageungna kanggo pantar SMA sa-Kota Bandung téh. Sim kuring umajak ka para alumni SMAN 10 Kota Bandung dipiharep tiasa aub tur ngabantos waragad renovasi tur ngalegaan pangwangunan Masjid Lukman,” saur Pa Haris Yuliana, nu kantos janten Ketua DKM Masjid Lukman mangsa aktif jadi siswa SMAN 10 Kota Bandung téh.
Poto kénca ka katuhu: Marwadi, SE., Pa Suryana, Drs. H. Bambang Haryono & Pa Asep Saepudin, A.Md.
Patalina jeung kagiatan HUT emas tur reuni akbar SMAN 10 Kota Bandung, Pa Adé Suryaman, salaku Kepala Sekolahna miharep, tali silaturahmi sadaya warga SMAN 10 Kota Bandung tetep kapiara tur pageuh. Tanggung jawab sakola gé mingkin kawantu, jadi leuwih gampang dina nanjeurkeun mutu sakola alatan aya peran aktif ti para alumnina. [MS]***
