Drs.Ontahari, Kepala SMKN 9 Kota Bandung
Soekarno Hatta – Di mamana lamun mangsa keur usum PPDB (Penerimaan Peserta Didik Baru), pasti ngaleut loba orang tua siswa nu ngadaftarkeun palaputrana ka sakola nu dituju. Ilaharna dina mangsa kitu téh sok ngantri, malah mun réa nu daftar, nungguanana téh matak pikaboseneun.
Ibu Elly Takarini,Waka. Kesiswaan nu ogé mancén tugas janten Ketua PPDB 2016 SMKN 9 Kota Bandung
Keur nyairkeun suasana nu pikaboseneun, dina kagiatan PPDB di SMKN 9 Kota Bandung mah, panitia téh kréatif, nya éta nyetél lagu-lagu slow nu matak nengtremkeun manah. Tujuanana ambéh panitia jeung nu daftar jadi kahibur, ngendorkeun syaraf saawak-awak, pokona mah matak teu jangar kana sirah. Hal éta téh dipuji ku Pa Elih, salaku Kepala Dinas Pendidikan Kota Bandung.
“Ngahaja nyetel lagu-lagu slow, supados nu daftar kahibur. Mangsa ngantosan antrian janten santéy. Laguna disetel tina laptop nu disambungkeun kana perangkat audio. Eta téh kaideuan ku SMKN 14 Kota Bandung. Salian ti nu daftar, panitia gé tiasa kahibur,” saur Ibu Elly Takarini,Waka. Kesiswaan nu ogé mancén tugas janten Ketua PPDB 2016 SMKN 9 Kota Bandung.
Patalina jeung PPDB taun 2016 ayeuna, SMKN 9 Kota Bandung baris narima 540 siswa. Ngawengku lima program keahlian, kanyaning Pariwisata; Usaha Perjalanan Wisata (1 kelas, total siswa 36 urang), Akomodasi Perhotélan (2 kelas, total siswa 72 urang), Tata Boga; Jasa Boga (4 kelas, total siswa 144 urang), Patiseri (3 kelas, total siswa 108 urang), Tata Kecantikan; Tata Kecantikan (2 kelas, total siswa 72 urang), Tata Bisana; Busana Butik (2 kelas, total siswa 72 urang), Seni Rupa; Desain Komunikasi Visual (1 kelas, total siswa 36 urang). Nepi ka poé kamari (30 Juni 2016) geus leuwih ti 791 urang nu daftar.
Jalur penerimaanna mah akur jeung SMK séjén di kota Bandung, nya éta non akademik jeung akademik. Siswa nu katarima dina jalur non akadmik aya 148 urang, préstasi 26 urang, rmp/teu mampu 106 urang, ABK jeung undang-undang guru aya 16 urang. Sésana 380 urang ditarima ngaliwatan jalur akademik, nu baris diumumkeun tanggal 4 Juli 2016.
Sababaraha kali majalah Sora nguriling ka unggal SMK di Kota Bandung, can kungsi aya kabéjakeun aya siswa inklusif/anak berkebutuhan husus nu daftar dina PPDB taun 2016. Kakara manggihan di SMKN 9 Kota Bandung nu kituna téh. Saurang siswa inklusif (teu bisa ngomong) katarima di program keahlian Jasa Boga, hiji deui mah pakét B (siswa autis).
Pa Budi Utama, padamel TU SMKN 9 Kota Bandung
Kang Enjang Hermawan, S.Sos., (kenca) & Kang Kususmah S.S.T., padamel TU
“Alhamdulillah kagiatan PPDB di SMKN 9 Kota Bandung lumangsur lungsur langsar. Kondusif , sakuat tanaga panitia masihan pelayan nu optimal ka para pendaftar. Kanyaning masihan informasi, pelayanan dugi ka aya pidangan lagu slow. Mudah-mudahan siswa anyar nu katampi di SMKN 9 Kota Bandung, tiasa janten siswa nu berpréstasi, nyeungitan SMKN 9 Kota Bandung, amin,” saur Drs. Ontahari, Kepala SMKN 9 Kota Bandung.
Kang Endang Kosasih
Lamun nilik kaayaan SMKN 9 Kota Bandung, nu perenahna di Jalan Soekarno Hatta KM 10 téh, kamajuanana kasebut mesat. Komo saprak dipingpin ku Drs. Ontahari. Ayeuna keur hangkeut-hanhkeutna mémérés kaayaan sakolana, saperti mérésan buruan sakola, pepelakan, fasilitas, SDM jeung réa-réa deui. Ayeuna ieu sakola nu condong kana widang pariwisata téh remen dijadikeun tempat kagiatan, boh keur tingkat kota boh keur tingkat propinsi, malah sok katatamuan ti pamaréntah pusat. [MS]***
