majalahsora.com, Kota Bandung – Patalina jeung Idul Adha 1438 H/2017, ilaharna disebut Idul Qurban, majalahsora.com, ngahaja ngadongdon ka SMAN 24 Kota Bandung nu dipingpin ku Drs. Iwan Setiawan. Di ieu sakola téh lumangsung kagiatan nu luhung ku ajén kaislamanana, nya éta simulasi manasik haji sarta meuncit sato qurban. Lumangsung poé Senén ping 4 Séptémber 2017, ti isuk-isuk nepi ka pasosoré.
Ahmad Hadadi, Kadisdik Jabar & Iwan Setiawan Kepala SMAN 24 Bandung
Ti béh ditu mula kagiatan simulasi manasik haji hususna geus dilaksanakeun di ieu sakola, nu pernahna di Jalan A. H. Nasution No. 27, Kelurahan Pasiréndah, Kecamatan Ujungberung téh. Kagiatan manasik hajina diiluan ku sakabéh siswa kelas XII nu ngagem agama Islam, kalayan diaping ku bapa ibu guruna hususna guru Pendidikan Agama Islam, salah sahijina nya éta Syarif Hidayat, S. Ag., M.M.
Drs. Iwan Setiawan, mangsa diwawancara ngeunaan kagiatan Idul Qurban di SMAN 24 Bandung
“Alhamdulillah, kagiatan manasik haji sareng meuncit sato qurban téh tos maneuh diayakeun di SMAN 24 Kota Bandung. Eta téh luyu sareng visi utama di SMAN 24 Kota Bandung, nya éta nanjeurkeun ajén kataqwaan ka Alloh SWT. Ti taun ka taun teras diropéa supados langkung kekinian tur numerap ka para siswa. Nu ngalaksanakeun manasik hajina siswa kelas XII, sedengkeun kelas X sareng XI nalingakeun sadaya kagiatanana, aya nu motrét tur midéo, engkéna ngadamel karya video/dokumentasi anu aya patalina sareng pembelajaran. Guru sareng walikelas gé kalibet, boh dina kagiatan manasik haji boh meuncit sato Qurban. Di sagigireun éta, ku kagiatan manasik haji gé, alhamdulillaah ti taun ka taun sok aya waé guru atanapi siswa nu arangkat umroh, ogé mungggah haji,” cék Syarif Hidayat, guru nu ngarangkep jadi panitia kagiatan Idul Adha 1438 H di SMAN 24 Kota Bandung téh.
Kagiatan simulasi manasik haji di SMAN 24 Bandung
Taun ayeuna panitia qurban di SMAN 24 Kota Bandung katitipan sato qurban opat, nya éta sapi dua sarta domba dua. Satona titipan ti guru ieu sakola reujeung hasil sidqoh para siswa, guru reujeung tata usahana. Mangsa réréongan ti siswa, panitia qurban teu ngawajibkeun atawa matok waragadna, tapi saridona baé.
Kagiatan meuncit sato qurban di SMAN 24 Bandung
Harita, kabandungan ku majalahsora.com, umumna para siswa nu ancrub kana kagiatan kasabit téh soson-soson ngalaksanakeunana.
Di sagigireun éta Iwan Setiawan, salaku Kepala Sekolah miharep ku ieu kagiatan téh pendidikan karakter bangsa bisa numerap ka saban siswa. Alatan ku kagiatan manasik haji jeung meuncit sato qurban, mangrupa salah sahiji léléngkah halu dina ngoptimalkeun pendidikan karakter. Alatan aya sababaraha hal anu bisa diterapkeun dina kahirupan sapopoé, kayaning kajujuran, sumanget juang, nya éta mangsa ngurilingan kabah, sarta parjalanan safa ka marwa, nu pamungkas karakter disiplin.
Syarif Hidayat, S. Ag., M.M., nyepeng mik
“Insya Alloh ieu kagiatan seueur mangfaatna, pangna kanggo nanjeurkeun karakter siswa pikeun ngudag Indonésia emas di taun 2025 nepi ka 2045. Ku kagiatan manasik haji jeung meuncit sato qurban , miharep para siswa hususna nu muslim jadi apal kana pangorbanan Kanjeng Nabi Ibrahim AS. Nya éta kajujuran, sumanget juang sarta disiplin. Salian tia éta apal kana bagbagan manasik haji sarta apal kana bagbagan meuncit sato qurban, tur dina nyerit, nimbang tur ngabagikeun sato qurban ka warga nu berhak,” cék Iwan Setiawan, Kepala SMAN 24.
Drs. H. Deni Dimyati (katuhu) salah sawios guru SMAN 24 Bandung nu meuncit sato qurbanna
Enceng, Wakasek Humas SMAN 24 Bandung (katuhu)
Kagiatan kasabit gé harita diluuhan ku Ahmad Hadadi, Kepala Dinas Pendidikan Propinsi Jawa Barat. Dina sela-sela kasibukanana, anjeunna ngahaja sumping ka SMAN 24 Kota Bandung dina raraga mantau éta kagiatan. Ahmad Hadadi ngécéskeun yén kagiatan nu lumangsung di SMAN 24 Kota Bandung téh, boga ajén nu luhung keur syiar agama Islam. Mangsa ku majalahsora.com di kolongan ngeunaan masalah sidkoh keur meuli sato qurban, Ahmad Hadadi ngécéskeun salila taya paksaan tur matok waragadna ka siswaa, mangka sakola mana baé nu aya dina papayung Disdik Prop. Jabar bisa ngalaksanakeun kagiatan pembelajaran meuncit sato qurbanna di sakolana masing-masing!
Poto Kagiatan:
[SR]***
