Ibay, nu ngagaduhan Toko Pegashoes
majalahsora.com, Kota Bandung – Pikeun nu boga rencana meuli sapatu, hadéna mah ngajugjug kaToko Sepatu Pegashoes, nu pernahna di Jalan Kembang Sapatu No. 18, sabudeureun Cikudapateuh, Kosambi Kota Bandung. Bukana ti pukul 10.00 nepi ka pukul 19.00 WIB.
Ieu toko sapatu téh, ngajual rupa-rupa sapatu, kayaning modél sapatu kasual jeung olah raga keur sagala umur ti budak nepi ka dewasa. Merek nu dijualna aya adidas, nike, under armour, karrimor, sperry, lacoste, jsté, kabéh barangna 100% original.
Soal harga mah, relatif leuwih murah ti batan meuli di toko papada umumna, pokona mah di discount unggal poé. Harga sapatuna kisaran ti harga Rp. 350.000 nepi ka Rp. 900.000. Matak resep pokona mah, komo ku kaayaan tokona hommy.
Cék Ibay, salaku nu boga Toko Sapatu Pegashoes, ieu toko sapatu nu ngadeg ti taun 2012 téh, nyadiaan sapatu-sapatu nu berkualitas sarta sabisa-bisa bisa nyugemakeun konsumenna.“Insya Alloh sapatuna 100 % original sanés barang KW,” pokna basa ngobrol santéy di tokona.
Sabrun Hanafi, pamaen Persib manten, nu kungsi jadi asisten pelatih tim sepak bola PON Jabar 2016 nu hasil ngaraeh medali emas, oge pelatih di POR UNI, tur pelatih timnas Indonesia, nu hasil ngaraeh posisi ka lima di Homeless World Cup 2017, salah sahiji pelanggan Pegashoes
Sajarah singkat Ibay muka toko sapatu téh, teu lian dipangaruhan ku bapana, nya éta H. Sumarno salah sahiji pioneer nu ngajual sapatu di daérah Cikudapateuh, Kosambi. Ti SMP mula, jajaka nu boga ngaran lengkep Nachyu Riyono téh geus mantuan bapana.
Mangsa nincak umur 27 taun, jajaka kalahiran Bandung 30 Méi 1985 téh, munggaran muka usaha sorangan. Tokona wétaneun toko bapana. Diaranan Toko Pegashoes akur jeung toko bapana. Ti mimiti muka toko sapatu, Ibay boga konsép nu béda, dirina nyieun komintas adidas, tur sok diajakan lamun aya event adidas, kituna téh nepi ka kiwari.
Ka béh dieunakeun, salian ti cara konvensional, ogé ngajual ngaliwatan jalur online. Kayaning dina instagram WA jeung line. Alamat Ig-na nya éta @pegashoesbdg atawa ngaliwatan nomer WA-na di nomer 081321281985 tur Line: wachyuibay.
Salila usaha, jajaka nu baris ka balé nyungcung dina awal bulan Oktober 2017 nu bakal datang téh, geus ngalaman pait amisna usaha sapatu. “Alhamdulillah dugi ka kiwari Pegashoes masih bertahan, sanaos kantos ngaraosan ramé sepina nu ngagaleuh. Alhamdulillah pami pelanggan mah teras nambihan. Pokona mah sakiat tanaga tiasa nyadiaan sapatu merek original berkualitas tur masihan pelayanan nu optimal,” pokna.
Raihan ti SMAN 2 Kota Bandung, salah sahiji pelanggan Pegashoes
Di sagigireun éta, tetep tumetep tur ngadegna Toko Pegashoes nepi ka kiwari gé, teu lésot tina bantuan distributor nu mercayakeun barangna di jual di tokona. “Sim kuring tiasa usaha dugi ka ayeuna gé teu lésot ti bantosan ti distributor, nu kateterasan percanten ka sim kuring, ogé percantena pelanggan nu teras repeat order,” cék Ibay téh.
Basa ngawawancara Ibay, Majalah Sora teu kahaja tepung jeung Raihan siswa SMAN 2 Kota Bandung nu ngadongdon jeung biangna ka ieu toko. Raihan téh, kungsi diliput di majalahsora.com dina rubrik Mojang Jajaka Sora. Ayeuna geus ngalanggan meulian sapatu di Pegashoes. “Abdi tos dua kali ngagaleuh sapatu di Toko Pegashoes. Alhamdulillah saé barangna, dugi ka ayeuna sapatu nu digaleuh dua taun kapengker masih saé, padahal dianggo ampir unggal dinten. Ayeuna ngagaleuh deui kumargi hoyong model anyar, pokona mah barangna teu nguciwakeun,” cék Raihan, bari nyepeng sapatu nike nu dibeulina.
Mansyur, Pegashoes
Saeutik mahi loba nyésa, kitu moto hirup Ibay nu kungsi sakola di SDN Céntéh 2 Kota Bandung taun 1997, SMPN 4 Kota Bandung , taun 2000, SMA PAsundan 1 Kota Bandung, taun 2003 sarta lulusan Unisba, Jurnalistik, taun 2011 téh. [SR]***
