Bu Erni Kustiani, S.Pd., M.M., Kepala SMPN 23 Kota Bandung
majalahsora.com – Sobat Sora urang wawanohan yu, sareng Kepala SMPN 23 Kota Bandung nu anyar. Jenengan lengkepna Bu Erni Kustiani, S.Pd., M.M., resmi mancén tugasna, ti ping 23 Maret 2017. Méméhna ngawulang basa Indonésia, di SMPN 5 Kota Bandung. Beunang 11 taun jadi Guru di SMPN 5 na téh.
Bu Erni, lahir di Tasikmalaya, 24 Séptémber 1969. Anjeunna putra kadalapan ti sapuluh sadulur, pasangan Bapa Yéyé Sulaéman (alm) sareng Ibu Mariah (almh). Bapa Samiadi, jenengan carogéna mah, ngadosénan di UPI (Universitas Pendidikan Indonésia). Kagungan putra dua.
Ti bubudak mula Bu Erni geus euyeub ku rupa-rupa préstasi. Basa SD, kacatet kungsi jadi murid tuladan. Laju basa di SMA kungsi janten Syahril Al Quran tingkat Propinsi Jawa Barat jeung Nasional. Salian ti éta kungsi jadi anggota Paskibra Kota Tasikmalaya, nu ngeleberkeun bandéra HUT RI, di tingkat Kota Tasikmalaya. Mangsa kuliah di jurusan basa Indonésia UPI, nya éta kira-kira taun 90-an, préstasina gé tetep kapiara, éta wé kacatet sababaraha kali jadi juara maca puisi, boh puisi basa Indonésia boh basa Sunda, jsté.
Basa taun 1995, Bu Erni diangkat janten Guru di SMPN 27 Kota Bandung, ngajar basa Indonésia. Dina taun éta kénéh anjeunna gé diangkat janten PNS (Pegawai Negeri Sipil). Ngajar di SMPN 27 Kota Bandung-na nepi ka taun 2006, satutas ti éta ngalih tugas ka SMPN 5 Kota Bandung nepi ka taun 2016.
Mangsa jadi Guru gé, Bu Erni tetep boga préstasi nu matak pikareueuseun. Basa taun 2014, anjeunna kapeto jadi pinunjul kahiji Guru Berpréstasi tingkat Kota Bandung. Salian ti éta kantos janten ketua MGMP basa Indonésia sa-Kota Bandung.
Saprak mancén tugas janten Kepala SMPN 23 Kota Bandung, Bu Erni muji kana kaayaan sakola tur Guru-guruna. “infrastrukturna tos saé, kantun diropéa sakedik-sakedik, aya ogé nu kedah diréhab. Ningal guru-guruna gé karompak,” pokna.
Salian ti éta anjeunna gé reueus nempo program pembelajaran sacara digital di SMPN 23. Pa Toni, salah sahiji guru nu ngokolakeun program pembelajaran sacara digitalna téh.
Disagigireun hal kasabit, SMPN 23 Kota Bandung gé kaasup sakola nu deudeuh miaralingkungannana. Dina widang lingkungan ieu sakola kapeunteun tur hasil nyangking jadi sakola Adiwiyata tingkat Propinsi Jawa Barat.
Kiwari Bu Erni keur ngahangkeutkeun widang akademisna. Alatan sacara non akademik mah geus réa préstasi nu kahontal, kawas préstasi silat, futsal, jeung ekskul séjénna. Rencanana rék aya pemantapan dina sababaraha mata pelajaran.
“Mudah-mudahan widang akademik di SMPN 23 langkung ngaronjat. Kitu ogé dina program pembelajaran sacara digital, SMPN 23 salah sawios pioneerna. Rencanana taun payun tiasa UNBK sacara Mandiri. Dina widang lingkungan gé mudah-mudahan tiasa ngahontal Adiwiyata Nasional. Da lamun sakola bararesih mah, matak genah diajarna,” Saur Bu Erni, nu kainpirasian ku Pa Habibie téh. [MS]***
