Bu Rini Ambarwati, M.Ds., Kepala SMK 5 Kota Bandung
majalahsora.com – BMW (Bekerja, Melanjutkan & Wirausaha), kitu istilah “keren” keur lulusan SMK téh. Lumaku ogé keur lulusan SMKN 5 Kota Bandung, nu taun 2017 ayeuna ngawisuda 506 siswa. Jolna ti kompetensi keahlian teknik Gambar Bangunan (arsitek), Teknik Konstruksi Batu Beton (sipil), Teknik Survey Pemetaan (geomatik), Teknik Komputer Jaringan sarta Analis Kimia. Samenna lumangsung poé Rebo ping 10 Méi 2017, tempatna di Aula sakolana, nu pernahna di Jalan Bojong Konéng, No. 37 A.
Bu Ayie Atikah, Kasi. Pelayanan Pendidikan, BP3 Wilayah IV Disdik Prop. Jabar
Pa Ahmad Ketua Komite Sekolah nuju ngongkorongkeun medali
Numutkeun katerangan ti Bu Rini Ambarwati, M.Ds., Kepala SMK 5 Kota Bandung téh, aya 95 % lulusan SMKN 5 Kota Bandung nu geus katarima gawé. Sésana aya nu muka usaha jeung nuluykeun kuliah. “Alhamdulillah 100 % lulus, ieu nuju acara sukuran, 95 %-na katampi damel. Malih aya nu teu ngiringan samen, teu tiasa idin alatan tos damel di Bekasi. Janten diwakilan ku sepuhna,” pokna, dina sela-sela kagiatan samenan téh.
Salian ti gawé, lulusan taun ayeuna téh, sa-Jabar keur tingkat SMK mah kaitung nu pangréana katarima di UPI-na téh. Jumlahna aya 20 urang méméhna mah can kungsi kawas kitu. “Lulusan SMKN 5 Kota Bandung, nu dipingpin ku Bu Rini téh luar biasa, seueur préstasi nu kahontal, komo aya 20 urang siswa bepréstasi nu katampi ka UPI, ngalangkungan jalur undangan SNMPTN. Pesen Ibu kanggo nu neraskeun kuliah sing langkung berpréstasi tur sukses. Kanggo nu badé atanapi tos damel mudah-mudahan katampi di tempat nu barokah sareng mangpaat, kitu ogé nu baris usaha sing suksés,” saur Bu Ayie Atikah,Kasi Pelayanan Pendidikan BP3 Wilayah IV.
Suksésna siswa nu lulus ti SMKN 5 Kota Bandung téh teu lésot tina apingan para guru-guruna nu geus ngatik sakitu lilana. jaga kudu bisa mulang tarima, pangpangna tong nepi ka mopohokeun jasa aranjeunna ogé bisa ngamajukeun almamaterna mangsa para lulusan SMKN 5 taun 2017 téh geus jarumeneng.
“Seueur kesan-kesanna, mangsa sim kuring sakola di SMKN 5 téh. Sedih pokona mah badé ninggalkeun almamater. Hatur nuhun kanggo para guru nu tos ngatik sim kuring sareng réréncangan. Mudah-mudahan kapayunna SMKN 5 Kota Bandung langkung maju,” cék Nindita ti TGB bari carindakdak.
Doni (kénca ngadeg di penrker) sabatur-batur
“Salami tilu taun di SMKN 5, nambihan tali duduluran nambih élmu seueur élmu nu kaala, pokona mah the best,” cék Doni ti TGB.
Nandita (kénca) sabatur-batur
Bu Rini salaku Kepala SMKN 5 Kota Bandung miharep lulusan taun ayeuna bisa ngaraéh suksés nu gemilang. Naon anu geus dibikeun ku SMKN 5 téh bisa jadi bekel tur mangpaat pikeun ngojayan dunya nu saenyana. [MS]***
