Drs. H. A. Sobandi, M.M.Pd, Kepala SMA Pasundan 1 Kota Bandung
Regol – Drs. H. A. Sobandi, M.M.Pd, Kepala SMA Pasundan 1 Kota Bandung, kaasup kepala sekolah nu visioner. Méméh janten Kepala SMA Pasundan 1, kungsi mingpin SMA Pasundan 2 Kota Bandung. Di unggal sakola nu dipingpinna, kudu boga kaunggulan, kitu ogé ayeuna mangsa mingpin SMA Pasundan 1 Kota Bandung. Sabada mingpin ieu sakola nu aya di jalan Balong Gedé No. 28 Kecamatan Régol téh, terus ngeureuyeuh ngumplitan fasilitas sakolana. Saperti ngumplitan fasilitas IT, nyieun gazebo nu diaranan Sabupas, rohang kelas AC, kelas nu refresentatif, teu tinggaleun ngaronjatkeun kualitas SDM-na.
Sanajan geus jadi salah sahiji sakola swasta favorit di Kota Bandung, sakum kulawarga SMA Pasundan 1 téh pageuh akar tur ngalaksnakeun motto Paguyuban Pasundan, nya éta kudu pengkuh agama Islamna, luhung élmuna, sarta jembar miara budayana, nya éta budaya Sunda.
Kutarékah nu istiqomah, lulusan SMA Pasundan 1 Kota Bandung taun 2016 lulus 100 peresen. Jumlah lulusanana aya 415 siswa. Mingkin nanjung lulusanana téh, éta wé loba nu katarima ka perguruan tinggi negri. Salah sahijina ngaliwatan jalur undangan, nu katarimana aya 39 urang, di antarana asup ka IPB, UPI, UIN sarta UNILA.
Lulusan taun 2016 (angkatan 57), diwisudana di Grand Ballroom Hotél Horison Bandung, tanggal 30 Méi 2016 kagiatanana téh. Acarana meriah, aya upacara adat Sunda, band, DJ, jrrd. Samalah aya pidangan ti H. Sobandi, nu nyumbangeun sora emasna.
“Alhamdulillah, siswana lulus 100 peresen. Bapa miharep lulusanana tiasa neraskeun ka perguruan tinggi nu berkualitas. Nu damel nya damel di pausahaan nu saé. Pokona mah pami tos ancrub di masarakat, janten jalmi nu mangfaat. Teras mudah-mudahan engkéna gentosna nu baris lebet ka SMA Pasundan 1 Kota Bandung langkung nanjung,” saur Pa Kamal Jamal, S.Pd, Waka. Kesiswaan.
Pa Kamal Jamal, S.Pd, Waka Kesiswaan
Destya Nurfrida Rahayu, salah sahiji lulusan terbaik angkatan 57, katampi di IPB
Salah sahiji lulusan terbaik taun 2016 nya éta Destya Nurfrida Rahayu. Ieu mojang lenjang téh katarima di IPB jurusan Manajemen Sumber Daya Lahan. Ieu yeuh kesan Destya salila sakola di SMA Pasundan 1 Kota Bandung téh, “Sakola di SMA Pasundan 1 Kota Bandung téh resep, guru sareng réréncnganana balageur, pokona mah moal tiasa ngahihilapkeunana, berkesan pisan. Maju terus SMA Pasundan 1 Kota Bandung,” kitu cék Destya. [MS]***
