Bu Réni Tri Ekawati, Head Consumer & Retail Bank BNI Kantor Wilayah Bandung.
Mall City Link, Bandung – Minggu 7 Agustus 2016, di Mall City Link keur haneuteun aya lomba mewarnai & menggambar, nu diiluan ku siswa TK jeung SD. Pamilonna merul ti mana mendi, lain ukur ti Kota Bandung, tapi aya nu ti Cimahi, Kabupatén Bandung, Sukabumi, Cirebon jeung réa-réa deui. Ieu kagiatan téh rarangkén tina acara-acara saméméhna, keur ngareuah-reuah HUT Bank BNI nu ka 70 taun, nu unggal tanggal 5 Juli dihajatkeun.
Anemo masarakat nu luar biasa.
Acarana dibuka ku Ibu Réni Tri Ekawati, Head Consumer & Retail Bank BNI Kantor Wilayah Bandung. Lumangsung ti pukul 10.00 nepi ka pasosoré. Jumlah peserta taun ayeuna ngaronjat 250 peresén ti batan taun méméhna.
Ivy, ditopi salah sahiji peserta lomba menggambar ti SDN Cijagra Kota Bandung.
Salian ti acara lomba aya ogé acara hiburan badut sulap jeung pintonan ti Kirana (SD Priangan Kota Bandung) & Zahra (ti SD Priangan Kota Bandung) nu nyumbangkeun sora emasna. Kirana ngahaleuangkeun lagu Hey, ari Zahra mah lagu Pelangiku ti Sherina Munaf. Kirana jeung Zahra kagabung dina grup duo, nya éta Candy Candy, nyanyi babarengan ngahaleungkeun lagu Laskar Pelangi ti Band Nidji, dina acara pamungkas.
Sobat Sora ieu yeuh nu jadi juarana mah: juara kahiji lomba mewarnai, Dara Fadillah ti SDN Prakarsa Kota Bandung, juara kadua, Kanita Zanira ti SDN Angkasa 5 Kota Bandung, juara katilu Naoval Haérulloh ti SDN Panorama 1 Kota Bandung. Ari lomba menggambar mah nu juara kahijina téh, Sarah Fadillah ti SDN 2 Panembahan Cirebon, juara kadua Alfian Suhendar ti SDN Kebon Gedang 1 Kota Bandung, juara katilu Afla Hasna ti SDN Angkasa 12 Kota Bandung
Pintonan badut sulap.
Kirana.
Zahra
Juara kahiji meunang piala tur masing-masing meunang Taplus Rp 1 juta, juara dua meunang piala tur Taplus masing-masing Rp. 750 rébu sarta juara katilu meunang piala tur Taplus masing-masing Rp. 500 rébu. Masing-masing kategori nu hasil jadi juara kahiji, baris diabenkeun deui di tingkat nasional. Karyana mah tetep anu geus dipeunteun dina kagiatan di wilayahna masing-masing. Engkéna nu juara hiji nepi katilu tingkat nasional kategori menggambar, baris meunang hadiah pakét tiket (masing-masing keur tilu urangeun) jalan-jalan ka Koréa Selatan tur edu trip ka BNI cabang Koréa Selatan. Duh matak pikabitaeun nya, Sobat Sora!
Dara Fadillah ti SDN Prakarsa Kota Bandung (jilbab bulao) & Sarah Fadillah ti SDN 2 Panembahan Cirebon (kadua ti katuhu), jadi wawakil BNI Kantor Wilayah Bandung, kategori lomba mewarnai & kategori lomba menggambar di tingkat nasional.
“Alhamdulillah kagiatanana lungsur-langsar sareng suksés. Ibu ngahatukeun séwu nuhun ka panitia tur sadaya perwakilan ti cabang BNI nu aya dina naungan BNI Kanwil Bandung. Tangtos kanggo sadaya masarakat nu tos ngadeudeul ieu kagiatan. Unggal taun lomba mewarnai sareng menggambar maneuh aya. Mung taun ayeuna mah anémo masarakatna luar biasa, pesertana naék 250 peresén ti batan taun kamari. Mudah-mudahan Bank BNI mingkin dipicinta ku masarakat sareng dipercanten. Pokona mah nu janten juara kahiji tur jadi wawakil BNI Wilayah Bandung, tiasa janten juara di tingkat nasional, aamin,” saur Bu Réni Tri Ekawati, Head Consumer & Retail Bank BNI Kantor Wilayah Bandung. [MS]***
