Dr. H. Dodin R Nuryadin, M.Si., Kepala Dikmenti Disdik Jabar, nu ngarangkep jadi penanggung jawab kagiatan LKS SMK sa-Jawa Barat taun 2017
majalahsora.com – Tanggal 19 nepi ka 21 April 2017, Dinas Pendidikan Jawa Barat baris ngalaksanakeun hajat gedé, nya éta ngokolakeun kagiatan Lomba Kompetensi Siswa (LKS) SMK sa-Jawa Barat taun 2017. Kepala Dikmenti Disdik Jabar, Dr. H. Dodin R Nuryadin, M.Si., salaku penanggung jawabna téh. Lumangsung di Kota Bandung jeung Sumedang, nu ngabenkeun 53 kompetensi keahlian (24 mata lomba, ngawengku 12 mata lomba kelompok teknologi, 7 mata lomba kelompok pariwisata reujeung 5 mata lomba kelompok pertanian).
Jejer kagiatan LKS-na geus disabit-sabit dina judul, nya éta “Membangun Sumber Daya Manusia Jawa Barat yang Berkarakter dan Berdaya Saing Tinggi dalam Masyarakat Ekonomi ASEAN (MEA)”. Kagiatanana diiluan ku wawakil ti 27 kabupatén kota. Unggal daérah ngirimkeun patandang saurang ti unggal mata lomba, totalna aya 400 patandang. Engkéna nu jadi juara LKS SMK sa- Jawa Barat téh, baris diabenkeun deui di tingkat nasional, pelaksanaanana di Solo, Jawa Tengah, tanggal 14 nepi ka 20 Méi 2017.
Bubukana lumangsung di SMKN 6 Kota Bandung, ping 19 April 2017 ti pukul 09.00 nepi ka rengsé. Rencanana baris di istrénan ku H. Deddy Mizwar, Wakil Gubernur Jawa Barat, disarengan ku Dr. Hj. Netty Heryawan, Bunda Literasi Jawa Barat.
Kagiatan LKS-na dibagi diopat tempat, keur kelompok téknologi tempatna di SMKN 6 Kota Bandung jeung SMKN 4 Kota Bandung keur kelompok pariwisata di SMKN 9 Kota Bandung sarta keur kelompok pertanian tempatna di SMK PPN Tanjungsari, Sumedang.
“Kagiatan LKS SMK sa-Jawa Barat téh gaduh ajén kanggo némbongkeun kabisa siswa SMK, diwidangna masing-masing. Salah sawios ajang kompetensi nu bergengsi sabada nampi pangajaran di sakolana séwang-séwangan. Dipiharep ku ayana kagiatan kasabit para siswa tiasa langkung kahudang, alatan tos biasa berkompetisi. Ti kawit di sakolana mula, di kota/kabutatén undak ka propinsi. Mudah-mudahan atuh wawakil ti Jabar téh tiasa nyeungitan ngaran Jawa Barat di kancah nasional tur internasional,” saur Dr. Dodin R Nuryadin, M.Si, Kepala Dikmenti Disdik Jabar téh.
Dipiharep ku ayana kagiatan LKS SMK sa-Jawa Barat taun 2017 bisa numuwuhkeun rasa sabilulungan, mental juara nu punjul, positif tur sportif. Jaga jadi wawakil Jawa Barat di kancah nasional, sangkan Jabar Kahiji, ngajaul ti batan LKS Nasional taun 2016 ka tukang, nu hasil ngaraéh 9 medali emas. Cag! [MS]***
