Dra. Hj. Euis Purnama, M.M.Pd., Kepala Sekolah
majalahsora.com – SMKN 3 Kota Bandung nu pernahna di Jalan Solontongan No. 10, Kelurahan Turangga, Kecamatan Léngkong téh, kaasup sakola kejuruan favorit di Kota Bandung. Ti mana mendi réa nu ngajugjug. Dra. Hj. Euis Purnama, M.M.Pd., Kepala Sekolahna téh, anjeunna gé ngarangkep janten Ketua K3S (Kelompok Kerja Kepala Sekolah) SMK wilayah Bandung Selatan.
Dina taun ajaran 2017-2018 ayeuna kurang leuwih baris nampa 700 siswa, pikeun 20 rombongan belajar. Ieu sakola kejuruan nyoko widang bisnis manajemen téh, boga opat, paket keahlian, nya éta; Administrasi Perkantoran, Akuntansi, Pemasaran, Multimedia jeung Usaha Perjalanan Wisata.
Tanggal 6 Juni 2017 kamari, mimiti dibuka pendaftaranana téh, nya éta nu ngaliwatan PPDB jalur non akademik. Lamun dipersentaseukeun mah, 20% keur nu teu mampu, 10% keur jalur préstasi non akademik. Nepi ping 14 Juni 2017, seleksi ahirna téh.
Tempat pendaftaranana di aula ieu sakola. Mangsa poé kahiji nu daftarna geus mudal. Lamun di jumlah-jamléh, kacatet nepi ka poé Kemis 8 Juni 2017, geus aya 513 urang pendaftar. Réréana datang langsung ka SMKN 3 Kota Bandung. Alatan nu daftarna bisa meunang informasi sacara lagsung, jadi lamun kurang itu ieu téh leuwih jéntré.
Ngan aya wé dongéngna téh, alatan réa sepuh siswa nu maksa hayang daftar ka program keahlian favorit, kayaning Adminisnistrasi Perkantoran jeung Pemasaran, ku sabab geus pinuh nu daftarna téh. Salian ti éta masing-masing kuotana ukur nampa 35 urangeun.
“Peminat ka SMKN 3 téh kalintang seueruna. Aya sababaraha jurusan nu peminatna tos pinuh teuing, kayaning Administrasi Perkantoran sareng Pemasaran. Padahal ku panitia tos diwartosan ka murangkalih tur sepuhna sangkan milih jurusan nu langkung sakedik peminatna. Tapi keukeuh seueur nu maksakeun. Sanaos tos seueur nu daftar tetep panitia PPDB non akademik SMKN 3 Kota Bandung masihan pelayanan prima, tur masihan informasi sagemblengna,” saur Bu Euis Purnama, basa diwawancara di rohang damelna.
Dina taun ajaran nu bakal datang téh, aya sababara paket keahlian nu jumlah rombelna di tambahan kitu ogé sabalikna. Nu dikurangan mah, Administrasi Perkantoran nu tadina nampa 6 kelas ayeuna mah ukur 5 kelas akur Pemasaran gé. Sedengkeun nu di tambahan mah, paket keahlian Multimedia nu tadina 2 kelas jadi 3 kelas, akur jeung UPW (Usaha Perjalanan Wisata). Nu angger mah ukur paket keahlian akuntansi nya éta 4 kelas. Per kelasna maksimal ngawadahan 36 siswa.
“Program keahlian nu dikirangan rombelna téh, alatan tos over product, éta téh nyoko kana aturan Direktorat Jendral Pendidikan sareng Disdik Prop. Jabar. Ambéh tetep sami ngagaduhan 20 rombel saperti taun kapengker mangka, dua program keahlian lianna di tambihan sarombel éwang, nya éta Multimedia sareng UPW. Pami akuntansi mah angger,” saur Bu Euis téh.
Engkéna nu geus daftar téh baris diverifikasi deui, lamun aya sepuh siswa nu méré persyaratan nu meragukan, engkéna baris ditindak lanjuti deui. Upamana lamun aya kateranga SKTM plasu, kartu keluarga palsu, sertifikat prestasi palsu, jsté mangka bakal diprosés deui.
“Mudah-muadahan dina PPDB taun ayeuna, pelaksanana tiasa langkung saé ti batan taun-taun kapengker. Alhamdulillah pihak Dinas Pendidikan Propinsi Jawa Barat, hususna Pa Hadadi kalebet anu cepat tanggap lamun aya hal nu kirang merenah mangsa kagiatan PPDB téh,”saur Dra. Euis Purnama, Kepala SMKN 3 Kota Bandung. [MS]***
