Acarana dibuka ku H. Deddy Mizwar, Wakil Gubernur Jawa Barat
majalahsora.com – Sangkan kompetensi jeung kualitas Guru honorér nu sumebar di sakuliah Jawa Barat walatra, PT. PLN (Persero) ngaliwatan LAZIS (Lembaga Amil, Zakat, Infaq jeung Shodaqoh) PLN, ngayakeun pelatihan/upgrading keur Guru honorér. Dijejeran “Menjadikan Guru yang Berkompeten dan Berkarakter”.
Pa Iwan Purnawa, General Manager PT. PLN Distribusi Jawa Barat
Ku kagiatan pelatihan kasabit, dipiharep kompetensi jeung kaahlian para Guru honorér téh bisa ngaronjat. Tujuanana teu lain keur méré kontribusi tur ngamajukeun dunya atikan. Ieu pelatihan téh diiluan ku 100 Guru honorér, nu jolna ti daérah-daérah “tertinggal” nu aya di Jawa Barat, di antarana; Tasikmalaya, Ciamis, Pangandaran, Garut, Kab. Bandung, Sukabumi jeung Cianjur. Kagiatanana lumangsung salila dua poé noron, ti Senén ping 8 Méi nepi ka poé Salasa ping 9 Méi 2017, tempatna di Balé Sumur Bandung Kantor PLN Distribusi Jawa Barat.
Poto kénca ka katuhu: Pa Iwan Purnawa, General Manager PT. PLN Distribusi Jawa Barat, Pa M. Shohib, LAZIS PLN sareng Pa Octo Yura, Humas PLN Distribusi Jabar
Acara pembukaanana, diluuhan ku Bapa H. Deddy Mizwar, Wakil Gubernur Jawa Barat, Bapa Iwan Purwana, General Manager PLN Distribusi Jawa Barat, Pa Herry Hasanuddin salaku Ketua LAZIS PLN, jrrd. “PLN muji kana pangabdian Guru honorér nu sakitu luhungna, pangna dina ngatik para siswa di daérahna séwang-séwangan. Mugia ku kagiatan nu digagas ku PLN tiasa janten panyumanget aranjeunna mangsa nuju ngajar. Jaga tiasa ngalahirkeun generasi nu punjul. Ku kituna miharep kaberekahan rezeki nu disisihkeun ti padamel PLN, kanggo zakat téh, tiasa masihan kontribusi keur kamajuan masarakat,” saur General Manager PT. PLN (Persero) Distribusi Jawa Barat téh.
Pamilonna nya éta Guru honorér nu geus minuhan kriteriana, kayaning; ngajar di madrasah nu aya di daérah “tertinggal”, minimal geus ngajar salila sataun tur penghasilanana maksimal Rp. 1 juta/bulan. Mémehna didata tur dikumpulkeun ku anggota LAZIS PLN di Jawa Barat, laju direkomendasikeun pikeun ngiluan pelatihan kasabit. Pematerina gawé bareng jeung Kafila Consulting. Sabada pelatihanana lekasan, pematerina masih nalingakeun tur ngaping Guru honorérna, mangsa ancrub ka masarakat.
Materi pelatihan nu disusunna téh geus disaluyukeun jeung pangabutuh Guru honorér di daérah nu tinggaleun. “Fokus nu utamana nya éta, nanjeurkeun kompetensi individu ti para guru, ku kituna jaga bisa mangaruhan lingkungan sabudeureunana, ti mimiti para siswa, sakola, insya Alloh keur sakumna masarakat nu aya di lingkunganana,” saur Pa Herry Hasanuddin salaku Ketua LAZIS PLN.
Spritual at Work, ngamekarkeun minat diajar ngaliwatan Quantum Teaching sarta manajemen kreatif, materi nu ditepikeunana téh. Salian ti meunang pelatihan ti manukna, para pesertana gé baris meunang duit pembinaan sarta alat peraga pendidikan, lamun dirupiahkeun mah gedéna téh Rp. 2,5 juta. Di sagigireun éta, pikeun tilu urang pamilon nu panghadéna baris meunang béasiswa keur nuluykeun pendidikan ka tingkat nu leuwih luhur.
Salah saurang pamilonna, nya éta Bu Mamah Suhamah (45 taun) Guru di daérah Salawu Tasikmalaya, nétélakeun, “Sim kuring ngahaturkeun nuhun ka PLN alatan ieu program téh, kalintang saéna. Kaweruh sim kuring jantén nambihan tur “terbuka” pokona mah termotivasi sangka nanjeurkeun kualitas pembelajaran. Mudah-mudahan kapayunna program sapertos kieu téh teras nambihan deui,” pokna. [MS]***
