Jajang Nurjaman, Pelatih Persib Bandung, sabada mingpin latihan Persib di Lapang Lodaya, 31 Maret 2017
majalahsora.com – Persiapan Persib dina nyanghareupan Liga Satu 2017, kasta pangluhurna kompetisi méngbal di Indonésia, kaganggu ku mudalna bobotoh nu lalajo. Babakuna, nepi ka garis lapangan lalajona téh. Konsentrasi pamaén jadi kaganggu mangsa ngalaksanakeun instruksi ti pelatih.
Anemo Bobotoh Persib, nempo latihan Persib Bandung
“Tos dua kali latihan di Lapang Lodaya (30 Maret 2017 jeung 31 Maret 2017), nu nongton kuat ka mudal. Salaku palatih tangtos kaganggu pisan, alatan jarak nu nongton ka lapang adek teuing. Kanggo pamaén Persib, jadi kararagok. Salian ti éta pamaén gé ngangluh ku kondisi lapang sintetis. Mudah-mudahan atuh tiasa saenggalna latihan di Gelora Bandung Lautan Api, atanapi lapangan jukut biasa nu repesentatif,” saur Pa Janur, sabada réngsé ngalatih latihan di Lapang Lodaya, Bandung (31 Maret 2017).
Essien & Cole nu ngalantarankeun nikelna jumlah bobotoh nu hayang ngalalajoan Persib Bandung latihan
Anémo bobotoh nu hayang ngalalajoan Persib latihan teu bisa ka pegat, sabada jolna Essien jeung Cole. Para bobotoh panasaran hayang nempo langsung béntang internasional nu ngagabung ka Persib. [MS]***
