Ahmad Heryawan Gubernur Jawa Barat
majalahsora.com, Bandung – Sacara umum PPDB SMK jeung SMA Negri taun 2017 di sakumna Jawa Barat lumangsung lancar, boh jalur non akademik, boh jalur akademik. Salian ti éta leuwih terbuka, alatan bisa ditempo langsung dina web PPDB Jabar.
Nilik kana hal kasbit, Kepala sekolah gé teu kabebanan alatan kaputusan siswa nu katarima heunteuna téh lain ditangtukeun ku sakola, tapi ku sistem nu geus dijieun ku Dinas Pendidikan Jawa Barat. Pangumuman siswa nu katarima ngaliwatan jalur akademik téh diumumkeun poé Senén, ping 10 Juli 2017, pukul 23.30, ngaliwatan web PPDB Jabar.
Sanajan lancar, tangtu masih aya kénéh kakurangan tur masalah nu disanghareupan ku balaréa. Ngaliwatan Dinas Pendidikan Propinsi Jawa Barat, Pamaréntah Prop. Jabar terus ngabebenah tur meupeuskeun masalahna.
Contona baé, ngeunaan pendaftaran, tadina mah rék sakabéhna make online, sabada ditalungtik, éta kawijakan téh dirobah, tungtungna maké sistem setengah online. Alatan teu kabéh daérah boga fasilitas IT nu hadé tur can walatra. Salian ti éta, réa orang tua siswa nu teu apal cara daftar sacara online.
“Sim kuring muji kana kinerja tim PPDB taun 2017 ayeuna, nu dikokolakeun ku Disdik Propinsi Jawa Barat. Sanaos masih aya kakiranganana, mung sacara umum mah tos saé. Ayeuna mah beban Kepala Sekolah gé teu kabebanan, sapertos taun-taun kapengker. Tangtos aya sababaraha hal nu kedah diropéa,” saur Ahér, Gubernur Jawa Barat, sabada réngsé jadi Inspektur Upacara HUT Bhayangkara nu ka-71 taun, Senen 10 Juli 2017.
Sabada pangumaman katampa heunteuna, sok aya baé orang tua siswa nu kuciwa, salah sahijina ku sistem PPDB taun ayeuna. Nempo éta hal, Ahér nétélakeun sangkan orang tua siswana ngurus hal kasabit ka sakola nu dijugjug, ambéh dibéré informasi nu jelas tur sagancangna bisa diréngsékeun. “Lamun aya nu macem-macem boh pihak sakola, boh pihak Dinas Pendidikan kari laporkeun baé, éngké baris dibéré sangsi,” pokna. [SR]***
