Dr. Ir. Ahmad Hadadi, Kepala Dinas Pendidikan Propinsi Jawa Barat
majalahsora.com, Kota Bandung – Salaku Kepala Dinas Pendidikan Propinsi Jawa Barat, Ahmad Hadadi ngadeudeul pisan kagiatan-kagiatan nu aya tumalina jeung penguatan karakter bangsa, salah sahijina nya éta kagiatan Idul Qurban di unggal SMA jeung SMK nu aya di sakuliah Jawa Barat.
“Sim kuring muji ka Kepala Sekolah Guru, SMA sareng SMK anu ngayakeun pembelajaran ngeunaan manasik haji atanapi meuncit sato qurban di sakuliah Jawa Barat, dina raraga miéling Hari Raya Idul Qurban” cék Ahmad Hadadi, basa tepung di SMAN 24 Kota Bandung (Senén 4 Séptémber 2017) téh.
Anjeunna gé nétélakeun, “Yén umat Islam téh ngabogaan Hari Raya salian ti Idul Fitri, nya éta Idul Adha. Dipiharep para siswa ,utama nu muslim jadi apal, ajén Idul Adha. Sacara émosional mageuhan tali batin jeung nu ngalaksanakeun ibadah haji di Tanah Suci, kayaning nu keur wukuf, lempar jumroh, jsté. Mangka nu di Indonésia ngucapkeun kalimah takbir tahlil ogé ngajalankeun syariah Islam, nya éta meuncit sato qurban pikeun nu mampu. Keur para siswa jadi bekel tur apal kana bagbaganana.”
Salian ti éta Hadadi nétélakeun ngeunaan pelaksanaan meuncit sato qurban di sakola,“Di lingkungan masarakatna panginten arang langka, siswa téh ancrub mantuan langsung dina kagiatan meuncit sato tur ngabagikeun sato qurban. Tapi lamun pelaksanaanana di sakolana masing-masing, minimal para siswa teu kagok tur sacara langsung ancrub aktip kalibet, ti mimiti nempo sato nu rék dipeuncit, nyerit kulit, ngarecah, nimbang tur ngabagikeun daging ka warga nu kurang mampu, tangtu waragadna teu meunang matok ka siswa/orang tua siswa, sidkoh saridona baé. Pokona mah ajén pangorbanan Kanjeng Nabi Ibrahim téh, népa ka para siswa pikeun numuwuhkeun jiwa sosialna dina berqurban. Keur ekonomi masarakat gé jadi kawantu alatan nu ternak sapi atawa domba sacara ékonomi jadi ngaronjat , alatan panénna sataun sakali mangsa Idul Adha.”
Sacara umum mah kagiatan kasabit téh kalintang réa mangpaatna ti batan madorotna. Komo bari dipraktekkeun jadi lain saukur téori. Kadisdik gé ngalelempeng ngeunaan kagiatan qurban di sakola, hususna di SMA jeung SMK alatan éta téh bagéan tina pembelajaran Pendidikan Agama Islam. Ku kituna para siswa jadi leuwih cinta ka agamana, rosulna ogé ka Alloh SWT. [SR]***
