Kepala SMPN 23 Kota Bandung
Sobat Sora, urang lenyepan kiprah Pa Agus Déni Syaéful dina program-programna, nataharkeun tur ngeureuyeuhkeun sakola digital. Eta program téh dina nyikepan téhnologi jeroning dunya atikan kiwari. Boh widang desiner, pabukon turta pangajénan. Nanjeurkeun UKS wilayah barat. Ngawedalkeun program digital class gawé bareng jeung SEAMEO skala Asia Tenggara. Ngahangkeutkeun ujian dalam jaringan (UDJ) rempeg sa-wilayah Bandung kulon, nu geus lumangsung salila 3 bulan sarta diiluan ku siswa-siswi ti luar negeri. SMPN 23 ngarupakeun kordinator UDJ, gawé bareng reujeung para siswa ti luar Jawa, di antarana 12 sakola negeri, 60 deui sakola swasta sarta sakabéhna ngagunakeun fasilitas digital class. Anapon palajaranana diutamakeun widang studi IPA, Basa Inggris, Basa Indonésia, Matématika tur TIK.
Satuluyna Pa Agus ngeprak para siswana utamana kelas VII, VIII jeung IX geusan ngabiasakeun ulangan harian, kalawan fasilitas digital turta ngahiap kapentingan atikan ujian reureujeungan siswa ti mancanagara (Malaysia, Vietnam, Myanmar, jrrd). Soal-soal ujianana beunang ngarumuskeun tim MGMP (Musyawarah Guru Mata Pelajaran). Kaceluk wéh dina hal ieu, yén Bandung ngarupakeun model puseur picontoeun ulangan digital class anu langsung dijonghokkan ku Mendikbud (Menteri Pendidikan & Kebudayaan).
Ngeunaan tantanganana, Pa Agus gé ngadadarkeun yén kamampuh IT para guru masih kawatesanan, disagédéngeun fasilitas anu acan maksimal. Parandéné kitu inyana tetep gedé harepan geusan ngajadikeun sakola anu dipingpinna, salaku sakola anu ngagem karakter, luhung budi pakerti, nanjeurkeun budaya sarta nincak dina tatapakan IT.
Diwuwuh ku gedur harepanana, geusan ngajadikeun SMPN 23, umumna sakabéh sakola nu aya di Kota Bandung cohagna mah sa-Indonésia. Ku mesatna dunya téhnologi téh bisa leuwih “berkualitas” luhur ajén tur pangajén teu tinggaleun ti nagara deungeun.
Kiprah Pa Kepala teureuh Ciwidéy ieu, tangtu dirojong ku para guru turta para siswa-siswi sakumna. Ayana apingan digital class geus ngabantu ulangan bisa di mana waé ngagawéanana ogé ngalatih getapan dina maluruh solusi hiji masalah.
“Alhamdulillah ku program digital class janten langkung betah di sakola janten teu gaptek sareng langkung rileks. Salian ti éta guruna balageur, turta soméah lanceuk kelasna, “ cék Muhammad Candra Dimulya (kelas VIII-H), Dini Oktavia Kusumawardani (Kelas VII-H), Salwa Agustin(Kelas VIII-G). [MS]***
