Bapa Bambang Setiadi, M.Sn, Kepala SMKN 14 Kota Bandung
Sobat Sora, urang ngawanohan SMKN 14 Kota Bandung ti kadekeutan. Kabeneran Sora bisa nepangan Kepala ieu sakola, nya éta Bapa Bambang Setiadi, M.Sn, anu mancén tugas ti bulan Juni 2015. Kawitna, Pa Bambang janten Kepala SMKN 15Kota Bandung (2013-2015) sarta kungsi janten guru di SMKN 10 Kota Bandung salila 26 taun. Pa Bambang nu ngarangkep salaku guru seni jeung musik, aub salaku juru tiléy ujian prakték musik turta pangarang tembang (pencipta lagu) salah sahijina hymne SMKN 14 Kota Bandung.
Bengkel Kerajinan Tekstil
SMKN 14 Bandung matéahkeun tur ngajarkeun kaahlian seni rupa, kria jeung téhnologi kalawan rojongan Dunia Usaha jeung Industri. Boh dina pangajaranana boh dina makihikeun (ngarahkeun) kalulusanana. Teu ngan saukur diajar di wewengkon sakola, tapi ogé prakték gawéna di pausahaan-pausahaan anu rélévan. Lulusanana nyebar ka pirang-pirang paguron luhur(perguruan tinggi) jeung ka dunia usaha/industri. Disayagakeun ogé jalur bidik misi keur sing saha waé peserta didikna anu nyongcolang dina préstasi. Para siswa-siswi anu miharep gawé, keur mosisikeunana dirojong ku Disnaker ngaliwatan Bursa Kerja Khusus (BKK) luyu reujeung kualifikasi anu disyaratkeun ku pausahanana. Keur anu minat kana wirausaha, dibekelan katerampilan ngaliwatan KWU jeung prakték kerja industri dina widangna séwang-séwangan.
Drs. Anang Bisawaro (Guru Tekstil), nuju nembongkeun sablonan karya siswa SMKN 14
Visi SMKN 14 nya éta, geusan jadi sakola unggulan. Sawatara misi-na nataharkeun calon tenaga kerja tingkat madya widang seni rupa, kria jeung téhnologi sacara professional. Salian ti éta produktif jeung mibanda budaya cengeng kana gawé (kerja keras), tartib jeung berséka. Di sagigireun éta ngawujudkeun insan unggulan anu jujur tur mandiri, dumasar motto, Unggul Dina Préstasi, Santun Dina Perilaku.
Bengkel Kerajinan Keramik
Manajemen jeung sistim atikanana ngagunakeun management system ISO 9001: 2008 turta mibanda sertifikat ti TUV Rheinland. Atikanana dumasar kana sistim anu natapakan kana komputerisasi, Link & Math boh tiori boh praktékna salila 3 taun campleng, sa-semester Prakték Kerja Industri. Juru atikna (guru pengajar) dijamin profésional wedalan UPI, ITB, ISI, jrrd kalawan kualifikasi D-4, S-1, S-2 jeung S-3.
Bengkel Kerajinan Kulit
Profil pakét kaahlianana ngawengkuL: Tehnik Perbaikan Bodi Otomotif, Multimedia, Desain Komunikasi Visual, Animasi, Desain & Produksi Kriya Tekstil, Desain & Produksi Kriya Kulit, Desain & Produksi Kriya Keramik, Desain & Produksi kriya Logam, Desain & Produksi kriya Kayu.
Mitra industri-na: PT Auto 2000 (Astra-Toyota)-Bandung, PT Auto Cemerlang-Bandung, PT Kupu-kupu malam Auto Fashion-Jogjakarta, PT Telkom Bandung, TVRI-Bandung, LPM USDI ITB-Bandung, PT. Pikiran Rakyat-Bandung, PT. BISMI-Bandung, PT. Dagadu-Jogjakarta, PT. Batik Komar-Bandung, PT. Batik Winotosastro-Jogjakarta, PT. Al-Ikhsan-Bandung, PT. Matahari Terbit-Bandung, PT. Salim Silver-Jogjakarta, Primarindo Tbk-Bandung, PT. Narista-Bandung, PT. Clubman “Tegep Boots” Bandung, C-59 Bandung, Tiera Hejo-Bandung, Balai Besar Keramik-Bandung, PT. Genta-Bandung, PT. Jogja Indah Global-Jogjakarta, CCA Cimahi, Jrrd.
Bengkel Kerajinan Logam
Drs. Dede Rahmat, M.Ds, Guru Kria Logam, nuju mamerkeun watang batu ali (akik) beunang siswana
Ekskul SMKN 14 teu éléh euyeub. Utamana geusan nyalurkeun bakat, minat turta hobi para siswa-siswina. Disayagian wadah kagiatan dina panangtayungan OSIS, di antarana: Pramuka, PMR, Paskibra, Yudo, Badminton, Futsal, FUI, PA, Téater, Animasi, Seni Lukis, Jurnalis, Baskét, Voli jrrd. Keur para siswa-siswi anu nyangking préstasi nyongcolang disadiakeun béasiswa ti pamaréntah pusat/daérah ogé ti para donator (BAWAKU, BAGUS, BKM, Béasiswa Khusus Seni Rupa & Kria (BKK) Supersemar, Guru Peduli, Yayasan, jrrd.
Bengkel Teknik Perbaikan Bodi Otomotif
Pa Bambang anu hobina kana “bermusik” ngupayakeun ronjatan kualitas atikan luyu reujeung Kurnas (Kurikulum nasional), ngarojong para peserta didikna dina pirang-pirang lomba jeung LKS (Lomba Keterampilan Siswa). Berekah saurna, dina waktu anu moal lila deui baris miang ka Kota Malang, sawatara widang seni lukis/grafisna jadi wawakil Bandung di Bogor.
Pa Jose I, Waka. Kesiswaan
Drs. Nana Sutedjo, Waka. Sanpras
Drs. Ari Ahadrian, M.Ds, Waka. Hubin/Humas
Drs. Yulian TS, Waka. Kurikulum
Drs. Deden Bambang
Drs. Wahyu Nugraha, M.Ds, WMM (Wakil Manajemen Mutu)
Drs. Bambang Subarnas, M.Sn, Ketua Unit ICT
Program ieu pupuhu anu nyunda pisan, di antarana dina ngupayakeun fasilitas sakola nu leuwih hadé, nya éta keur ngeureuyeuh ngokolakeun kalengkepan sarana jurusan animasi. Utamana perangkat komputer anu ngadeudeul pisan kana kompeténsi pembelajaran. “Harepan anu kacida urgéntna hayang ngawangun studio animasi geusan kalancaran para siswa ngawujudkeun filem animasi anu ayeuna geus dilalanyahan. Sok sanajan saheulaanan mola kana SPM (Standar Pelayanan Minimal) paling copel para siswa jurusan animasi mibanda karueus kana jurusan anu diteuleumanana. Utamana mah ngimbangan pangajaran konvensional ku perangkat digital,” kitu saur Pa Bambang anu ayeuna nganjrek di Tutugan Manglayang (Cinunuk).
Siswi SMKN 14 Kota Bandung
Ngagilek kana program insprastruktur, Pa Bambang negeskeun geus gereget hayang ngaréngsékeun wangunan masjid sakola. Basa Sora ngolongan ti mana waé waragad masjid anu sakitu piagréngeunana téh? Pa Bambang anu mahér nyiptakeun lagu, salah sahijina hymne SMKN 14 (hymne SMKN 13 Kota Bandung & SMPN 48 Kota Bandung, ogé hasil ciptaan anjeunna) giak nambalang. “Alhamdulillah waragad masjid téh dongkap ti para donatur warga sakola jeung donatur ti luar sakola, direugreugan ku kasumangetan warga sabudeureun sakola seja aub ngarojong. Matak reueus tur ngangres yén para guru SMKN 14 saheuyeukan ngayakeun lélang jariyah, Bapa muji syukur. Kituna apanan sugri juru atik pada mafhum kana udagan kurnas anu ngamata holang kana pangwangunan karakter spiritual utamana papagon Agama Islam,” saur Pa Bambang deui daria.
Masjid SMKN 14 Kota Bandung dipiharep tereh rengse
Harepan ieu Kepala SMKN 14 anu dieuyeuban ku 1048 siswa-siswi ti salapan kompetensi kaahlian, 93 guru pleus 20 TU tur caraka, taya kajaba sangkan hasil prakték karya siswa-siswi hususna widang kria seni rupa layak jual di pasaran.
Kantor SMKN 14 Kota Bandung
Sobat Sora, dina tungtung wangkongan, Pa Bambang negrakkeun pangharepan binarung kebekna jiyad pangdunga anu matak kataji sing saha anu ngalenyepanana; Hayang barudak bijilan SMKN 14 masing saroléh, mampuh ngawarnaan ajén-inajén kahirupan sapopoéna, boh keur dirina boh keur lingkunganana. [MS]***
