Hj. Ais Widaningrum, S.Pd, M.M.Pd, Kepala SMPN 24 Kota Bandung
Bojongloa Kalér – Sobat sora, kagiatan PPDB (Penerimaan Peserta Didik Baru) taun pelajaran 2016-2017 jalur non akademik keur tingkatan SMP Negri di Kota Bandung, dibuka ti tanggal 15 Juni nepi ka 18 Juni 2016. Patalina jeung hal éta, poé Kemis (16/6/2016) pasisiang Majalah Sora ngadongdong ka SMPN 24 Kota Bandung, nu pernahna di Jalan Sukamulya No. 33, Kelurahan Sukaasih, Kecamatan Bojongloa Kalér.
Kagiatan PPDB jalur non akademik di sakola nu dipingpinan ku Hj. Ais Widaningrum, S.Pd, M.M.Pd, téh lumangsung lungsur langsar. Sok sanajan aya waé nu dalaptar téh can lengkep mawa persyaratanana. Ngan hal kitu téh ku Bu Ais mah, masih dibéré toléransi. Saheulaanan mah ditampa ku panitia arsipna téh. Komo keur nu jalur RMP (Rawan Melanjutkan Pendidikaan/afirmasi) mah.
“Alhamdulillah proses PPDB jalur non akademik taun 2016-2017, dugi ka danget ayeuna (Kemis 16/6/2016) lungsur langsar. Sateuacanna sepuh siswa nu badé ngadaftarkeun palaputrana ka SMPN 24 téh, tos dipaparin informasi ti sakola asalna. Sanaos sok aya waé nu teu acan paham, mung masih dina wates kawajaran. Utamana kanggo jalur RPM/afirmasi, ku Ibu teu dihésé-hésé, nu penting tos aya rapot, tos ngeusian formulir, sésana tiasa nyusul. Mugia wé lancar dugi ka réngsé, amin,” saur Ibu Ais, nu soméah téh.
Pa Engkos Koswara, S.Pd, Ketua PPDB taun pelajaran 2016-2017 SMPN 24 Kota Bandung
Nempatan hiji rohang kelas tempat pendaftaranana téh, tukangeun rohang kepala sekolah. Nepi ka poé Kemis pasisiang, jumlah nu daftar ngaliwatan jalur non akademikna geus aya 62 urang, 3 urang ngaliwatan jalur undang-undang guru sésana jalur RMP. Jumlah panitia PPDB di SMPN 24 Kota Bandung aya 10 urang, gabungan guru sareng padamel TU. Nu jadi pupuhana nya éta Pa Engkos Koswara, S.Pd, guru nu ngarangkep janten Waka. Kurikulum. Dina taun pelajaran 2016-2017, SMPN 24 Kota Bandung baris narima kurang leuwih 396 urang siswa anyar, nu dibagi kana 11 kelas. [MS]***
