Sobat Sora, poé Rebo ping 18 Mei 2016, lapangan SMKN 6 Bandung ubyag ku geder pintonan kréasi para siswa jeung siswina. Harita téh keur lumangsung kagiatan paturay tineung para peserta didik kelas XII anu geus lulus tina UN-na. Méméh kagiatan resmi prosési wisuda jeung pelepasan, panggung kréasi seni diramekeun ku baragem seni islami, tim nasyid jeung tim marawis SMKN 6. Saterusna Ketua Pelaksana Kagiatan jeung Ketua OSIS negrakkeun biantara amit mundur.
Pa H. Ramdan, S.Pd, M.Si (kadua ti katuhu) Kepala SMKN 6 Kota Bandung
Pa Dédén Héndi, S.ST., Waka Kesiswaan (katilu ti katuhu), Pa Amrih Wiyono, S.Pd., Waka. Humas/Hubin & Pa Kosim, S.Pd., M.Pd., Waka. Kurikulum
Hébatna, saméméh prung upacara adat ti lingkung seni SMKN 6, diayakeun heula siraman ruhani ti mubaligh muda, Ustadz H. Farid alias Kang Dafa. Dina ceramahna anu adumanis jeung galindeng solawat pirigan hadrah, Kang Dafa ngabéjérbéaskeun kumaha pentingna élmu pangaweruh tepi ka Gusti Alloh katut Rosul-Na mosisikeun kalungguhan luhur ka umatna anu ngemban jeung sapanjang hirupna ngulik tur neuleuman kaélmuan. Uthlubul Ilma Walau Bish–Shin, prak udag élmu pangaweruh masing tepikeun ka Nagri China ogé, kitu cék ungkara Islami nu dikutip ku Kang Dafa.
Ustadz H. Farid alias Kang Dafa
Pa Ramdan & Ust. Dafa
Ieu kagiatan paturay tineung dihadiran ku kepala bidang SMA/SMK dinas pendidikan Kota Bandung, Ibu Hj. Rita, para guru jeung sakabeh siswa ti kelas X-XI-XII, komite sekolah, para tamu ondangan, katut ka para awak media jeung insan pers, saperti Majalah Sora, majalah Bandung Juara, Bandung TV, PJTV jeung TVRI. Kepala SMKN 6 Bandung, H. Ramdan, S.Pd, M.Si, nandeskeun dina pangabagéana (sambutanana) kacida ngarojong ka para peserta didikna sangkan teu eureun ngulik pangarti nyusuk pangaweruh geusan ngigelan kamajuan jaman anu mesat ngabelesat. Paturay tineung maneuh di sakola mah ukur paseu di mana para peserta didik kudu leuwih soson-soson diajar boh ngalanjut ka perguruan tinggi atawa ngawangun wirausaha.
Salulusna para peserta didik ti SMKN 6, ditungtut tilu tahapan garapan, wirausaha saterusna kuliah bari matéah ngagedékeun usaha, puncakna kakarak ngawujudkeun pangupa jiwa (profési). Alatan éta, pihak sakola geus mekelan élmu pangaweruh jeung katerampilan dumasar kamampuan nu diajarkeun sangkan lulusan SMKN 6 mibanda kayakinan sayaga geusan ngaliwatan paseu résiko di lapangan. Nyoal kana kamandangna dina nyikepan prosési paturay tineung peserta didik kelas XII, H. Ramdan, S.Pd, M.Si, nandeskeun yén SMKN 6 geus biasa jeung lumrah ngayakeun acara-acara gedé malah mah geus maneuh dipercaya sabagé pasilitator acara resmi. Tapi anu kudu diukir dina kaweningan ati para peserta didik taya kajaba sangkan teu lésot kanyaah ka almamater. Tatalépakeun ka adi-adi kelas geusan ngantengkeun tali mimitran ka warga sakola.
Disambung ku biantara Dra. Hj. Rita hardyani, M.Ed, Kabid PSMAK Disdik Kota Bandung, anu enerjik kebek sumanget tur kareueus. “SMKN 6 Bandung, pasti Bisa! SMKN 6 Bandung juara. SMKN 6 Bandung mémang luar biasa!” Kitu yél-yélna Ibu Kabid téh. Mun dibanding jeung SMK-SMK séjénna, acara paturay tineung SMKN 6 Bandung, mémang pangunggulna boh dina pintonan senina boh dina kaahénganana. Malahan dina jumlah kalulusan, SMKN 6 Bandung tétéla pangeuyeubna sa-Jawa Barat malahan bisa disebutkeun panglobana sa-Indonésia, tepi ka ngaraéh angka kalulusan leuwih ti 600 kalulusan. Hal ieu patut diacungan jempol lantaran kacida ngarojongna kana program pamaréntah, “Bandung Juara”, “Bandung Masagi” jeung “Jawa Barat Kahiji”. Genep jurusan anu dikokolakeun SMKN 6 Bandung geus bukti geusan ngawujudkeun genep lahan peluang tenaga kerja. Boh di sarakan (dalam negeri) atawa di pangumbaraan (luar negeri) saperti di Jepang, Koréa jrrd. Genep jurusan kasabit nyatana Arsiték (TGB), Sipil (TKK), Téhnik Audio Video (TAV), Téhnik Permesinan (TPM), Téhnik Kendaraan Ringan (TKR) jeung Téhnik Instalasi Pemangfaatan Tenaga Listrik (TIPTL).
“Yén udagan juara satemenna kudu disikepan ku rasa syukur. Syukur ka Nu Ngusik-malikkeun urang tegesna Dzat gusti Alloh. Mangkana, disagigireun neuleuman élmu pangaweruh umum, prak baca Alquran sabab nya Alquran pisan sumberna sagala élmu pangaweruh teu wungkul ngaguliksek bag-bagan kaahératan. lulusan SMKN 6 kudu jadi juara boh di dunya boh di ahératna. “Jawa Barat Kahiji, Bandung Juara, SMKN 6, Bisa!” Kitu yél-yél pupungkas biantarana ti Bu Hj. Rita.
Dra. Hj. Rita hardyani, M.Ed, Kabid PSMAK Disdik Kota Bandung
H. Ramdan, S.Pd, M.Si, Kepala SMKN 6 Kota Bandung
Sora ogé nyadap kamandang para peserta didik lulusan 2015-2016, ti kadeukeutan, di antarana Méliyanti, kelas XII TGB 3, urang Jalan Kawaluyaan Indah. “Di SMKN 6, leubeut ku panineungan anu teu tiasa ditataan ku cariosan. Suka, duka, sedih sareng bingah ngawarnaan kahirupan salami tilu taun campleng. Ogé teu hilap seja ucap nuhun anu saageung-ageungna ka para guru. Teras peupeujeuh ka para adi kelas X-XI-XII supados langkung ngaronjatkeun komara SMKN 6, jaga tur mumulé nama baikna. I Love You SMKN 6.” Kitu cék Méliyanti anu kungsi jadi model dina cover Malajah Sora.
Ilham. R, kelas XII TGB 1, urang Jalan Saluyu anu zodiakna Taurus. “Kagiatan paturay tineung di SMKN 6 teu kinten saé sareng sangat menarik, Moal tiasa dilésotkeun tina émutan,” cék Ilham nu resep olah raga sarta pavorit ka pesépak bola Zidane.
Méliyanti anu kungsi jadi model dina cover Malajah Sora
Salila tilu taun katempa ku pangalaman pibekeleun hirupka hareupna. Siswa Muhammad Alfiansyah, kelas XII TGB 1 ti Pangaléngan nu zodiakna pisces mah béda deui kamandangna téh,” SMKN 6 tiada tara, Bro!” SMKN 6 téh imah kadua anu ngabekaskeun panineungan dina lalurung kahirupan. “Di dieu, di SMKN 6, salian ti nyuprih élmu pangarti ogé mencari cinta, ka seorang gadis (siswi SMKN 6), anu tepikeun ka ayeuna can kalaksanakeun,” cék Muhammad Alfiansyah bari ngagakgak tapi bangun sedih. [MS]***
