Sobat Sora, yu urang jalan- jalan ka Amsterdam, Belanda. Di ditu loba pisan patempatan anu narik ati tur méré luang ka nu ngadongdonna. Contona waé Museum van Loon, Dam Square, De Bijnkorf, Bloement market, Noorder market, jste. Aya hiji gedong nu ngaranna Museum Van Gogh. Di dieu dipamérkeun puluhan lukisan karya para pelukis dunya. Ti luar mah kawas kalolobaanana wangunan di Eropa, antik jeung artistik. Malah asup kana basajan atawa sederhana. Saliwat mah teu bangun dieusian ku barang nukacida berhargana.
Basa sup ka éta gedong, urang disuguhan puluhan karya pelukis dunya. Wangunanana aya sababaraha rohangan. Karya van Gogh-na sorangan, dijajarkeun sarohangan Di antarana nu pangkasohorna téh, judulna Panen Kentang. Ari judul aslina The Potato Eaters, kaluaran taun 1885. Ari Van Gogh téh boga adi pengusaha barang seni. Salian ti majangkeun karya-karya seni nu séjén, karya- karya van Gogh gé dikumpulkeun di gedong tempat manéhna majang barang seni jualeun. Kitu deui karya lukis seniman saangkatanana, ti sababaraha nagara. Di antarana ti Jepang. Ieu gedong dibukana taun 1999. Sabada direnovasi ku arsitek ti Jepang Kisho Kurokawa. Malah ditambahan ku rohangan anu wangunna elips. Dina taun 1990-an lukisan téh kungsi aya nu leungit. Tapi cék béja kapanggih deui. Ti harita kaamanan ka ieu gedong beuki ditingkatkeun.
Di rohangan séjén aya tempat husus ngajualan fotocopian lukisan anu terkenal, saperti Van Gogh, Rembrant, Picasso, jrrd. Teu wudu pada ngadongdon. Da nu resep kana lukisan mah pasti hayang boga karya para seniman kameumeutna. Hargana henteu pati mahal, jeung kualitasna gé hadé. [MS] ***
