Balééndah – Dina nyanghareupan taun ajaran anyar 2016-2017, SMAN 1 Balééndah ngayakeun kagiatan IHT pikeun guru-guruna. Lumangsung ti poé Kemis nepi ka Jumaah (14 Juli-15 Juli 2016). Diiluan ku 76 guru, ti pukul 08.00 nepi ka pukul 15.00, leuwih. Dina ieu kagiatan para guruna hadir tepat waktu.
Poto kénca ka katuhu: Pa Egi margiana, S.Pd., (moderator), Dr. Asep Jolly, M.Pd., (penyaji), Drs. Aa Sudaya, M.Pd.,(Kepala SMAN 1 Balééndah)
Dina IHT taun ayeuna aya hal anyar nu kudu ditepikeun ku para penyaji/pendamping, pangpangna ngeunaan kerangka pengembangan, perbaikan dokumén, implikasi révisi kurikulum 2013, kerangka sistem pembelajaran, tahap implementasi, jeung salian ti éta.
Bu Endah Purwanti, S.Pd., M.M.Pd., (penyaji & sékrétaris kagiatan IHT)
Poto kénca ka katuhu: Kang Ule, Hj.Rita & Pa Odang TU SMAN 1 Balééndah Kabupatén Bandung
Tempatna dibagi tilu rohangan, aya nu di kelas A (Pelajaran IPA), B (Pelajaran IPS, PAI, Penjaskes) jeung C (Pelajaran Bahasa, Seni jeung BK). Penyaji atau pendampingna nya éta, Pa Udung Jumara (Kepala UPTD Wilayah II), Dr. Asép Jolly, M.Pd., (Pengawas SMA/SMK Dinas Pendidikan & Kebudayaan Kabupatén Bandung), sarta guru-guru ti SMAN 1 Balééndah, nya éta: Bu Endah Purwanti, S.Pd., M.M.Pd., & Pa Dédi Mulyadi, M.Pd. Kelas fasilitatorna aya Bu Imas Mirawati (kelas A) , M.Pd. Bu Komala Hadiati (kelas B), S.Pd., M.M.Pd., sareng Ibu Pancasariwarni, S.Pd., M.Pd (kelas C). Nu janten moderatorna Pa Egi Ergiana, S.Pd., salaku Waka.Humas.
Tujuan kagiatan kasabit téh dina raraga ngaronjatekun ajén diajar mengajar di SMAN 1 Balééndah. Dina pembelajaran taun ayeuna siswana ditungtut leuwih aktif, kitu ogé guruna kudu leuwih kréatif. Salah sahiji program nu baris dilaksanakeun di SMAN 1 Balééndah, nya éta budaya literasi.
“Insya Alloh di SMAN 1 BE, budaya literasi baris laksana dina taun ajaran 2016-2017. Luyu sareng pangalaman Ibu basa ka Australia, di nagri kangguru mah, budaya maca téh geus ditanceubkeun ti TK mula. Lain saukur maca tapi kudu ngarti eusina. Programna, nya éta maca salami 15 menit méméh diajar. Bahan bacaanana tiasa maca novel, buku agama, sains, koran, jeung bacaan séjénna. Kapayunna diunggal kelas kedah gaduh perpustakaan kelas, salian ti éta badé dilombakeun.,” saur Bu Endah, salaku sékrétaris kagiatan IHT taun 2016-2017.
Bu Yultin TU SMAN 1 Balééndah
Balik deui kana kagiatan IHT, sakola nu dipingpin ku Drs. Aa Sudaya, M.Pd., téh, miharep ku ayana IHT taun ayeuna, kabéh guru bisa paham kana kurikulum nu anyar, guru-guru bisa ngaimplementasikeun parobahan kurikulum nu anyar, kasusun dokumen kurikulum nu rapih, peningkatan mutu pendidik tur siswana, jeung réa-réa deui. [MS]***
