Bu Elly Harlina mangsa tepang sareng Pa Jokowi, Presidén Republik Indonésia
majalahsora.com – Sobat Sora urang wawanohan yu jeung Kepala Sekolah anyar SDN Sukaraja Kota Bandung. Jenengan lengkepna Ibu Elly Halia, nénéhna mah Ibu Elly, Tempat tanggal lahirna di Bandung, 15 Maret 1970.
Bu Elly, salaku Kepala Sekolah definitif, siap mertahankeun tur ngamajukeun SDN Sukaraja Kota Bandung
Diangkat janten Kepala Sekolahna basa ping 23 Maret 2017, dilantikna ku Walikota Bandung, Bapa Ridwan Kamil, tempatna di lapang upacara Pemkot Kota Bandung. Anjeunna téh kalebet 70 guru SD negri nu kakara diangkat jadi Kepala Sekolah.
Guru-guruna siap ngadeudeul program Kepala Sekolah
Méméh janten Kepala Sekolah, Bu Elly kantos ngawulang didua sakola, nya éta di SDN 4 Bojonggédé Bogor jeung SDN Ciporéat Kota Bandung. Munggaran diangkat janten PNS-na mangsa taun 1999, basa janten guru di Bogor. Di Kota Hujan-na beunang tilu taun. Sabada éta ngalih ka SDN Ciporéat Kota Bandung basa taun 2001, nepi ka diangkat jadi Kepala Sekolah.
Kaayaan di jero kelas
Ayeuna Bu Elly ngokolakeun sakola nu pernahna di Jalan Terusan Pasteur, gugus 10, Kecamatan Cicendo. Asupna ti poé Senén nepi ka poé Saptu ti pukul 07.00-12.00. Jumlah muridana aya 100 urang. Jumlah guruna aya dalapan urang, ngawengku guru kelasna limaan, guru olahraga jeung guru agama masing-masing saurang.
Kaayaan lapang sakola
Wangunan kelasna aya genep. Rohang PKG hiji, rumah dinas penjaga sakola hiji, wc murid hiji, wc guru hiji, lapang olahraga hiji, pabukon hiji, sarta rohang uks hiji.
Lamun nilik tempatna mah, SDN Sukaraja téh kaasup nu lalega (1350 m2). Ngan lamun nempo sarana prasarana jeung wangunana mah, matak prihatin. Eta wé basa Majalah Sora nempo langsung ka ditu (Saptu, 15 April 2017), aya wangunan nu geus rugrug jeung téréh rugrug. Sakola gé can boga infokus hiji-hiji acan.
SDN Sukaraja nu acan boga pager gerbang sakola
Wangunan nu geus rugrug mah, nya éta bénténg sakola gigireun rohang kelas genep, ayeuna ditutup ku asbés. Ari nu téréh rugrug mah nya éta rohang UKS-na. Salian ti éta sakolana gé can dipager, jadi barébas jalma nu asup ka sakola téh.
Di sagigireun éta, lamun mangsa usum hujan, sakola sok kacaahan, alatan mudalna cai pamiceunan ti jalan. Da sakolana aya di handapeun jalan gedé. Pokona mah, asa anéh aya sakola negri di tengah kota tapi pikawatireun.
Benténg sakola nu rugrug ditutup ku asbés urut
Sanajan loba PR-na, Bu Elly salaku Kepala Sekolah wanoja, boga cita-cita nu luhung, saprak mancén tugas di ieu sakola, geus aya sababaraha program nu ditatahar. Di antarana ngahangkeutkeun gerakan sholat Duha berasama, gerakan pungut sampah, senam bersama unggal poé Kemis, méméh diajar maca surat pondok Al Quran, maca Asmaul Husna sarta nyanyi lagu Indonésia Raya.
Kaayaan rohang UKS nu teréh rugrug
Dina taun ajaran anyar 2017-2018, Bu Elly nargetkeun bisa nampa 60 siswa kelas hiji anyar keur dua kelaseun. “Taun kapengker mah nguping wartos sakola téh badé bubar, alatan nu badé daftar ka SDN Sukaraja téh kirang pisan,” saur Bu Elly, nu boga motto Hari ini harus lebih baik dari hari kemarin téh.
Biodata
Jenengan lengkep: Elly Herlina. TTL: Bandung 15 Maret 1970. Carogé: Bapa Yudi Harjana, S.IP. kagungan putra dua. Sakola: SDN 4 Cibiru Ujung Berung, lulus taun 1983. SMPN 2 Ujung Berung ayeuna mah SMPN 1 Cileunyi, lulus taun 1986. SPGN (Sekolah Pendidikan Guru Negeri) 1 Kota Bandung, lulus taun 1989. Kuliahna di D-2 UPI (Universitas Pendidikan Indonésia) jurusan PGSD (Pendidikan Guru Sekolah Dasar), lulus taun 1997. S-1 di UPI jurusan PGSD, lulus taun 2003. [MS]***
