Sobat Sora, rada hélok samangsa ngadongdon ka SMKN 8 Kota Bandung, lantaran pupuhuna saurang wanoja. Tangtu mibanda kaunggulan mandiri matak kitu ogé. Ku kituna yu Sobat Sora urang ngobrol singget sareng anjeunna, ngalenyepan program-programna salila ieu. Dra. Euis Purnama, M.Pd., anu dialih pancén dina tanggal 14 Desember 2012 nanging prung damelna tanggal 9 Januari 2013. Diémbohan nami Purnama, cenah kadeudeuh sepuhna nu landep pisan kana maos Wawacan Purnama Alam, disagédéngeun tangtuna ogé aya hikmah tur palsafah kumaha ketak bulan purnama nu nyaangan alam marcapada katut saeusina.
Di SMKN 8 Kota Bandung aya opat pakét kaahlian, TKR (Teknik Kendaraan Ringan), TSM (Teknik Sepeda Motor), TKB (Teknik Kendaraan Berat) pleus Paket Keahlian Teknik Pendingin Tata Udara(AC). Tah anu pakét keahlian teknik pendingin tata udara, mangrupa program tambahan Bu Euis. Eta téh satutas ngaliwatan analisa tur riset anu jero. Tétéla samangsa dibuka (sakelas husus, 2015-2016) geuningan euyeub siswa nu minatna, 30 siswa mah jul-jol teu bangga nyiar. Atuh keur guruna gentak ngumaha ka UPI, malahan guru TKR gé ngilu turun ngajar.
Bu Euis parigel pisan dina widang ngaléng sababaraha pausahaan mitra gawé, utamana pausahaan Daikin jeung Rezia. Sagancangna tatahar ngadamel program kagiatan sakola jangka pondok, geusan ningkatkeun out put ngajagokeun siswa didikna. Cita-citana tina hayang ngawujudkeun kelas industri, mangka lahir kelas Astra (2013-2014) ku cara bagilir sabulan di industri sabulan deui di sakola.
“Kahoyongna mah ngawujudkeun tujuh mérek luyu sareng jumlah kelas binaanana,” saur Bu Euis.
Bu Euis, anu minangka hiji-hijina ti salapan pupuhu wanoja di SMKN 8, ngajagragkeun tilu fungsi alias BMW, Bekerja (gawé), Melanjutkan (nuluykeun) tur Wirausaha (rapékan mandiri). Maksudna siswa lulusan SMKN 8, siap gawé, siap nuluykeun sakola atawa muka usaha sorangan. Sayaga jadi tenaga kerja (TK) kelas menengah.
Mangsa dipingpin ku Bu Euis, geus loba préstasi nu kahontal ku SMKN 8. Di antarana juara LKS dina kaparigelan ngarangké bodi mobil, kantos juara I, juara II (2014-2015) tingkat nasional. Kungsi nyeungitan sakola ku nanjeur juara world skill di Jepang.
Siswa-na nu ahli dina widang ngoméan bodi mobil (body repair) méméh lulus geus dipesen ku Honda mobil, malahan kungsi dipesen ogé ku pausahaan body repair di nagara Kuwait.
Saterasna Ibu Euis anu pituin teureuh Tasikmalaya-Sumedang tapi brolna di Singaparna téh, ngaguar kiprahna dina udagan para siswa didikna, geusan ngawewegan internal sakola, ngainténsifkeun kaparigelan para siswa katut para guru, SMKN 8 masing mulus bangles kana kaliber rujukan sakola-sakola kajuruan di Bandung. Ku kituna disiplin dialajar siswana dihangkeutkeun, ti Senén tepi ka Saptu. Asup pukul 06.42 WIB tepi ka pukul 14.45 WIB.
Teu wungkul lalambé, Sobat Sora, Bu Euis nu ngabawah 1362 siswa tur 137 guru/karyawan metakeun mintembeyan konfensi BBM kana BBG. Gawé bareng reujeung CNG. Hasilna matak reueus, ku ngawujudna motor maké bahan bakar gas. Malahan kasaksén pisan ku Pa Wali Kota Bandung, Bapa Ridwan Kamil. Atuh nalika uji coba, LPG 3 kg sanggup nempuh lalampahan Bandung-Pangandaran. Embohna ti éta, para siswa-na mampuh ngawujudkeun aplikasi anti bégal ku cara ngadalikeun kendaraan ku hapé. Leres-leres kaparigelan anu ngahudang kumecrék reueus ti sadayana. Bu Euis ogé teu antepan kana lingkungan, sabisa-bisa metakeun ketak lingkungan sarwa héjo tur sing sarwa berséka.
Harepan Bu Euis, nu kantos ngawulang di SMKN 6 Kota Bandung kirang langkung salami 24 taun, teu aya kajabi geusan ngajadikeun sakolana dibalitungkeun ku lacak kaunggulanana tur préstasina sarta onjoy karancagéanana, dina ngawujudkeun karya-karya anyar. Dipelakkeun dina karakter para siswa-na, disiplin, jujur tur tanggung jawab. Sacara pribadi ngagem prinsip man jadda wajadd, ungkara Timur Tengah anu pisundaeunana, mun keyeng tangtu pareng. Teu ised tina tatapakan sakola, Smart, Skill turta Compotence.
Kitu obrolan Dra Euis Purnama, M.Pd. ka Sora, kalayan dipairan ku sababaraha guru bawahanana, antarana baé Pa Dani Hidayatulloh, Kepala program TKR. Heup sakieu heula, Sobat Sora. [MS]***
